ឯកឧត្តម ចាន់ យុត្ថា អញ្ជើញប្រគេន និងជូនបច្ច័យចំនួន៣៦លានរៀល ដល់គណៈកម្មការរៀបចំសង្ក្រាន្ត នៅវត្តឃ្លាំងខ្មូត

(កំពង់ធំ)÷ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម ប្រធានក្រុមការងារចុះមូលដ្ឋាន ឃុំប្រឡាយ ឃុំពពក និងសហការី តំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រី និងជាប្រធានក្រុមការងារចុះមូលដ្ឋានស្រុកស្ទោង បានប្រគេន និងជូនបច្ច័យចំនួន៣៦លានរៀល ដល់គណៈកម្មការរៀបចំចាត់ចែងក្នុងកម្មវិធីសង្ក្រាន្តឆ្នាំនេះ ក្នុងឱកាសដែលឯកឧត្តមអញ្ជើញមកពិនិត្យទីតាំងរៀបចំសង្ក្រាន្តនៅវត្តឃ្លាំងខ្មូត និងបានធ្វើគារវកិច្ចចំពោះព្រះគ្រូចៅអធិការវត្តឃ្លាំងខ្មូត ព្រមទាំងសំណេះសំណាលជាមួយក្រុមការងារការរៀបចំ អាជ្ញាធរមូលដ្ឋានឃុំប្រឡាយ និងសសយក ឃុំប្រឡាយ នៅថ្ងៃទី០៦ ខែមេសា ឆ្នាំ២០២៥។

ក្នុងឱកាសនេះដែរ ឯកឧត្តមបានសរសើរខ្ពស់ពីការខិតខំ របស់ព្រះគ្រូចៅអធិការនិងគណៈកម្មាធិការវត្តគ្រប់រូបគ្រប់អង្គ ក្នុងការរៀបចំបុណ្យចូលឆ្នាំថ្មីប្រពៃណីជាតិខ្មែរ និងការដឹកនាំលេងល្បែងប្រជាប្រិយខ្មែរ ដែលជាអត្តសញ្ញាណជាតិខ្មែរ ដូចជា បោះអង្គុញ និងវាយក្អម ជាដើម និងបានអំពាវនាវដល់ប្រជាពលរដ្ឋានមូលដ្ឋានជាពិសេសយុវជនត្រូវបន្តលេង និងអភិរក្សទំនៀមទម្លាប់ប្រពៃណីនេះឱ្យបានគង់វង្សតរៀងទៅ។

ជាមួយនេះផងដែរ ព្រះបុណ្ណញ្ញាណ ណិប អ៊ាន ព្រះរាជាគណៈថ្នាក់កិត្តិយស ជាព្រះគ្រូចៅអធិការវត្តឃ្លាំងខ្មូត និងតំណាងគណៈកម្មការរៀបចំសង្ក្រាន្តវត្តឃ្លាំងខ្មូត បានថ្លែងអំណរគុណយ៉ាងជ្រាលជ្រៅចំពោះឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងសហការី ដែលបានអញ្ជើញមកពិនិត្យទីតាំងរៀបចំសង្ក្រាន្តដោយផ្ទាល់ និងបានចូលរួមឧបត្ថម្ភជាបច្ច័យផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។