សាខាកាកបាទក្រហមកម្ពុជាខេត្តកំពង់ធំ បាននាំយកអំណោយមនុស្សធម៌ជូនគ្រួសារដែលរងគ្រោះដោយអគ្គីភ័យលេបត្របាក់ផ្ទះមួយខ្នងអស់ទាំងស្រុង នៅស្រុកសន្ទុក
(កំពង់ធំ)÷ លោកជំទាវ លំ គន្ធារី ប្រធានស្ដីទីគណៈកម្មាធិការសាខាកាកបាទក្រហមកម្ពុជាខេត្តកំពង់ធំ និងអាជ្ញាធរមូលដ្ឋាន បានអញ្ជើញចូលរួមចុះសួរសុខទុក្ខ និងនាំយកអំណោយរបស់សាខាកាកបាទក្រហមកម្ពុជាខេត្តកំពង់ធំ និងអនុសាខាស្រុកសន្ទុក ផ្តល់ជូនដល់គ្រួសារដែលរងគ្រោះដោយភ្លើងឆេះផ្ទះ១ខ្នងអស់ទាំងស្រុង ស្ថិតនៅភូមិទីពោ ឃុំទីពោ ស្រុកសន្ទុក ខេត្តកំពង់ធំ នៅសៀលថ្ងៃទី០២ ខែមករា ឆ្នាំ២០២៥។
តាមរបាយការណ៍របស់លោកស្រី ឡេង សុខខី អភិបាលបាលរងស្រុកសន្ទុក បានបញ្ជាក់ថាមាន ករណីអគ្គីភ័យបណ្ដាលឱ្យឆេះផ្ទះប្រជាពលរដ្ឋមួយខ្នងអស់ទាំងស្រុង នៅថ្ងៃទី០១ ខែមករា ឆ្នាំ២០២៥ នៅវេលាម៉ោង២២ និង ៣៥នាទីយប់ ម្ចាស់ផ្ទះឈ្មោះ សែម ឆុំ ភេទប្រុស អាយុ៦១ឆ្នាំ និងបណ្តាលឱ្យខូចខាតទ្រព្យសម្បត្តិ និងសម្ភារៈ ផ្ទះឈើ ប្រក់ក្បឿង ជញ្ជាំងក្តា ទំហំ៦ម៉ែត្រx ៩ម៉ែត្រ ក្នុងនោះខូចខាតម៉ួតូ០១គ្រឿង ឯកសារប្លង់ដី សៀវភៅគ្រួសារ សៀវភៅស្នាក់នៅ អត្តសញ្ញាណបណ្ណ០២សន្លឹក តុ ទូ និងខោអាវមួយចំនួន លុយខ្មែរចំនួន២.០០០.០០០រៀល( ពីរលានរៀល) មូលហេតុ ឆេះពីភ្លើងចង្ក្រាន។ ករណីនេះបណ្តាលឱ្យមានរបួសមនុស្សចាស់០១នាក់ ឈ្មោះ ញ៉ក់ គីន ភេទស្រីអាយុ៩០ឆ្នាំ ត្រូវជាម្តាយម្ចាស់ផ្ទះត្រូវបានបញ្ជូនទៅមន្ទីរពេទ្យបង្អែកបារាយណ៏សន្ទុក ជាលទ្ធផលលោកយាយត្រូវបានមរណៈភាពហើយ។
ជាមួយគ្នានេះផងដែរលោកជំទាវ លំ គន្ធារី បានលើកឡើងថា ដោយមានការធ្វេសប្រហែស ធ្វើឱ្យបាត់បង់នៅទ្រព្យសម្បត្តិមួយចំនួន ដោយសារអគ្គីភ័យបានលេបត្របាក់ផ្ទះមួយខ្នងអស់ទាំងស្រុង។ ដូចនេះហើយក្នុងនាមជាអ្នកដឹកនាំខេត្តកំពង់ធំ បានចូលរួមសោកស្ដាយ និងនាំយកអំណោយផ្ដល់ជូន ដើម្បីលើកទឹកចិត្តដល់គ្រួសារដែលរងគ្រោះដោយភ្លើងឆេះផ្ទះនឱ្យមានស្មារតីរឹងមាំ និងប្រកបមុខរបរបន្តទៀតដើម្បីចិញ្ចឹមគ្រួសារឱ្យលក្ខណៈល្អប្រសើរ ទីណាមានទុក្ខលំបាក ទីនោះមានកាកបាទក្រហមកម្ពុជាចុះជួយដល់មូលដ្ឋាន។
លោកជំទាវប្រធានស្ដីទីគណៈកម្មាធិការសាខាកាកបាទក្រហមកម្ពុជាខេត្តកំពង់ធំ បានជំរុញលើកទឹកចិត្តបន្ថែមទៀត ដើម្បីឱ្យក្រុមគ្រួសារមានភាពរឹងមាំ អភិវឌ្ឍក្រុមគ្រួសារឱ្យមានការរីកចម្រើន លើសពីនេះសុំឱ្យបងប្អូនប្រជាពលរដ្ឋទាំងអស់ មេត្តាប្រុងប្រយ័ត្នខ្ពស់ មុនចេញដំណើរទៅណាមកណា ត្រូវតែពន្លត់ភ្លើងចង្ក្រាន ធូប ទៀន និងបិទកុងតាក់ចរន្តអគ្គិសនី ឱ្យបានត្រឹមត្រូវ ចៀសផុតពីគ្រោះថ្នាក់កើតឡើងជាយថាហេតុ។
គួរបញ្ជាក់ផងដែរថា អំណោយរបស់សាខាកាកបាទក្រហមកម្ពុជា និងអនុសាខាស្រុកសន្ទុកដែលបានផ្ដល់ជូនដល់គ្រួសាររងគ្រោះដោយភ្លើងឆេះផ្ទះរួមមាន÷អង្ករ មី ត្រីខ ទឹកត្រី ទឹកស៊ីវ មុង ភួយ សារុង ក្រមា ឆ្នាំង២ កន្ទេល១ តង់១ និងថវិកាមួយចំនួន។ ក្នុងនោះអំណោយអនុសាខាស្រុកសន្ទុកមានគ្រឿងឧបភោគបរិភោគ និងថវិការមួយចំនួនទៀតផងដែរ។ អត្ថបទលោក ធូ កែវមុន្នី-ពិនិត្យដោយអ៊ុមញឹប ។
