ក្រសួងការងារនិងបណ្ដុះបណ្ដាលវិជ្ជាជីវៈបើកវគ្គបណ្ដុះបណ្ដាលស្ដីពីការបង្ការនិងទប់ស្កាត់ការប្រើប្រាស់ពលកម្មកុមារនៅតាមសហគ្រាស គ្រឹះស្ថានផលិត ឥតក្បឿង

(កំពង់ធំ)÷នៅវិទ្យាស្ថានពហុបច្ចេកទេសខេត្តកំពង់ធំ ថ្ងៃទី០២ ខែមេសា ឆ្នាំ២០២៥ ក្រសួងការងារនិងបណ្ដុះបណ្ដាលវិជ្ជាជីវៈបានបើកវគ្គបណ្ដុះបណ្ដាលស្ដីពីការបង្ការនិងទប់ស្កាត់ការប្រើប្រាស់ពលកម្មកុមារនៅតាមសហគ្រាស គ្រឹះស្ថានផលិត ឥតក្បឿង ក្រោមអធិបតីភាពឯកឧត្តមវ៉េង ហៀងអនុរដ្ឋលេខាធិការនៃក្រសួងការងារនិងបណ្ដុះបណ្ដាលវិជ្ជាជីវៈ។
កម្មវិធីនេះក៏មានការអញ្ជើញចូលរួមមកពី៨ខេត្ត ដោយ តំណាងអភិបាលនៃគណៈអភិបាលខេត្ត.ស្រុក. មេឃុំ.ដែលមានសហគ្រាសគ្រឹះស្ថានផលិតឥតក្បឿងនៅក្នុងមូលដ្ឋានរបស់ខ្លួនចូលរួមក្នុងកម្មវិធីនេះផងដែរ។
លោកយស់ បញ្ញារិទ្ធនាយករងរដ្ឋបាលសាលាខេត្តបានឡើងអានរបាយការណ៍គូសបញ្ជាក់ថា៖សហគ្រាស គ្រឹះស្ថាន ដែលស្ថិតក្រោមការគ្រប់គ្រង របស់មន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ធំក្នុងពេលបច្ចុប្បន្ន មានដូចខាងក្រោម៖-សហគ្រាស គ្រឹះស្ថាន ៥៧៧ សហគ្រាស  -កម្មករនិយោជិតសរុបចំនួន ១៥,៤០៦នាក់ ស្រី ៥,៩៣៤នាក់
វិស័យសិប្បកម្មផលិតឥដ្ឋ ក្បឿង ៣៦សហគ្រាស កម្មករនិយោជិតសរុប ១៧៤នាក់ ស្រី ៧៩នាក់. វិស័យកសិឧស្សាហកម្ម ២៥សហគ្រាស កម្មករនិយោជិតសរុប ១១,៨៩៧នាក់ ស្រី ៤,៧៧២នាក់។
ឯកឧត្តមវ៉េង ហៀងអនុរដ្ឋលេខាធិការនៃក្រសួងការងារនិងបណ្ដុះបណ្ដាលជាជីវៈមានប្រសាសន៍ថា ចាប់ពីឆ្នាំ២០២៣ ដល់ឆ្នាំ២០២៤ ក្រសួងបានចុះផ្សព្វផ្សាយចំនួន៣៥៤លើក/ទីតាំង ស្តីពី ការទប់ស្កាត់ការប្រើប្រាស់ពលកម្មកុមារ និងទម្រង់ធ្ងន់ធ្ងរនៃពលកម្មកុមារ ក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សិប្បកម្មផលិតឥដ្ឋ និងកសិ-ឧស្សាហកម្ម។ បន្ថែមលើនេះទៀត ក្រសួងបានពង្រឹងការចុះយុទ្ធនាការស្តីពីការទប់ស្កាត់ការប្រើ ប្រាស់ពលកម្មកុមារនៅក្នុងវិស័យសិប្បកម្មផលិតឥដ្ឋ និងវិស័យកសិ-ឧស្សាហកម្ម ជាបន្តបន្ទាប់ ។
ឯកឧត្តមបន្តថា ក្នុងស្មារតីនេះដើម្បីរួមចំណែកបង្ការនិងទប់ស្កាត់ការប្រើប្រាស់ពលកម្មកុមារនៅតាមសហគ្រាសគ្រឹះស្ថានផលិតឥតស្បឿង ឯកឧត្តមសូមស្នើ នូវវិធានការមួយចំនួនដូចខាងក្រោម៖
១. ជំរុញការអនុវត្ត ផែនការសកម្មភាពជាតិស្តីពីការកាត់បន្ថយពលកម្មកុមារ និងលុបបំបាត់ ទម្រង់ធ្ងន់ធ្ងរនៃពលកម្មកុមារ (២០១៦-២០២៥) និងចាត់វិធានការឱ្យមានប្រសិទ្ធភាព ដល់ការបង្ការ ទប់ស្កាត់, ការដកហូត, ការផ្តល់ជំនាញវិជ្ជាជីវៈ និងការស្តារនីតិសម្បទា និង ការលើកកម្ពស់ការងារសមរម្យដល់កុមារ ដែលគ្រប់អាយុធ្វើការងារបាន សំដៅសម្រេច បានចំណុចដៅរបស់គោលដៅអភិវឌ្ឍន៍សហសវត្សរ៍កម្ពុជា ២០១៥-២០៣០, ជាពិសេស យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។ ២. ជំរុញការរៀបចំផែនការសកម្មភាពស្តីពីការទប់ស្កាត់ និងឆ្លើយតបនឹងការកេងប្រវ័ញ្ចាពល កម្មកុមារ និងអនុវត្តផែនការសកម្មភាពនេះឱ្យមានប្រសិទ្ធភាព និងត្រូវរៀបចំឧបករណ៍ ដើម្បីវាស់វែងពីលទ្ធផលនៃការអនុវត្តផែនការសកម្មភាពជាតិស្តីពីការកាត់បន្ថយពលកម្ម កុមារ និងការលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ។  ៣. ពង្រឹងការអនុវត្តច្បាប់ និងផ្សព្វផ្សាយឱ្យបានទូលំទូលាយអំពីលិខិតបទដ្ឋាន, ផែនការ និងយុទ្ធសាស្ត្រជាតិ, អនុសញ្ញាស្តីពីសិទ្ធិកុមារ និងលិខិតតូបករណ៍អន្តរជាតិពាក់ព័ន្ធ ស្តីពីការការពារកុមារ, ការកាត់បន្ថយនិងការលុបបំបាត់ពលកម្មកុមារ, ការកេងប្រវ័ញ្ច កុមារគ្រប់រូបភាព។  ៤. សហការគ្រប់ភាគីពាក់ព័ន្ធ និងអង្គការសង្គមស៊ីវិល រួមគ្នាប្តេជ្ញាចិត្តបញ្ចប់រាល់ទម្រង់ធ្ងន់ធ្ងរ នៃពលកម្មកុមារ តាមរយៈកិច្ចសហការពង្រឹងសមត្ថភាពមន្ត្រីជំនាញ ការរាយការណ៍ រហ័ស និងការចូលរួមត្រីភាគីបូក ដើម្បីជំរុញយុទ្ធនាការសហគ្រាស មួយ ជាសហគមន៍សុខសាន្តមួយ ដែលគ្មានការប្រើប្រាស់ពលកម្មកុមារ។
៥. អំពាវនាវឱ្យអាជ្ញាធរ និងភាគីពាក់ព័ន្ធ ត្រូវចូលរួមផ្សព្វផ្សាយ អំពីការទប់ស្កាត់ពលកម្ម កុមារ និងទប់ស្កាត់គ្រប់ស្ថានភាពនៃការរំលោភបំពានលើកុមារ ជាពិសេសនៅតាមមូលដ្ឋាន។ទន្ទឹមនេះឯកឧត្តមក៏បានស្នើដល់សិក្ខាកាម សូមត្រងត្រាប់ស្ដាប់និងចាប់យកនូវខ្លឹមសារគន្លឹះពីការធ្វើបទបង្ហាញព្រមទាំងចូលរួមលើកជាគំនួរដល់វាគ្មិនអោយបានផុសដើម្បីស្វែងរកដំណោះស្រាយរាល់បញ្ហាដែលកើតមានឡើងនៅក្នុងមូលដ្ឋានរបស់ខ្លួន។      (អត្ថបទនិងរូបភាពដោយអ៊ុមញឹប)។