ឯកឧត្តម ហាន កុសល ចុះពិនិត្យទីតាំងរៀបចំព្រឹត្តិការណ៍ជិះកង់ និងរត់ឆ្លងឧបសគ្គនៅប្រាសាទសំបូរព្រៃគុក ខេត្តកំពង់ធំ ក្រោមប្រធានបទ “ផ្លូវឆ្ពោះទៅរាជធានីឦសានបុរៈ ចេនឡាមុនសម័យអង្គរ” នាពេលខាងមុខនេះ
(កំពង់ធំ)÷ ឯកឧត្តម ហាន កុសល អភិបាលរងខេត្តកំពង់ធំ ដឹកនាំមន្ទីរពាក់ព័ន្ឋ អាជ្ញាធរក្រុង/ស្រុក/ឃុំ និងអាជ្ញាធរជាតិសំបូរព្រៃគុក បានអញ្ជើញចូលរួមក្នុងការចុះពិនិត្យទីតាំងរៀបចំព្រឹត្តិការណ៍ជិះកង់ និងរត់ឆ្លងឧបសគ្គនៅប្រាសាទសំបូរព្រៃគុក ខេត្តកំពង់ធំ ក្រោមប្រធានបទ “ផ្លូវឆ្ពោះទៅរាជធានីឦសានបុរៈ ចេនឡាមុនសម័យអង្គរ” នាពេលខាងមុខនេះ នៅបរិវេណប្រាសាទសំបូរព្រៃគុក ឃុំសំបូរណ៍ ស្រុកប្រាសាទសំបូរ ខេត្តកំពង់ធំ នាព្រឹកថ្ងៃទី២៣ ខែមិថុនា ឆ្នាំ២០២៦។
នៅក្នុងកម្មវិធីនេះឯកឧត្តម ហាន កុសល បានលើកឡើងថាដើម្បីចូលរួមអបអរសាទរខួបលើកទី៩ នៃការដាក់បញ្ចូល តំបន់ប្រាសាទសំបូរព្រៃគុកក្នុងបញ្ជីបេតិកភណ្ឌពិភពលោក (៨ កក្កដា ២០១៧ – ៨ កក្កដា ២០២៦) និងផ្សព្វផ្សាយតំបន់គោលដៅទេសចរណ៍វប្បធម៌ បេតិកភណ្ឌ ធម្មជាតិ ដើម្បីជំរុញកំណើនភ្ញៀវទេសចរនារដូវកាល បៃតង ក្រសួងទេសចរណ៍បានសហការជាមួយរដ្ឋបាលខេត្តកំពង់ធំ និងអាជ្ញាធរជាតិសំបូរព្រៃគុក ព្រមទាំងវិស័យឯកជន រៀបចំព្រឹត្តិការណ៍ជិះកង់ និងរត់ឆ្លងឧបសគ្គនៅប្រាសាទសំបូរព្រៃគុក ក្រោមប្រធានបទ “ផ្លូវឆ្ពោះទៅរាជធានីឦសានបុរៈចេនឡាមុនសម័យអង្គរ” ដែលនឹងប្រព្រឹត្តទៅនៅថ្ងៃទី៥ ខែកក្កដា ឆ្នាំ២០២៦ នាពេលខាងមុខនេះ។
ឯកឧត្តម ហាន កុសល អភិបាលរងខេត្តកំពង់ធំ បានបញ្ជាក់ថា សម្រាប់ការជិះកង់កញ្ចប់ទស្សនកិច្ចចម្ងាយ៣០គីឡូម៉ែត្រ វេលាម៉ោង៦:៣០នាទីព្រឹក ដោយចាប់ផ្តើមចេញដំណើរពីគល់ស្ពានស្ទឹងសែន (ទីរួមខេត្តកំពង់ធំ) ឆ្ពោះទៅប្រាសាទសំបូរព្រៃគុក និងមានរត់ឆ្លងឧបសគ្គចម្ងាយ៤២គីឡូម៉ែត្រ ២១គីឡូម៉ែត្រ និង៩គីឡម៉ែត្រ។ សម្រាប់ការចុះពិនិត្យមើលទីតាំងនាពេលនេះ គឺសមស្របទៅនឹងកន្លែងដែលមានសុវត្ថិភាព ធ្វើឱ្យកីឡាករកីឡាការិនីសម្រាកប្រកបដោយអនាម័យ និងមានផាសុខភាព។ អត្ថបទលោក ធូ កែវមុន្នី.ពិនិត្យដោយអ៊ុមញឹប។
