នាយកដ្ឋានអភិវឌ្ឍទីផ្សារ អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម បើកសិក្ខាសាលាស្តីពីការលើកកម្ពស់ផលិតផលខ្មែរ

(កំពង់ធំ)÷ នាយកដ្ឋានអភិវឌ្ឍទីផ្សារ អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម បើកសិក្ខាសាលាស្តីពីការលើកកម្ពស់ផលិតផលខ្មែរ
នៅព្រឹកថ្ងៃទី២៨ ខែមីនា ឆ្នាំ២០២៥ នៅសាលប្រជុំមន្ទីរពាណិជ្ជកម្មខេត្តកំពង់ធ។

ពិធីនេះប្រព្រឹត្តទៅក្រោមវត្តមាន លោក តាន់ យុវរដ្ឋ អគ្គនាយករងជំរុញពាណិជ្ជកម្ម នៃក្រសួងពាណិជ្ជកម្ម លោក អភិបាលរងខេត្តកំពង់ធំ លោកឧកញ៉ាប្រធានសភាពាណិជ្ជកម្មមណ្ឌ ខេត្តកំពង់ធំ-ព្រះវិហារ និងថ្នាក់ដឹកនាំមន្ទីរ អង្គភាពពាក់ព័ន្ធ ផលិតករ សិប្បករ ពាណិជ្ជករ សហគមន៍ សមាគម ក្រុមហ៊ុន និស្សិត ប្រមាណជាង១០០នាក់ ។

លោកងួន រាសី អភិបាលរងខេត្តកំពង់ធំ បានមានប្រសាសន៍ថា ដោយមានកិច្ចសហការជាមួយរដ្ឋបាលខេត្ត មន្ទីរ អង្គភាពពាក់ព័ន្ធនាឱកាស នេះនឹងជួយផ្តល់ព័ត៌មានអំពីឱកាសទីផ្សារថ្មីៗចែករំលែកបទពិសោធន៍ល្អៗ និង ស្វែងរកដៃគូសហការធ្វើអាជីវកម្ម។ ជាពិសេសបានផ្តល់ជាយុទ្ធសាស្ត្រក្នុងការធ្វើអាជីវកម្មឱ្យមានការរីកចម្រើនផ្នែកបច្ចេកវិទ្យា នៃការធ្វើអាជីវកម្ម តាមគន្លងប្រក្រតីភាពថ្មី នៃសម័យបច្ចេកវិទ្យា ឌីជីថល ដែលជំរុញឱ្យមានការធ្វើ ពាណិជ្ជកម្ម លើគ្រប់វិស័យរបស់រដ្ឋបាលខេត្តកំពង់ធំ ឱ្យកាន់តែមានវឌ្ឍនភាព បន្ថែមទៀត។ ផលិតផលកម្ពុជា១០មុខ ដែលកំពុងមានតម្រូវការទីផ្សារជំរុញការនាំចេញដូចជា៖ ស្រូវ អង្ករ ស្វាយចន្ទី ដំឡូង មី ចេក មៀនប៉ៃលិន ស្វាយ សាច់សត្វ ជ័រកៅស៊ូ ម្នាស់ និងម្រេច ដូច្នេះហើយដែល តម្រូវឱ្យយើងទាំងអស់គ្នាគិតគូរទៅដល់ការផលិតមួយឱ្យស្របតាមស្តង់ដា ដែលតម្រូវឱ្យយើងទាំងអស់គ្នាត្រូវគិតគូអំពី គុណភាព សុវត្ថិភាព និងតម្លៃ ការវេចខ្ចប់និង រចនាម៉ូដ សមត្ថភាពផលិត ការស្វែងរកនិងកំណត់ទីផ្សារ ការកំណត់កាលបរិច្ឆេទ សុពលភាពប្រើប្រាស់ ការដាក់លេខកូដបាលើផលិតផល និងសេវាកម្មដឹកជញ្ជូនផងដែរ។ 

លោក តាន់ យុវរដ្ឋ អគ្គនាយករងជំរុញពាណិជ្ជកម្ម នៃក្រសួងពាណិជ្ជកម្ម បានមានប្រសាសន៍ថា ក្រសួងពាណិជ្ជកម្មក្នុងនាមជាសេនាធិការរបឮស់រាជរដ្ឋាភិបាលកម្ពុជាបាន និងកំពុងបន្តធ្វើកិច្ចសម្រួល ពាណិជ្ជកម្មជាច្រើនដើម្បីទាក់ទាញវិនិយោគិនទាំងក្នុង និងក្រៅប្រទេសឱ្យមកវិនិយោគនៅកម្ពុជាតាមរយ÷ ១.ការកសាងលិខិតបទដ្ឋានគតិយុត្តនានាស្របតាមការវិវត្តនៃសេដ្ឋកិច្ច និងសង្គម ដើម្បីបង្កលក្ខណៈ ងាយស្រួលដល់វិនិយោគិនជាតិ-អន្តរជាតិឱ្យចូលមកដាក់បណ្តាក់ទុនរកស៊ីនៅប្រទេសកម្ពុជា ប្រកបដោយទំនុកចិត្ត និងសុវត្ថិភាព។ ២.ការចរចាបើកទីផ្សារ ការបង្កើតកិច្ចព្រមព្រៀងពាណិជ្ជកម្ម ទាំងក្នុងក្របខ័ណ្ឌទ្វេភាគី ពហុភាគី តំបន់ និងពិភពលោក ។
៣. ការធ្វើប្រតិភូកម្មចេញវិញ្ញាបនបត្របញ្ជាក់ប្រភពដើមទំនិញ ទៅមន្ទីរពាណិជ្ជកម្ម ជាប់ព្រំដែនសម្រាប់ទំនិញកសិកផលគឺអាចស្នើសុំត្រឹមមន្ទីរពាណិជ្ជកម្ម។ ៤.ការកែប្រែការចុះបញ្ជីក្រុមហ៊ុន ការចុះបញ្ជីម៉ាក ការស្នើសុំវិញ្ញាបនបត្រនាំចេញពីការធ្វើដោយផ្ទាល់ មកធ្វើតាមប្រព័ន្ធស្វ័យប្រវត្តកម្ម (តាមប្រព័ន្ធអនឡាញ) ៥.ការជួយជ្រោមជ្រែង និងបង្កើតកម្មវិធីជំរុញពាណិជ្ជកម្ម តាមរយៈពិព័រណ៍ពាណិជ្ជកម្ម វេទិកា ធុរកិច្ច ជំនួបពាណិជ្ជកម្មទាំងក្នុង និងក្រៅប្រទេស។ ៦.ក្រសួងពាណិជ្ជកម្ម បានសម្ពោធដាក់ឱ្យប្រើប្រាស់ផ្សារអេឡិចត្រូនិក ដើម្បីផ្តល់ឱកាសជូន លោក លោកស្រី អាជីវករ ពាណិជ្ជករ ផលិតករ សិប្បករ សេវាករ សមាគម សហគមន៍ អាចដាក់លក់ ផលិតផលខ្មែរ តាមប្រព័ន្ធអនឡាញ របស់ក្រសួងពាណិជ្ជកម្ម ដោយឥតគិតថ្លៃ។ ៧.ក្រសួងពាណិជ្ជកម្មបានបង្កើតមជ្ឈមណ្ឌលពាណិជ្ជកម្មឯកជនកម្ពុជា ដើម្បីតាំងបង្ហាញ និងផ្សព្វផ្សាយ ផលិតផលខ្មែរជាអចិន្ត្រៃយ៍នៅក្រៅប្រទេស ៨.ក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) បានចុះអនុស្សរណៈនៃការយោគយល់គ្នា (MOU) ក្នុងគោលបំណងជំរុញ និងបង្កើនការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈ ភីធីធី នៅទីតាំងសំខាន់ៗមួយចំនួនតាមបណ្តារាជធានី ខេត្ត នៃព្រះរាជាណាចក្រកម្ពុជា ជាក់ស្តែង នៅខេត្តកំពង់ធំមានស្ថានីយប្រេងឥន្ធនៈ ភីធីធីកំពុងអនុវត្តគម្រោងនេះ។ អត្ថបទលោក ធូ កែវមុន្នី-ពិនិត្យនិងកែសម្រួលដោយអ៊ុមញឹប។