លោក សាយ គឹមឡម ការតុបតែងលម្អស្ពាននិងទីសាធារណៈនានាគឺដើម្បីសង្ក្រាន្តឆ្នាំថ្មីនិងទាក់ទាញភ្ញៀវទេសចរណ៍
(កំពង់ធំ)÷ លោក សាយ គឹមឡម អភិបាលស្រុកស្ទោង បានលើកឡើងដូច្នេះ កាលដែលលោកបានដឹកនាំសហការីអញ្ជើញចុះពិនិត្យមើលការតុបតែងរចនាស្ពានលេខ៦០ឆ្លងកាត់ស្ទឹងស្ទោង នៅក្នុងទីរួមស្រុកស្ទោង កាលពីព្រឹកថ្ងៃទី៣១ ខែមីនា ឆ្នាំ២០២៥។
លោកបានបន្ថែមថា រដ្ឋបាលស្រុកបានខិតខំអស់ពីលទ្ធភាពក្នុងការរៀបចំសង្ក្រាន្តឆ្នាំថ្មីឆ្នាំមុននេះ ដើម្បីបង្កលក្ខណៈជូនពុកម៉ែបងប្អូនប្រជាពលរដ្ឋនៅក្នុងមូលដ្ឋានបានកំសាន្តសប្បាយសាទរឆ្នាំថ្មីក៏ដូចជាការទាក់ទាញភ្ញៀវទេសចរណ៍ជិតឆ្ងាយឱ្យចូលមកកំសាន្តនៅក្នុងស្រុកស្ទោង ជាពិសេសក៏ជាផ្នែកមួយក្នុងការលើកកម្ពស់ជីវភាពពុកម៉ែបងប្អូនប្រជាពលរដ្ឋនៅក្នុងស្រុកស្ទោងផងដែរ។
លោកបន្ថែមឱ្យដឹងថា ស្រុកស្ទោងមានកន្លែងទេសចរណ៍ដ៏មានសក្តានុពលជាច្រើនដូចជាចម្ការល្មើ ឬចម្ការតាខ្នា នៅក្នុងក្រុមហ៊ុន លីម ប៊ុណ្ណា ដែលមានទីតាំងស្ថិតនៅក្នុងកែងគោល អាងទឹក៣០កញ្ញា ទីតាំងប្រាសាទបុរាណនានាជាច្រើនដូចជាប្រាសាទវត្តឃ្លាំងខ្មូត នៅក្នុងឃុំប្រឡាយ ប្រាសាទស្វាយអៀរ នៅក្នុងឃុំចំណាក្រោម ប្រាសាទអំពិលរលើង នៅក្នុងឃុំចំណារលើ ភូមិនាងសល្ងាច នៅក្នុងឃុំកំពង់ចិនជើង និងមានសំណង់អគារបុរាណពីសម័យអាណានិគមនិយមបារាំង នៅក្នុងទីរួមស្រុកស្ទោងជាច្រើន។
ទន្ទឹមនឹងនេះ លោកបានអំពាវនាវដល់អាជ្ញាធរមូលដ្ឋាន ដូចជាស្ថាប័នអង្គភាពពាក់ព័ន្ធរដ្ឋនិងឯកជន ក៏ដូចជាពុកម៉ែបងប្អូនប្រជាពលរដ្ឋសូមជួយថែរក្សាបរិស្ថានអនាម័យទីសាធារណៈ ចូលរួមរៀបចំតុបតែងអង្គភាព ស្ថាប័នឬផ្ទះសម្បែងឱ្យបានស្អាតល្អ ទាំងអស់គ្នា។
លើសពីនេះទៀតលោកបានអំពាវនាវប្រជាពលរដ្ឋក្នុងមូលដ្ឋានសូមចូលរួមថែរក្សាទំនៀមទម្លាប់ប្រពៃណីនិងលេងល្បែងកំសាន្តប្រពៃណីជាតិខ្មែរឱ្យបានផុសផុលគ្រប់ៗគ្នា ដូចជាបោះអង្គញ់ ទាញព្រ័ត្រ ចោលឈូង និងលាក់កន្សែងជាដើម។
សូមបញ្ជាក់ថា ឆ្នាំនេះស្រុកស្ទោង បានរៀបចំតុបតែងកែលម្អស្ពានចំនួនបីគឺ ស្ពានលេខ៥៩ ស្ពានលេខ៦០ និងស្ពានលេខ៦១ផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។
