អ្នកឧកញ៉ា ហ៊ុន ឡាក់ អំពាវនាវសិស្សានុសិស្សត្រូវខិតខំសិក្សារៀនសូត្រដើម្បីក្លាយជាទំពាំងស្នងឫស្សីនិងជួយអភិវឌ្ឍសហគមន៍របស់ខ្លួន

(កំពង់ធំ)÷ អ្នកឧកញ៉ា ហ៊ុន ឡាក់ បានអំពាវនាវដូច្នេះក្នុងឱកាសដែលអ្នកឧកញ៉ា និងសហការី  តំណាងលោកអ្នកឧកញ៉ា លី យ៉ុងផាត់ ព្រមទាំងអាជ្ញាធរខេត្តកំពង់ធំនិងស្រុកស្ទោង បានអញ្ជើញចុះសួរសុខទុក្ខ និងចែកអំណោយសមាគមឧកញ៉ាកម្ពុជាជូនដល់សិស្សានុសិស្ស លោកគ្រូ អ្នកគ្រូនៅសាលាបឋមសិក្សា ហ៊ុន សែន ឈូកជីព្រះ ស្ថិតនៅក្នុងឃុំចំណាក្រោម ស្រុកស្ទោង ខេត្តកំពង់ធំ កាលពីព្រឹកថ្ងៃទី២៦ ខែមីនា ឆ្នាំ ២០២៥។

ថ្លែងនៅក្នុងឱកាសនោះអ្នកឧកញ៉ា បានពាំនាំការផ្ដាំផ្ញើសួរសុខទុក្ខពីសំណាកលោកអ្នកឧកញ៉ាលី យ៉ុងផាត់ ប្រធានសមាគមឧកញ៉ាកម្ពុជា ដែលអ្នកឧកញ៉ាតែងគិតគូរយកចិត្តទុកដាក់ខ្ពស់ដល់វិស័យអប់រំនៅកម្ពុជានិងបានចូល ចំណែកយ៉ាងធំធេងបំផុតក្នុងការចូលរួមអភិវឌ្ឍប្រទេសជាតិ ជាពិសេសការចូលរួមកសាងនូវមូលធនមនុស្ស អគារសិក្សាសម្រាប់បឋមសិក្សាហ៊ុនសែនឈូកជីព្រះនេះជាតឹកកតាងស្រាប់។

អ្នកឧកញ៉ាបានសង្កត់ធ្ងន់ថា មានតែចំណេះដឹងពិតប្រាកដទេដែលនាំឱ្យក្មួយៗ កូន ចៅ មានអនាគតភ្លឺស្វាងហើយត្រូវខិតខំសិក្សាឱ្យអស់ពីលទ្ធភាព ទាំងនៅក្នុងសាលារៀនហ្និងនៅតាមគេហដ្ឋាន ហើយត្រូវនៅឲ្យឆ្ងាយពីគ្រឿងញៀនឬអំពើអបាយមុខផ្សេងៗនិងធ្វើខ្លួនឱ្យក្លាយជាកូនល្អ សិស្សល្អ មិត្តល្អ គ្រប់ពេលវេលា។

ទន្ទឹមនឹងនេះអ្នកឧកញ៉ាបានកោតសរសើរនិងថ្លែងអំណរគុណជាអានេកដល់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជាប្រធានក្រុមការងារចុះមូលដ្ឋានខេត្តកំពង់ធំ ដែលលោកតែងតែមានទំនាក់ទំនងល្អនិងសហការខ្ពស់ជាមួយសមាគមឧកញ៉ាកម្ពុជាដែលតែងតែដឹកនាំចុះចែកអំណោយផ្សេងៗនៅក្នុងខេត្តកំពង់ធំក៏ដូចជា កសាងនូវអគារសិក្សាជាច្រើនខ្នង នៅតាមបណ្ដាស្រុកនានាក្នុងខេត្តផងដែរ។

សូមបញ្ជាក់ផងដែរថា សាលាបឋមសិក្សា ហ៊ុន សែន ឈូកជីព្រះ ទទួលបាននូវអគារសិក្សាថ្មី១ខ្នង ដែលមាន៥បន្ទប់ពីសមាគមឧកញ៉ាកម្ពុជា ហើយក្នុងឱកាសនេះដែរគណៈអធិបតីបានចែកជូនដល់សិស្សានុសិស្ស លោកគ្រូអ្នកគ្រូ នូវកង់ សម្ភារសិក្សា ឯកសណ្ឋានកីឡា និងថវិកាមួយចំនួនផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។