អភិបាលខេត្តកំពង់ធំ ជួបសំណេះសំណាល  និងជូនដំណើរ នាយទាហាន នាយទាហានរង នៃកងរាជអាវុធហត្ថខេត្តកំពង់ធំ ទៅបន្តហ្វឹកហាត់នៅមជ្ឈមណ្ឌលហ្វឹកហ្វឺន កងរាជអាវុធហត្ថភ្នំជុំសែនរីករាយ ខេត្តកំពង់ឆ្នាំង

(កំពង់ធំ) ៖ នៅថ្ងៃទី០៥ ខែមិថុនា ឆ្នាំ២០២៥ បញ្ជាការដ្ឋានកងរាជអាវុធហត្ថកំពង់ធំ ឯកឧត្ដម នួន ផារ័ត្ន អភិបាល នៃគណៈអភិបាលខេត្តកំពង់ធំ អញ្ជើញជាអធិបតីភាព ក្នុងពិធីសំណេះសំណាល  និងជូនដំណើរ នាយទាហាន នាយទាហានរង នៃកងរាជអាវុធហត្ថខេត្តកំពង់ធំ ទៅបន្តហ្វឹកហាត់នៅមជ្ឈមណ្ឌលហ្វឹកហ្វឺន កងរាជអាវុធហត្ថភ្នំជុំសែនរីករាយ ខេត្តកំពង់ឆ្នាំង ដើម្បីត្រៀមឈរផែន ដើរព្យុះហយាត្រាអបអរសាទរខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣~១៤ កក្កដា ២០២៥)។

 ក្នុងឱកាសនោះ ឯកឧត្ដម នួន ផារ័ត្ន អភិបាល នៃគណៈអភិបាល ខេត្តកំពង់ធំ បានកោតសរសើរដល់នាយទាហាន នាយទាហានរង នៃកងរាជអាវុធហត្ថកំពង់ធំ ទាំងអស់ក្នុងការខិតខំប្រឹងប្រែង  ហ្វឹកហាត់ ក៏ដូចជាចូលរួមយ៉ាងសកម្មក្នុងការ ការពារសន្តិសុខ សុវត្ថិភាព ជូនប្រជាពលរដ្ឋ និងការពារសង្គមជាតិ ។

ឯកឧត្ដម នួន ផារ័ត្ន បានបន្តទៀតថា សូមឱ្យប្អូនៗដែលសិក្ខាកាម ត្រូវខិតខំប្រឹងប្រែងរៀនសូត្រ ដើម្បីក្លាយខ្លួនទៅជាអាវុធហត្ថមានជំនាញ មានវិជ្ជាជីវៈច្បាស់លាស់ និងជាទំពាងស្នងឬស្សីដ៏ល្អ សម្រាប់បម្រើនិងការពារប្រទេសជាតិទាំងមូល។ ឆ្លៀតក្នុងឱកាសនោះ ឯកឧត្ដម បាននាំយកអង្ករចំនួន៥តោន និងថវិកា ចំនួន ១៥,០០០,០០០រៀល ជូនដល់នាយទាហាន នាយទាហានរង និងពលទាហាន ចំនួន៣០០នាក់ ម្នាក់ៗទទួលបាន ថវិកា៥០,០០០រៀល ។

 នាឱកាសនោះ លោក ឧត្តមសេនីយ៍ត្រី មាស យ៉ត មេបញ្ជាការ កងរាជអាវុធហត្ថខេត្ត បានធ្វើសេចក្ដីរាយការណ៍ ជូន ឯកឧត្ដម នួន ផារ័ត្ន អភិបាលខេត្ត  អំពីការហ្វឹកហាត់ដោយសង្ខេបរបស់កងរាជអាវុធហត្ថខេត្តកំពង់ធំ និងបានថ្លែងអំណរគុណយ៉ាងជ្រាលជ្រៅ ចំពោះ ឯកឧត្ដម ដែលបានចំណាយពេលវេលាដ៏មានតម្លៃអញ្ជើញមកសំណេះសំណាល និងបានឧបត្ថម្ភ អង្ករ ព្រមទាំងថវិកា ដល់នាយទាហាន នាយទាហានរង និងសិក្ខាកាមនៃកងរាជអាវុធហត្ថកំពង់ធំ។  អត្ថបទលោក ធូ កែវមុន្នី.ពិនិត្យដោយអ៊ុមញឹប។