លោកឧត្តមសេនីយ៍ទោ ហេង សុផល ដឹកនាំកម្លាំងចុះសាកសួរសុខទុក្ខអតីតយុទ្ធជន ជាសម្ព័ន្ធមេត្រីភាព ភូមិដងក្ដារ ឃុំ ក្រយា ស្រុក សន្ទុក ក្នុងឱកាសពិធីបុណ្យកាន់បិណ្ឌ-បុណ្យភ្ជុំបិណ្ឌ

(កំពង់ធំ)៖រសៀលថ្ងៃ ១៦ ខែ កញ្ញា ឆ្នាំ២០២៥ លោកឧត្តមសេនីយ៍ទោ ហេង សុផល ស្នងការនគរបាលខេត្ត និងជាអនុប្រធានសមាគមអតីតយុទ្ធជនកម្ពុជា ខេត្តកំំពង់ធំ បានដឹកនាំកម្លាំងចុះសាកសួរសុខទុក្ខអតីតយុទ្ធជន ជាសម្ព័ន្ធមេត្រីភាព ក្នុងឱកាសពិធីបុណ្យកាន់បិណ្ឌ-បុណ្យភ្ជុំបិណ្ឌ ស្ថិតនៅដីសប្បទានសង្គមកិច្ច និងគេហដ្ឋានថ្មី ដែលជាអំណោយដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងភូមិ ដងក្ដារ ឃុំ ក្រយា ស្រុក សន្ទុក ខេត្តកំពង់ធំ ។

លោកឧត្តមសេនីយ៍ទោ ហេង សុផល ស្នងការនគរបាលខេត្ត បានថ្លែងថាដោយអនុវត្តតាមការយកចិត្តទុកដាក់ពីសំណាក់ថ្នាក់ដឹកនាំ រាជរដ្ឋាភិបាល ចំពោះអតីតយុទ្ធជន ដែលមានគុណបំណាច់ ពលិកម្ម ដើម្បីបុព្វហេតុជាតិមាតុភូមិ ការពារ ថែរក្សា សន្តិសុខ សណ្តាប់ធ្នាប់ សុវត្ថិភាពសង្គម
រយៈពេលកន្លងមក រហូតទទួលបានសុខសន្តិភាព យ៉ាងពេញលេញ នាពេលបច្ចុប្បន្ននេះ ។ ថ្នាក់ដឹកនាំ តែងតែគិតគូរអំពី សុខទុក្ខ សុខុមាលភាព ការប្រកបមុខរបរចិញ្ចឹមជីវិត របស់បងប្អូន ពោលមិនបោះបង់ចោលបងប្អូន ទោះស្ថិតក្នុងស្ថានភាពណាមួយឡើយ ហើយមិនត្រឹមតែប៉ុណ្ណោះ ថ្នាក់ដឹកនាំ បានចាត់តាំងក្រុមការងារ ចុះដល់លំនៅដ្ឋាន នាំយកសម្ភារៈ ថវិកា គ្រឿងឧបភោគបរិភោគ ឧបត្ថម្ភ ជូនបងប្អូនជាប្រចាំ ផងដែរ ។

លោកស្នងការ បន្តមានប្រសាសន៍ សំណេះសំណាល បន្ថែមពីអំណោយខាងលើនេះ សូមបងប្អូនបន្តប្រឹងប្រែងប្រកបមុខរបរជាប្រចាំថ្ងៃ ដូចជាការបង្ករបង្កើនផល ដាំដំណាំ បន្លែផ្លែឈើ ចិញ្ចឹមសត្វ តាមគ្រួសារនីមួយៗ គឺជួយសម្រាលចំណាយដោះស្រាយជីវភាពឲ្យកាន់តែប្រសើរឡើង ។

លោក ធីវ ថាត តំណាងឱ្យបងប្អូនអតីតយុទ្ធជនទូទាំង ០៧ គ្រួសារបានថ្លែងអំណរគុណ យ៉ាងជ្រាលជ្រៅបំផុត ចំពោះ លោកស្នងការ លោកស្នងការរង ប្រតិភូអមដំណើរដែលបានចំណាយពេលវេលា ដ៏មមាញឹក ចុះសួរសុខទុក្ខ ឧបត្ថម្ភ សម្ភារៈ ថវិកា ក្នុងឱកាសពិធីបុណ្យកាន់បិណ្ឌ-បុណ្យភ្ជុំបិណ្ឌនាពេលនេះ។
ក្នុងឱកាសនោះ លោកស្នងការ បានឧបត្ថម្ភ គ្រឿងឧបភោគបរិភោគរួមមាន :
-អតីតយុទ្ធជនចំនួន ០៧ គ្រួសារ ក្នុង ០១ គ្រួសារទទួលបាន.អង្ករទម្ងន់ ៥០គីឡូក្រាម.ថវិកា ១០០,០០០រៀល,ព្រមទាំងទឹកបរិសុទ្ធនិងនំធុង -មេភូមិ -កម្លាំងប្រជាការពារ ១០ នាក់ ទទួលបានថវិកាមួយចំនួន ។ អត្ថបទស្នងការនគរបាលខេត្ត.ពិនិត្យដោយអ៊ុមញឹប។