លោកជំទាវ ឃួន ឃុនឌី៖ការកសាងសមិទ្ធផលពិតជាមិនអាចខ្វះបានពីការចូលរួមពីពុទ្ធបរិស័ទនិងប្រជាពលរដ្ឋនឹងបានកកើតរស់ឡើងវិញនៅឆ្នាំ១៩៧៩

(កំពង់ធំ)៖លោកជំទាវ ឃួន ឃុនឌី សមាជិកព្រឹទ្ធសភានិងជាប្រធានក្រុមការងារចុះមូលដ្ឋានស្រុកកំពង់ស្វាយបានថ្លែងថាការកសាងសមិទ្ធផលពិតជាមិនអាចខ្វះបានពីការចូលរួមពីពុទ្ធបរិស័ទនិងប្រជាពលរដ្ឋនឹងបានកកើតរស់ឡើងវិញនៅឆ្នាំ១៩៧៩ ។

លោកជំទាវ ឃួន ឃុនឌី បានថ្លែងក្នុងពិធីកាត់ខ្សែបូរបញ្ចុះខ័ណ្ឌសីមាព្រះវិហារថ្មី និងសមិទ្ធផលនានាក្នុងវត្តបទុមពោធិរាជ ហៅវត្ត(វិហារខ្ពស់) ស្ថិតនៅភូមិចុងព្រៃ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ថ្ងៃទី២៤ ខែមីនា ឆ្នាំ២០២៥ ត្រូវនឹងថ្ងៃចន្ទ ១១រោច ខែ ផល្គុន ឆ្នាំរោង ឆស័ក ព.ស ២៥៨៨។ ដោយមានការចូលរួមពីអាជ្ញាធរ
កងកម្លាំង មន្ត្រីរាជការ ពុទ្ធបរិស័ទ ប្រជាពលរដ្ឋ លោកគ្រូ អ្នកគ្រូ សិស្សានុសិស្ស ប្រមាណជិត១ពាន់នាក់ ។

សំណេះសំណាលជាមួយព្រះសង្ឃនិងពុទ្ធបរិស័ទក្នុងឱកាសនោះជំទាវ ឃួន ឃុនឌី បាននាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភានិងបានសំដែងនូវភាពសោមនស្សចំពោះសមិទ្ធផលថ្មីដែលបានកើតមានឡើងនៅក្នុងទីអារាមនេះនិងបានកោតសរសើរចំពោះព្រះចៅអធិការ អាចារ្យវត្ត គណ:កម្មការវត្តនិងពុទ្ធបរិស័ទទាំងអស់ដែលបានប្រឹងប្រែងយកព្រះទ័យនិងយកចិត្តទុកដាក់ក្នុងការកសាងសមិទ្ធផលនេះឡើងទុកជាប្រយោជន៏នៅក្នុងព្រះពុទ្ធសាសនាសំរាប់ជាទីគោរពបដិបត្តិព្រះធម៌ និងប្រារព្ធពិធីបុណ្យផ្សេងៗ ដែលចាត់ទុកជាបច្ច័យរួមចំណែកបន្ថែមទៀតញ៉ាំងឱយវិស័យពុទ្ធចក្រកាន់តែរីកចំរើនគង់វង្សស្ថិតស្ថេរថែមទៀត។

លោកជំទាវបន្តថាកម្ពុជាក្រោមការដឹកនាំរបស់រាជរដ្ឋាភិបាលរបស់សម្តេច មហាបវធិបតី ហ៊ុន ម៉ាណែត នាយករដ្ឋមន្ត្រីជាប្រមុខបានធ្វើអោយប្រទេសជាតិមានសុខសន្តិភាពនិងការអភិវឌ្ឍន៍លើគ្រប់វិស័យទាំងអាណាចក្រនិងពុទ្ធចក្រពិសេសតាមរយ:គោលនយោបាយឈ្នះៗរបស់សម្តេចតេជោប្រទេសកម្ពុជាទាំងមូលទទួលបាននូវការផ្សះផ្សារជាតិ សន្តិភាព ឯកភាពជាតិ ប្រជាធិបតេយ្យ ស្ថេរភាពនយោបាយ និងពង្រឹងឡើងវិញលើគ្រប់វិស័យទាំងអាណាចក្រ និងពុទ្ធចក្រ។
លោកជំទាវបានរំលឹកថាក្នុងសម័យកាលដែលប្រទេសកម្ពុជាធ្លាក់ចូលទៅក្នុងរបបប្រល័យពូជជសាសន៏៣ឆ្នាំ៨ខែ២០ថ្ងៃ បណ្តាឱ្យហេដ្ឋារចនាសម្ព័ន្ធសង្គមជាតិ វត្តអារាម សាលារៀន ទ្រព្យសម្បត្តិសាធារណ:របស់រដ្ឋត្រូវទទួលរងនូវការបំផ្លិចបំផ្លាញស្មើសូន្យ សូម្បីតែសាសនាផ្សេងៗទៀតក៏ត្រូវទទួលរងនូវការកាប់សំលាប់និងបំផ្លិចបំផ្លាញស្ទើរតែផុតពូជដែរ។ អាស្រ័យដោយមានជ័យជំនះ៧ មករា ឆ្នាំ១៩៧៩ ប្រជាជនកម្ពុជាបានរំដោះរួចផុតពីគ្រោះប្រល័យពូជសាសន៍និងទទួលបានសិទ្ធិសេរីភាពរួមគ្នាកសាងសង្គមជាតិឡើងវិញរហូតមានការរីកចំរើនជាលំដាប់ដូចឃើញជាក់ស្តែងក្នុងពេលបច្ចុប្បន្ន។

លោកជំទាវបានលើកទឹកចិត្តឲ្យបងប្អូនពុទ្ធបរិស័ទទាំងអស់ត្រូវជឿជាក់លើការដឹកនាំរបស់រាជរដ្ឋាភិបាលកម្ពុជា ដែលមានគោលនយោបាយច្បាស់លាស់និងដឹកនាំប្រទេសប្រកបដោយភាពរីកចំរើនលើគ្រប់វិស័យប្រទេសជាតិទទួលបានសុខសន្តិភាព សុវត្ថិភាព និង ការអភិវឌ្ឍន៍តាំងពីទីប្រជុំជនរហូតដល់ទីជនបទដាច់ស្រយាល។
លោកជំទាវបញ្ជាក់ថាសមិទ្ធផលទាំងនេះបានឆ្លុះបញ្ចាំងឱ្យឃើញកាន់តែច្បាស់អំពីជំនឿដ៏មុតមាំរបស់ពុទ្ធសាសនិក និងការប្ដេជ្ញាចិត្តប្រកបដោយសទ្ធាជ្រះថ្លារបស់ថ្នាក់ដឹកនាំក្នុងការខិតខំប្រឹង ប្រែងលើកកម្ពស់វិស័យព្រះពុទ្ធសាសនាដែលជាសាសនារបស់រដ្ឋព្រោះវត្តអារាមមិនត្រឹមតែជាកន្លែងសម្រាប់គោរពបូជាប៉ុណ្ណោះទេ ថែមទាំងជាកន្លែងសិក្សារៀនសូត្រព្រះធម៌ វិន័យនិងផ្សព្វផ្សាយអប់រំកាយវាចាចិត្តដល់ប្រជាពលរដ្ឋគ្រប់ៗរូបតាមគន្លងព្រះពុទ្ធសាសនា ដើម្បីទទួលបាននូវសេចក្តីសុខ សេចក្តីចម្រើន និងភាពសុខដុមក្នុងគ្រួសារ និងសង្គមជាតិ ថែមទៀតផង។

លោកជំទាវបានផ្តាំផ្ញើដល់សិស្សានុសិស្សត្រូវខិតខំប្រឹងប្រែងរៀនសូត្រ ស្តាប់តាមការណែនាំរបស់លោកគ្រូ អ្នកគ្រូ ឪពុកម្តាយធ្វើយ៉ាងណាឲ្យក្លាយជាធនធានមនុស្សមួយរូបដែលសង្គមត្រូវការដើម្បីចូលរួមអភិវឌ្ឍន៍ប្រទេសជាតិជាមួយរាជរដ្ឋាភិបាល មិនត្រូវសេពគ្រឿងញៀន ធ្វើខ្លួនជាក្មេងទំនើងពាលាអាវាសែឡើយ និងត្រូវចូលរួមគោរពច្បាប់ចរាចរណ៍ បើកបរត្រូវចេះយោគយល់អធ្យាស្រ័យគ្នាទៅវិញទៅមក ។

ជាមួយគ្នានេះដែរលោកជំទាវ ឃួន ឃុនឌី បាននាំយកបច្ច័យ សម្ភារៈ ពីការចូលរួមរបស់ក្រុមការងារចុះមូលដ្ឋានស្រុកកំពង់ស្វាយ និងសប្បុរសជន ទៅប្រគេនព្រះសង្ឃ និងជូនដល់លោកយាយលោកតា ប្រជាពលរដ្ឋ និងសិស្សានុសិស្ស ផងដែរ ។