ឧត្តមសេនីយ៍ទោ សោម ស៊ុន ដឹកនាំកងកម្លាំងត្រួតពិនិត្យភូមិសាស្ត្រតំបន់ឡូតិ៍អភិរក្សពូជត្រី ចំនួន៥នៅឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ដើម្បីរៀបចំកងកម្លាំងប្រចាំការការពារ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ
(កំពង់ធំ)÷នៅព្រឹកថ្ងៃទី៣ ខែមេសា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុ ប្រធានអចិន្ត្រៃយ៍ នៃគណៈកម្មការ ការពារទប់ស្កាត់និងបង្ក្រាបបទល្មើសធនធានធម្មជាតិខេត្តកំពង់ធំ អមដំណើរដោយលោកវរសេនីយ៍ឯកសោម សុភាវុធ មេបញ្ជាការរង នាយសេនាធិការ បានដឹកនាំកងកម្លាំង ត្រួតពិនិត្យភូមិសាស្ត្រតំបន់ឡូតិ៍អភិរក្សពូជត្រី ចំនួន៥ នៅក្នុងភូមិសាស្ត្រ ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ដេីម្បី ដាក់ផែនការ ការប្រេីប្រាស់កម្លាំងការពារ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ ។
ឧត្តមសេនីយ៍ទោ សោម ស៊ុន បានបញ្ជាក់ថា ដោយអនុវត្តតាមបទបញ្ជារបស់គណៈបញ្ជាការឯកភាពដឹកនាំបង្ក្រាបបទល្មើសនេសាទខុសច្បាប់នៅក្នុងភូមិសាស្ត្រខេត្តទាំង០៥ បាត់ដំបង ពោធិ៍សាត់ សៀមរាប កំពង់ឆ្នាំង និងខេត្តកំពង់ធំ ក្នុងតំបន់បឹងទន្លេសាប ស្ដីពីវិធានការមុឺងម៉ាត់ ក្នុងការ ការពារតំបន់ឡូតិ៍អភិរក្សពូជត្រី , ការគ្រប់គ្រងការហ៊ុំព័ទ្ធសម្រាសយកត្រី ដែលប្រព្រឹត្តដោយឧបករណ៍នេសាទខុសច្បាប់ និងកិច្ចសហប្រតិបត្តិការ ការពារសន្តិសុខសុវត្ថិភាព ជូនភ្ញៀវទេសចរណ៍ជាតិ និងអន្តរជាតិ ដែលមានគោលបំណងទស្សនាកំសាន្តក្នុងបឹងទន្លេសាប ក្នុងឱកាសបុណ្យចូលឆ្នាំថ្មីនេះ ឲ្យទទួលបានសន្តិសុខនិងសុវត្ថិភាពល្អ ។
នៅក្នុងឱកាសត្រួតពិនិត្យតាមតំបន់ឡូតិ៍អភិរក្សពូជត្រីទាំង៥ មានទី១ តំបន់ឡូត៍អភិរក្សព្រែកខ្សាច់ ទី២ តំបន់ឡូត៍អភិរក្សព្រែកធ្លក , ទី៣ តំបន់ឡូត៍អភិរក្សព្រែកតាប៉ា ,ទី៤ តំបន់ឡូត៍អភិរក្ស ព្រែកបា និងទី៥ តំបន់ឡូត៍អភិរក្សលេខពីរស្ទួន ដែលត្រូវរៀបចំកងកម្លាំងសហការជាមួយស្ថាប័នជំនាញនិងអាជ្ញាធរដែនដី ដើម្បីគ្រប់គ្រង ការពារឱ្យបាន មិនឱ្យមានការកេីតឡេីងនូវសកម្មភាពលួចឆក់ត្រី ឬសកម្មភាពនេសាទគ្រប់ប្រភេទ នៅក្នុងតំបន់ហាមឃាត់នេះ ក្នុងរដូវបុណ្យចូលឆ្នាំដែលជាថ្ងៃឈប់សម្រាកនេះបានជាដាវ់ខាត។
នៅក្នុងឱកាសត្រួតពិនិត្យភូមិសាស្ត្រនេះ ឧត្តមសេនីយ៍ទោ សោម ស៊ុន ក៏បានជួបណែនាំប្រជាពលរដ្ឋចំនួន ៥ គ្រួសារ ដែលជាជនចំណាកស្រុកមកពីខេត្តកំពង់ឆ្នាំង បានមកបោះជម្រកស្នាក់នៅបណ្ដោះ អាសន្ន ប្រកបមុខរបរធ្វើចំការ នៅក្នុងតំបន់ឡូត៍អភិរក្សនេះ ដោយមិនអនុញ្ញាតឲ្យធ្វើសកម្មភាពនេសាទទោះបីក្នុងរូបភាពណាក៏ដោយ ហើយនិងបានសំណូមពរទៅអាជ្ញាធរដែនដី និងស្ថាប័នជំនាញ ដើម្បីមានវិធានការចំពោះពួកគាត់ ដើម្បីធ្វើការរុះរើចាកចេញពីតំបន់ហាមឃាត់នេះតាមច្បាប់ស្ដីពីជលផល ។
ឧត្តមសេនីយ៍ទោ សោម ស៊ុន បានប្រគល់ភារកិច្ចជូនកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវចាត់តាំងកម្លាំងយាមល្បាតប្រចាំការ ២៤ លើ ២៤ ម៉ោង នៅក្នុងតំបន់ឡូត៍អភិរក្សទាំង៥ខាងលើនេះ នៅក្នុងឱកាសថ្ងៃឈប់សម្រាកបុណ្យចូលឆ្នាំថ្មីប្រពៃណីជាតិខ្មែរ ឲ្យមានប្រសិទ្ធភាព និងទទួលបានជោគជ័យ ដើម្បីបុព្វហេតុជាតិនិងប្រជាជនកម្ពុជាទាំងមូល។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
