អាជ្ញាធរឃុំឈូក ឃុំគោល ឃុំតាំងក្រសៅ ស្រុកប្រាសាទសំបូរខេត្តកំពង់ធំ បានយកចិត្តទុកដាក់រៀបចំតុបតែងលម្អ សង្ក្រាន្តឆ្នាំថ្មី! និងត្រៀមរក្សាសណ្ដាប់ធ្នាប់សាធារណៈពេលបុណ្យចូលឆ្នាំខ្មែរខាងមុខនេះ តាមការណែនាំរបស់គណៈបញ្ជាការឯកភាពស្រុក

(កំពង់ធំ)÷ រដ្ឋបាលឃុំឈូក ឃុំគោលនិងឃុំតាំងក្រសៅ បាននិងកំពុងរៀបចំ តុបតែងសង្ក្រាន្តឆ្នាំថ្មី នៅ គ្រប់វត្តអារាមដើម្បីអបអរសាទរទទួលទេវតាឆ្នាំថ្មី ព្រមទាំងបានត្រៀមផែនការរួចជាស្រេច តាមការណែនាំរបស់ ប្រធានគណៈបញ្ជាការឯកភាពស្រុកប្រាសាទសំបូរ ដើម្បីថែរក្សាសុខសុវត្ថិភាព ជូនប្រជាពលរដ្ឋ កំសាន្តសប្បាយក្នុងមូលដ្ឋាន នារដូវកាល បុណ្យចូលឆ្នាំថ្មី ប្រពៃណីជាតិ ឆាប់ៗខាងមុខនេះ។

លោក ហ៊ុយ គឹមលី មេឃុំឈូកស្រុកប្រាសាទសំបូរ បានប្រាប់ថាឆ្នាំនេះក៏ដូចឆ្នាំមុនៗ រដ្ឋបាលឃុំ បានរៀបចំសង្ក្រាន្តធំ នៅក្នុងបរិវេណវត្ត ឧសីលវ័នហៅ វត្តកំពង់ស្បូវ ដែលមានទីឆ្លៀតធំ ដើមឈើធំៗ ម្លប់ត្រជាក់ ដែលបងប្អូនប្រជាពលរដ្ឋ និយមមកលេងល្បែងប្រជាប្រិយ និងរាំលេងកំសាន្ត ក្នុងរដូវចូលឆ្នាំខ្មែរ ប្រកបដោយភាពសប្បាយរីករាយ ម្លប់សន្តិភាព! ព្រះគ្រូចៅអធិការ វត្តកំពង់ស្បូវនេះ បានមានសង្ឃថិរៈដីកាថា ពុទ្ធបរិស័ទចូលចិត្តមក វត្តនេះដោយសា ទីធ្លាវត្តស្រឡះ មានដើមស្វាយធំៗ ៣ដើម មានអាយុកាលយូរ មានម្លប់ត្រជាក់ ពលរដ្ឋពុទ្ធបរិស័ទ មានជំនឿ បែរបន់អ្វីស័ក្តិសិទ្ធិ បានដូចប្រាថ្នាផងដែរ។

– ចំណែកព្រះគ្រូព្រះនាម ឃុន សេតវិទូ ចៅអធិការ វត្តសិរីមង្គលហៅ វត្តកំពង់ជ្វា ស្រុកប្រាសាទសំបូរ បានមានសង្ជថេរដិកាថា ក្រោមការដឹកនាំរដ្ឋបាលឃុំ ដោយលោក ជា ថា បានលើកទឹកចិត្តប្រជាពលរដ្ឋ គោរពស្រឡាញ់ វប្បធម៌ប្រពៃណី ព្រះពុទ្ធសាសនាពិសេសក្នុងឱកាសបុណ្យ ចូលឆ្នាំថ្មីខាងមុខនេះ លោកអាចារ្យគណៈកម្មការ បានសម្រេច រៀបចំសង្ក្រាន្តធំ នៅវត្តកំពង់ជ្វា ។ ជាក់ស្ដែងថ្ងៃនេះ មានការចូលរួមជួបជុំគ្នាច្រើន សស្រាក់ស្រាំ ជួយរៀបចំតុបតែងលម្អសង្ក្រាន្ត និងបរិស្ថាន ទីធ្លាវតព្រមទាំងពេលល្ងាចៗ ហាត់សមរបាំផ្សេងៗ សម្រាប់អបអរសង្ក្រាន្តឆ្នាំថ្មី ។

រីឯរដ្ឋបាលឃុំតាំងក្រសាំង ដឹកនាំដោយលោក ប៊នរ៉ា បានមានប្រសាសន៍លើកឡើងថាក្រោមម្លប់សន្តិភាព រដ្ឋបាលឃុំខិតខំអនុវត្ត តាមកម្មវិធីគោលនយោបាយជាតិ
លើកកម្ពស់ជីវភាពប្រជាជន ក្នុងនោះគោលនយោបាយ ភូមិ ឃុំមានសុវត្ថិភាព សម្រាប់រដូវកាលចូលឆ្នាំថ្មីខាងមុខនេះ រដ្ឋបាលឃុំនិងរដ្ឋបាលប៉ុស្តិ៍ បានសហការដឹកនាំប្រជុំ ជាមួយមេភូមិ ប្រជាការពារភូមិ ត្រៀមរក្សាការពារសុវត្ថិភាព ឲ្យបានល្អជូន បងប្អូនប្រជាពលរដ្ឋនៅទីប្រជុំជនវត្តអារាម ពិសេសនៅក្នុងវត្តតាំងក្រសៅ ដែលបានរៀបចំសង្ក្រាន្តធំ សម្រាប់បងប្អូនមកលេងកម្សាន្តសប្បាយ។

សូមបញ្ជាក់ថា រដ្ឋបាល ឃុំឈូក ឃុំគោលនិងឃុំតាំងក្រសៅ  បានពាវនាវសំណូមពរបងប្អូនប្រជាពលរដ្ឋធ្វើដំណើរបើកបរដោយប្រុងប្រយ័ត្ននិងគោរពច្បាប់ចរាចរណ៍ ដើម្បីសុខសុវត្ថិភាពក្នុងឱកាសឆ្លងឆ្នាំថ្មីប្រពៃណីជាតិ ខាងមុខនេះ ទទួលបានសិរីសួស្ដីឆ្នាំថ្មី និងពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ អត្ថបទរដ្ឋបាលឃុំឈូក-ពិនិត្យដោយអ៊ុមញឹប