មន្ទីរព័ត៌មានខេត្តកំពង់ធំ បានឱ្យអនុវត្តផែនការយុទ្ធសាស្ត្រអភិវឌ្ឍន៍ជាតិ៥ចំណុច ឆ្នាំ២០២៤ ដល់ឆ្នាំ២០២៨
(កំពង់ធំ)÷ លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានសំណេះសំណាលមន្ត្រីរាជការ និងដឹកនាំកិច្ចប្រជុំប្រចាំខែមករា លើកទិសដៅខែបន្ទាប់ឆ្នាំ២០២៥ ដើម្បីឱ្យមន្ទីរព័ត៌មាន ទទួលបានភាពជោគជ័យ ក្នុងវិស័យព័ត៌មាន នៅរសៀលថ្ងៃទី០៤ ខែកុម្ភៈ ឆ្នាំ២០២៥ នៅសាលប្រជុំមន្ទីរព័ត៌មានខេត្តកំពង់ធំ។
លោកស្រីប្រធានមន្ទីរព័ត៌មានខេត្តកំពង់ធំ បានលើកយករបៀបវារៈប្រជុំដែលមានខ្លឹមសារដូចតទៅ÷ ១.ការពង្រឹងវិន័យនៅក្នុងអង្គភាព។ ២.ការគ្រប់គ្រងការងារ។ ៣.ការផ្សព្វផ្សាយផែនការយុទ្ធសាស្ត្រអភិវឌ្ឍន៍ព័ត៌មាន និងសោទស្សន៍ឆ្នាំ២០២៤-២០២៨។ ៤.បញ្ហាផ្សេងៗ
ថ្លែងនៅក្នុងឱកាសនេះលោកស្រី ង៉ែត ណារីន បានបញ្ជាក់ថាដើម្បីបង្កើនប្រសិទ្ធភាពក្នុងការអនុវត្តផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ) បច្ចុប្បន្នចាប់ពីឆ្នាំ២០២៤ ដល់២០២៨ ក្នុងក្របខ័ណ្ឌនៃទស្សនវិស័យនេះ និងផ្អែកតាមកម្មវិធីនយោបាយសម្រាប់នីតិកាលទី៧ នៃរដ្ឋសភា រាជរដ្ឋាភិបាលដាក់ចេញនូវយុទ្ធសាស្ត្របញ្ចកោណ ដំណាក់ កាលទី១ ដើម្បីកំណើនការងារ សមធម៌ ប្រសិទ្ធភាព និង ចីរភាព។ ទន្ទឹមនឹងនេះការកំណត់យកអាទិភាពគន្លឹះ៥គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសគឺបច្ចេកវិទ្យាឌីជីថល សម្រាប់ឆ្លើយតបទៅនឹងបដិវត្តឧស្សាហកម្ម៤.០ និងបរិវត្តកម្មឌីជីថលនៃសេដ្ឋកិច្ច និងសង្គមកម្ពុជា ព្រមទាំងតម្រូវការក្នុងការលើកកម្ពស់ផលិតភាពសេដ្ឋកិច្ចដែលជាគ្រឹះ និងមធ្យោបាយដ៏សំខាន់ នៃការសម្រេចបានចក្ខុវិស័យកម្ពុជាឆ្នាំ២០៥០។
លោកស្រីប្រធាន បានដាក់ចេញនូវអាទិភាពចំនួន៥ ដើម្បីឱ្យដំណើរការការងារឱ្យមានប្រសិទ្ធភាពក្នុង ការអនុវត្តផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) ឆ្នាំ២០២៤ ដល់ឆ្នាំ២០២៨ ដូចខាងក្រោម៖ ១.ការធ្វើទំនើបកម្មស្ថាប័ន និងការកសាងរដ្ឋបាលទំនើប។ ២.ការពង្រឹងបទដ្ឋានបច្ចេកទេស និងការទទួលខុសត្រូវវិជ្ជាជីវៈ។ ៣.ការអភិវឌ្ឍធនធានមនុស្សនិងបណ្តុះស្មារតីមនសិការវិជ្ជាជីវៈ។ ៤.ការរៀបចំប្រព័ន្ធនិងយន្តការគ្រប់គ្រងលំហព័ត៌មាន។ ៥. ការបង្កើនភាពជាដៃគូប្រកបដោយបរិយាប័ន្ន និងស័ក្តិសិទ្ធភាព។
លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានលើកយកខ្លឹមសារ ធម្មនុញ្ញវិជ្ជាជីវៈអ្នកសារព័ត៌មានដល់ថ្នាក់ដឹកនាំនិងមន្ត្រីទាំងអស់និងបានផ្ដាំផ្ញើដល់មន្ត្រីរាជការទាំងអស់ ចូលរួមធ្វើផែនការសកម្មភាពប្រចាំខែប្រចាំឆ្នាំនៅតាមការិយាល័យនីមួយៗឱ្យបានគ្រប់ៗគ្នា ត្រូវតែដាក់នូវបញ្ហាប្រឈម ដំណោះស្រាយ និងសំណូមពរ ឱ្យត្រូវទៅនឹងគោលដៅដែលការិយាល័យនីមួយៗចង់បាន។ សម្រាប់ព័ត៌មានដែលបានផលិត និងផ្សព្វផ្សាយរួចរាល់អស់ហើយសូមជួយស៊ែរ និងឡាចឱ្យបានលឿនបំផុត ដើម្បីឱ្យព័ត៌មានទាំងអស់ទទួលបានជោគជ័យ។ ខិតខំអនុវត្តការងារបន្ថែមទៀតនៅក្នុងអង្គភាពឱ្យមានការរីកចម្រើន និងការទទួលខុសត្រូវខ្ពស់ទៅលើការងាររបស់ខ្លួន។ អត្ថបទលោក ធូ កែវមុន្នី-ពិនិត្យដោយអ៊ុមញឹប។
