រដ្ឋបាលស្រុកតាំងគោករៀបចំទីកន្លែងថតរូបទុកជាអនុស្សាវរីយ៍សម្រាប់ថ្ងៃសង្ក្រាន្តកំពង់ធំមានឈ្មោះថា « តាំងគោកជំរកស្នេហ៍ »

(កំពង់ធំ)៖ស្របពេលដែលបុណ្យចូលឆ្នាំថ្មីខិតជិតមកដល់ខេត្តកំពង់ធំបានរៀបចំសង្ក្រាន្តកំពង់ធំនិងបានរៀបចំតុបតែងតាមទីកន្លែងមួយចំនួនដើម្បីកម្សាន្តអារម្មណ៍របស់បងប្អូនក៏ដូចជាការទាក់ទាញភ្ញៀវទេសចរណ៍មកទស្សនាក៏ដូចជាថតរូបទុកជាអនុស្សាវរីយ៍ក្នុងនោះដែររដ្ឋបាលស្រុកតាំងគោកក៏បានរៀបចំនូវកន្លែងសម្រាប់ថតរូបទុកជាអនុស្សាវរីយ៍របស់ស្រុកតាំងគោកដែលមានឈ្មោះថា « តាំងគោកជំរកស្នេហ៍ » ដែលផ្ដួចផ្ដើមដោយរដ្ឋបាលស្រុក។

លោក ហាក់ ម៉ុងហួត អភិបាលស្រុកតាំងគោកបានបញ្ជាក់ថារដ្ឋបាលស្រុកពិតជាមានសំណាងដែលរដ្ឋបាលបាលខេត្តបានផ្តល់ឱកាសបានរួមចំណែកជាមួយរដ្ឋបាលខេត្តនិងការរៀបចំនៅព្រឹត្តិការណ៍នេះឡើងដើម្បីរួមចំណែកក្នុងការលើកស្ទួយវិស័យទេសចរណ៍ក្នុងការផ្ដល់ឱកាសឲ្យបងប្អូនបានចូលរួមសប្បាយរីករាយពីមួយឆ្នាំទៅមួយឆ្នាំនៅក្នុងបរិបទដែលប្រទេសជាតិមានសុខសន្តិភាពនិងមានការអភិវឌ្ឍន៍លើគ្រប់វិស័យ ទាំងអស់នេះគឺជាសកម្មភាពរបស់បងប្អូនក្នុងស្រុកដែលបានចូលរួមរៀបចំការតុបតែងឲ្យក្លាយជាសមិទ្ធផលដែលមានការចូលរួម ពីព្រះសង្ឃ ប្រជាពលរដ្ឋនិង មន្ត្រី នេះបានបញ្ជាក់ឲ្យឃើញថាកត្តាសាមគ្គីភាពគ្នាល្អធ្វើឲ្យមានការរីកចម្រើនអភិវឌ្ឍន៍។

លោកបន្តថា « តាំងគោកជម្រកស្នេហ៍ » គឺជាការផ្ដល់នូវសេចក្តីស្រឡាញ់មិននត្រឹមតែមនោសញ្ចេតនាប៉ុណ្ណោះទេ ថែមទាំងផ្ដល់នូវថវិកា សម្ភារៈ និងកម្លាំង ក្នុងការចូលរួមគ្រប់សកម្មភាព ពិសេសការចូលរួមគ្រប់មជ្ឈដ្ឋានមានព្រះសង្ឃ  ប្រជាពលរដ្ឋ និងមន្ត្រីរាជការបានសហការគ្នាល្អ នេះគឺបញ្ជាក់ថាស្រុកតាំងគោកគឺជាបណ្ដុំនៃសេចក្តីស្រឡាញ់ ស្រឡាញ់គ្រប់និន្នាការ ស្រឡាញ់គ្រប់ភេទជាគ្រហស្ថក្តី ជាព្រះសង្ឃក្តី ដូច្នេះស្រុកតាំងគោកគឺជាសេចក្តីស្រឡាញ់ទាំងជាតិ និង សាសនា ។

លោក ហាក់ ម៉ុងហួត សូមអំពាវនាវដល់បងប្អូនប្រជាពលរដ្ឋចូលរួមលេងកម្សាន្តនៅក្នុងឱកាសបុណ្យចូលឆ្នាំថ្មីប្រពៃណីជាតិនៅក្នុងខេត្តកំពង់ធំដោយសប្បាយរីករាយនិងទទួលខុសត្រូវខ្ពស់ពិសេសក្នុងព្រឹត្តិការណ៍សង្ក្រាន្តកំពង់ធំ ។

លោក ពុត ប៉យ មកពីភូមិឈូក ឃុំទ្រៀលស្រុកតាំងគោកបានបញ្ជាក់ថាលោកបានមកជួយរៀបចំកន្លែងថតរូបទុកអនុស្សាវរីយ៍មានភាពសប្បាយរីករាយយ៉ាងខ្លាំងដោយបានមករួមចំណែកជួយរដ្ឋបាលស្រុកក៏ដូចជារដ្ឋបាលខេត្តដើម្បីបងប្អូនប្រជាពលរដ្ឋនៅក្នុងខេត្តនិងក្រៅខេត្តមានភាពសប្បាយរីករាយ ក្នុងប្រទេសដែលមានសុខសន្តិភាពក្រោមការដឹកនាំរបស់រាជរដ្ឋាភិបាលដែលមានសម្តេចមហាបវរធិតី ហ៊ុន ម៉ាណែត ជានាយករដ្ឋមន្ត្រី ហើយម្ភារៈទាំងអស់នេះគឺមានការជួយគាំទ្រពីប្រជាពលរដ្ឋនៅក្នុងស្រុកតែម្ដង។