សមិទ្ធផលថ្មីក្លោងទ្វារវត្តសីតម្មោពោធិមង្គល (ហៅវត្តពោធ៍បាក់ក) ក្នុងក្រុងស្ទឹងសែនត្រូវបានបុណ្យឆ្លងប្រគេនព្រះសង្ឃ

(កំពង់ធំ)៖លោកជំទាវ ឃួន ឃុនឌី សមាជិក
ព្រឹទ្ធសភា អញ្ជើញបុណ្យឆ្លងសមិទ្ធផលថ្មីក្លោងទ្វារវត្តសីតម្មោពោធិមង្គល (ហៅវត្តពោធ៍បាក់ក) ស្ថិតនៅភូមិពោធិ៍បាក់ក សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ថ្ងៃទី ២ ខែមេសាឆ្នាំ ២០២៥ ។

លោកជំទាវបានពាំនាំផ្ដាំផ្ញើការសាកសួរសុខទុក្ខពីសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងថ្លែងថា
សមិទ្ធផលទាំងអស់នេះកើតចេញពីព្រះគំនិតផ្ដួចផ្ដើមរបស់ព្រះតេជគុណចៅអធិការវត្ត លោកតាអាចារ្យគណ:កម្មាវត្ត ពុទ្ធបរិស័ទជាច្រើននាក់ទៀតដែលបានកៀរគរ សប្បុរសជននានាជិតឆ្ងាយទាំងក្នុង និងក្រៅប្រទេសដើម្បីជួយកសាងឱ្យលេចចេញជាផ្លែផ្កានៅសមិទ្ធផលផ្សេងៗជាច្រើន សម្រាប់តម្កល់ទុកនៅទីវត្តអារាមដើម្បីឲ្យពុទ្ធបរិស័ទបានធ្វើបុណ្យទាន និងរក្សាសីលតាមប្រពៃណីព្រះពុទ្ធសាសនាជាក់ស្តែងនៅថ្ងៃនេះយើងទាំងអស់គ្នា បានធ្វើបុណ្យឆ្លងដើម្បីទុកជាគុណប្រយោជន៍ដល់ពុទ្ធបរិស័ទទាំងអស់គ្នាទៅថ្ងៃក្រោយ។

លោកជំទាវបញ្ជាក់ថាវិស័យព្រះពុទ្ធសាសនាក៏ដូចជាវិស័យផ្សេងៗទៀតក្នុងប្រទេសកម្ពុជាយើងមានការរីកចម្រើនជាលំដាប់ដោយសារកត្តាសុខសន្តិភាពដែលបានមកពីការខិតខំប្រឹងប្រែងរបស់ប្រមុខរាជរដ្ឋាភិបាលដែលមានសម្ដេចបវធិបតី ហ៊ុន ម៉ាណែត ជានាយករដ្ឋមន្ត្រី។ កត្តាសុខសន្តិភាពនេះដែរបានធ្វើឲ្យបងប្អូនប្រជាពុទ្ធបរិស័ទយើងមានឱកាសជួបជុំធ្វើបុណ្យទានជួបជុំគ្នាសប្បាយរីករាយដោយសារប្រទេសគ្មានសង្រ្គាមមានសន្តិសុខសណ្តាប់ធ្នាប់ល្អមានអាជ្ញាធរសមត្ថកិច្ចកងកម្លាំងប្រដាប់អាវុធបង្ក្រាបរាល់អំពើបទល្មើសទាំងឡាយដើម្បីជួយសម្រួលដល់ការរស់នៅរបស់បងប្អូនប្រជាពលរដ្ឋយើងប្រកបដោយសុខដុមរមនានឹងមានឱកាសរកទទួលទានបង្កើនជីវភាពគ្រួសារតាមមុខរបររៀងៗខ្លួនឲ្យកាន់តែប្រសើរឡើងផងដែរ។

លោកជំទាវ ឃួន ឃុនឌី បានថ្លែងអំណរគុណដល់ឧបាសក ជា ឆោម និងឧបាសិកា ចេង ណៃស៊ត រួមទាំងក្រុមគ្រួសារ ព្រមទាំងសប្បុរសជនទាំងអស់បានលះបង់ថវិកាកសាងក្លោងទ្វារនិងសមិទ្ធិផលឲ្យបានរួចរាល់ដើម្បីសម្រាប់ជាប្រយោជន៍រួមទាំងអស់គ្នា។

គួរបញ្ជាក់ថាក្លោងទ្វារដែលបានសាងសង់រួចរាល់មានកម្ពស់៩.៩ម៉ែត្រ ទទឹង៨.៨ម៉ែត្រ កសាងថ្ងៃទី៣ខែធ្នូ២០២៤ បញ្ចប់ថ្ងៃទី១ខែមេសា២០២៥អស់ថវិកា ២២.០០០ ដុល្លារអាមេរិក ។