ឧត្តមសេនីយ៍ទោ សោម ស៊ុន ផ្សព្វផ្សាយសភាពការណ៍ថ្មីៗ និងប្រគល់ភារកិច្ច ចាំបាច់មួយចំនួន ជូនដល់កងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ
(ខេត្តកំពង់ធំ)៖ នៅព្រឹកថ្ងៃទី២៧ ខែមករា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំកិច្ចប្រជុំផ្សព្វផ្សាយសភាពការណ៍ថ្មីៗ និងប្រគល់ភារកិច្ចចាំបាច់មួយចំនួន ជូនដល់កងកម្លាំងចំណុះទីបញ្ជាការតំបន់ប្រតិបត្តិការសឹករង។ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឧត្តមសេនីយ៍ទោ សោម ស៊ុន បានគូសបញ្ជាក់អំពីសភាពការណ៍ជាតិ សភាពការណ៍អន្តរជាតិ និងការអភិវឌ្ឍរីកចម្រើនថ្មីៗបន្ថែមទៀតរបស់ព្រះរាជាណាចក្រកម្ពុជា ក្នុងអាណត្តិទី៧ នៃរាជរដ្ឋាភិបាលថ្មី ដែលដឹកនាំដោយសម្ដេចមហាបវរធិបតី ហ៊ុន ម៉ាណែត កំពុងដំណើរការបោះជំហានយ៉ាងស្វាហាប់ឆ្ពោះទៅមុខ ដោយមានការគាំទ្រយ៉ាងពេញទំហឹងពីប្រជាជនកម្ពុជា និងកំពុងទទួលបានជោគជ័យថ្មីៗនៅលើឆាកអន្តរជាតិ ។
ឧត្តមសេនីយ៍ សោម ស៊ុន បានថ្លែងនូវការកោតសរសើរចំពោះមេបញ្ជាការគ្រប់បណ្ដាកងឯកភាព នាយការិយាល័យ ផ្នែកជំនាញគ្រប់ស្ថាប័ន ព្រមទាំងថ្នាក់ដឹកនាំគ្រប់លំដាប់ថ្នាក់ នាយទាហាន នាយទាហានរង និងពលទាហានទាំងអស់ ចំណុះបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានខិតខំប្រឹងប្រែងបំពេញភារកិច្ចសម្រេចបាន តាមផែនការ ដែលថ្នាក់លើ បានប្រគល់ជូន គួរជាទីមោទនៈ។
ឧត្តមសេនីយ៍ទោ សោម ស៊ុន បានដាក់បទបញ្ជាដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ត្រូវអនុវត្តនូវភារកិច្ចចាំបាច់មួយចំនួគឺ ទី១ .បន្តរៀបចំកងកម្លាំងនិងមធ្យោបាយគ្រប់គ្រាន់ ដើម្បីចូលរួមក្នុងសកម្មភាពបង្ក្រាបបទល្មើសនេសាទខុសច្បាប់នៅតំបន់បឹងទន្លេសាប ឱ្យមានប្រសិទ្ធភាព ។ ទី២. បន្តសកម្មភាពក្នុងការការពារទប់ស្កាត់និងបង្ក្រាបបទល្មើសធនធានធម្មជាតិ ឲ្យបាន ដោយត្រូវការពារមិនឱ្យមានការកាប់ទន្ទ្រានដីព្រៃរបស់រដ្ឋយកធ្វើជាកម្មសិទ្ធិកេីតឡេីងជាថ្មីទៀតបានជាដាច់ខាត និងការពារឲ្យបាន ផ្ទៃដីដែលបានដកហូតកន្លងមក មិនឲ្យធ្លាក់ដល់ដៃជនល្មើសបានឡេីយ។ និងទី៣. បន្តអប់រុំពង្រឹងតួនាទីភារកិច្ចរបស់កងយោធពលខេមរភូមិន្ទ ជូនដល់នាយទាហាន នាយទាហានរង និងពលទាហាន ដោយត្រូវគោរពឱ្យបានម៉ឺងម៉ាត់តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ។ ដាច់ខាត ការពារជាតិ សាសនាព្រះមហាក្សត្រ ការពាររាជរដ្ឋាភិបាលស្របច្បាប់ និងថែរក្សាឲ្យបាននូវសុខសន្តិភាព ដើម្បីឲ្យប្រទេសជាតិយេីងបន្តការអភិវឌ្ឍន៍រីកចម្រើន បន្ថែមទៀត ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
