បំពាក់បង្គោលភ្លើងសូឡាតាមដងផ្លូវជាតិលេខ៦ក្នុងភូមិសាស្ត្រ ខេត្តកំពង់ធំ ពីព្រំប្រទល់ខេត្តកំពង់ចាម ដល់ព្រំប្រទល់ខេត្តសៀមរាប
ឯកឧត្តម នួន ផារ័ត្ន អភិបាលខេត្តកំពង់ធំបានលើកឡើងនៅថ្ងៃទី១ ខែមេសា នេះ ថា រដ្ឋបាលខេត្តកំពង់ធំ បានចាប់ផ្តើមដឹកនាំអនុវត្តជាជំហានៗ ក្នុង «ការបំពាក់បង្គោលភ្លើងសូឡា នៅតាមដងផ្លូវជាតិលេខ៦» ក្នុងភូមិសាស្ត្រខេត្តកំពង់ធំ ដោយគិតពីព្រំប្រទល់ខេត្តកំពង់ចាម ដល់ព្រំប្រទល់ខេត្តសៀមរាប ប្រវែងសរុប១៤៤គីឡូម៉ែត្រ ឱ្យបានរួចរាល់ទាំងស្រុងនៅត្រឹមដំណាច់ឆ្នាំ២០២៦។
ឯកឧត្តមអភិបាលខេត្ត បញ្ជាក់ថា យុទ្ធនាការ ដែលកើតចេញពីការចង្អុលបង្ហាញរបស់ សម្តេចនាយករដ្ឋមន្ត្រី ហ៊ុន ម៉ាណែត និងក្រោមការគាំទ្រពីលោកឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ខេត្តចាប់ផ្តើមអនុវត្ត ជាមួយនឹងការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន។
«គម្រោងដ៏ធំនេះ ពិតជាមានសារៈសំខាន់ណាស់ សម្រាប់ធានាភាពងាយស្រួលក្នុងការធ្វើដំណើររបស់បងប្អូនប្រជាពលរដ្ឋនៅពេលមេឃងងឹត និងចំពោះបងប្អូនប្រជាពលរដ្ឋដែលរស់នៅតាមដងផ្លូវជាតិលេខ ៦ ព្រមទាំងដើម្បីពង្រឹងការងារសន្តិសុខផងដែរ»។ អត្ថបទអ៊ុម ញឹប។
