លោកជំទាវ ឃួន ឃុនឌី និងលោកឧកញ៉ាគុយ លាងគី រៀបចំពិធីសូត្រមន្តសុំសេចក្តីសុខ សិរីសួស្តី ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ (ឆ្នាំម្សាញ់)

(កំពង់ធំ)៖លោកជំទាវ ឃួន ឃុនឌី សមាជិកព្រឹទ្ធសភានិងលោកឧកញ៉ាគុយ លាងគី រួមនិងពុទ្ធបរិស័ទបានរៀបចំពិធីសូត្រមន្តសុំសេចក្តីសុខ សិរីសួស្តី ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ(ឆ្នាំម្សាញ់)នៅសណ្ឋាគារកំពង់ធំរ៉ូយ៉ាល់ ស្ថិតនៅភូមិទី២ សង្កាត់កំពង់ធំ ក្រុងស្ទឹងសែន ខេត្តកំពង់ធំ ថ្ងៃអាទិត្យ ៩ កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ថ្ងៃទី០៦ ខែ មេសា ឆ្នាំ២០២៥ ត្រូវនឹងថ្ងៃទី៦ ខែ មេសា ឆ្នាំ ២០២៥។

ក្នុងពិធីសូត្រមន្តនេះលោកជំទាវ ឃួន ឃុនឌី សមាជិកព្រឹទ្ធសភានិងលោកឧកញ៉ា គុយ លាងគី រួមនិងពុទ្ធបរិស័ទបានអញ្ជើញថ្វាយនូវគ្រឿងសក្ការៈបូជា ទៀន ធូប ផ្កាភ្ញី និងប្រារព្ធកិច្ចនមស្ការព្រះរតនត្រ័យ សមាទានសីល និមន្តព្រះសង្ឃសូត្រព្រះធម៌ស្វាធ្យាយ ចម្រើនព្រះបរិត្ត និងពុទ្ធជ័យមង្គល ព្រមទាំងប្រគេនចង្ហាន់ ទេយ្យទាន និងគ្រឿងបរិក្ខារផ្សេងៗ វេរប្រគេនព្រះសង្ឃ ដើម្បីឧទ្ទិសមហាសកុសលផលបុណ្យជូនដល់ដួងវិញ្ញាណក្ខន្ធញាតិកាទាំងប្រាំពីរសន្តាន ឥស្សរជន និងយុទ្ធជនដែលបានពលីជីវិត ដើម្បីជាតិមាតុភូមិ ដែលបានទទួលមរណកាលទៅកាន់លោកខាងមុខនិងសូមទេវតាឆ្នាំថ្មី ព្រះនាម គោរាគៈទេវី (ជារាជបុត្រីទី ២ ) នៃកបិលមហាព្រហ្មតាមជួយបីបាច់ថែរក្សា ដល់ថ្នាក់ដឹកនាំ និងមន្រ្តីរាជការ ព្រមទាំងក្រុមគ្រួសារ សូមទទួលបាននូវសុខភាពបរិបូរណ៍ កម្លាំងមាំមួន បញ្ញាភ្លឺថ្លា អាយុយឺនយូរ ដើម្បីរួមចំណែកបំពេញភារកិច្ច ឲ្យទទួលបានជោគជ័យថ្មីៗបន្ថែមទៀតជូនជាតិនិងប្រជាជន។

សូមជម្រាបថា ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ថ្ងៃចន្ទ ២រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៨ ត្រូវនឹងថ្ងៃទី១៤ ខែមេសា ឆ្នាំ២០២៥ ព្រះនាម គោរាគៈទេវី ។