លោកសាយ គឹមឡម អំពាវនាវភ្ញៀវទេសចរណ៍ជិតឆ្ងាយមកលេងសង្ក្រាន្តស្រុកស្ទោងក្នុងឱកាសបុណ្យចូលឆ្នាំថ្មី:

កំពង់ធំ : លោកអភិបាលស្រុកស្ទោងបានអំពាវនាវដូច្នេះនៅឱកាសដែលលោកនិងសហការីបានអញ្ជើញចុះពិនិត្យមើលការតុបតែងកែលម្អស្ពានឆ្លងកាត់ស្ទឹងស្ទោង ដែលតភ្ជាប់ឃុំកំពង់ចិនជើងនិងឃុំកំពង់ចិនត្បូង នៅរសៀលថ្ងៃទី ២៩ខែមីនាឆ្នាំ ២០២៥នេះ។

លោកបន្ថែមថា ដោយប្រទេសជាតិយើងមានសុខសន្តិភាពនិងមានការដឹកនាំដ៏ប៉ិនប្រសប់របស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី បានធ្វើឱ្យប្រទេសជាតិមានការរីកចម្រើនគួរឲ្យមោទនភាពក្រៃលែង ហេតុនេះហើយរដ្ឋបាលស្រុកស្ទោងបានរៀបចំសង្ក្រាន្តតាមបណ្ដាវត្តអារាមនានាក្នុងមូលដ្ឋាន ជាពិសេសការរៀបចំសង្ក្រាន្តរបស់រដ្ឋបាលស្រុកស្ទោងស្ថិតនៅក្នុងវត្តហប់ ស្ថិតនៅក្នុងឃុំទ្រានិងមានការរៀបចំតុបតែងកែលម្អស្ពានបីនៅក្នុងស្រុកគឺស្ពានលេខ៥៩ ឬស្ពានមឈាយស្ថិតនៅក្នុងឃុំសំព្រោជ ស្ពានលេខ៦០  ឆ្លងកាត់ស្ទឹងស្ទោងដែលតភ្ជាប់រវាងឃុំ កំពង់ចិនត្បូងនិងឃុំកំពង់ចិនជើង និងស្ពានលេខ ៦១ (អូច្រម៉ាស់ ) នៅក្នុងឃុំកំពង់ចិនជើង ដើម្បីអបអរសាទរឆ្នាំថ្មីនិងទាក់ទាញភ្ញៀវទេសចរណ៍មកកម្សាន្តសប្បបាយក៏ដូចជា បង្ហាញឲ្យឃើញពីការរីកចម្រើនរបស់ស្រុកស្ទោងផងដែរ។

ទន្ទឹមនឹងនេះក៏មានការរៀបចំលេងនូវល្បែងកំសាន្តប្រពៃណីជាតិខ្មែរតាមបណ្ដាវត្តអារាមនានាក៏ដូចជាទីសាធារណៈផ្សេងៗ ជូនពុកម៉ែបងប្អូនប្រជាពលរដ្ឋបានកម្សាន្តសប្បាយតាមលក្ខណៈប្រពៃណីជាតិនិងអបអរសាទរស្វាគមន៍ទេវតាឆ្នាំថ្មី ឆ្នាំម្សាញ់ថែមទៀតផង។

សូមបញ្ជាក់ផងដែរថា  បុណ្យចូលឆ្នាំថ្មីប្រពៃណីជាតិខ្មែរឆ្នាំម្សាញ់ឆ្នាំនេះនឹងប្រព្រឹត្តទៅនៅថ្ងៃទី ១៤ដល់ថ្ងៃទី ១៦ខែមេសាឆ្នាំ ២០២៥ ហើយរដ្ឋបាលស្រុកស្ទោងមានការតុបតែងលម្អស្ពានចំនួនបីគឺស្ពានលេខ៥៩ (មឈាយ)មានប្រវែង ២៥ម៉ែត្រ ស្ពានលេខ ៦០ ឆ្លងកាត់ស្ទឹងស្ទោងមានប្រវែង ៦០ម៉ែត្រ និងស្ពានលេខ ៦១(អូច្រម៉ាស់)មានប្រវែង ១៨,៥ម៉ែត្រហើយមានទទឹង ១១ម៉ែត្រ។ពិនិត្យដោយអ៊ុមញឹប។