អភិបាលស្រុកស្ទោង បានថ្លែងអំណរគុណលោក ហូប វន្នី និងលោកស្រី សួន ស្រី បានឧបត្ថម្ភនូវគ្រឿងឧបភោគបរិភោគ និងថវិកាដល់រដ្ឋបាលស្រុកស្ទោង ដើម្បីធ្វើកិច្ចការមនុស្សធម៌ ជាមួយពលរដ្ឋងាយរងហានិភ័យ ចាស់ជរា និងជនពិការ

(កំពង់ធំ)÷ អភិបាលស្រុកស្ទោង បានថ្លែងអំណរគុណយ៉ាងជ្រាលជ្រៅបំផុតដល់លោក ហូប វន្នី និងលោកស្រី សួន ស្រី ព្រមទាំងបុត្រធីតា និងបងប្អូនទាំងអស់ដែលបាន ឧបត្ថម្ភ គាំទ្រនូវគ្រឿងឧបភោគបរិភោគនិងថវិកាដល់រដ្ឋបាលស្រុកស្ទោង ដើម្បីធ្វើកិច្ចការមនុស្សធម៌ជាមួយពលរដ្ឋងាយរងហានិភ័យ ចាស់ជរានិងជនពិការ លោក សាយ គឹមឡម បានថ្លែងអំណរគុណដូច្នេះនៅក្នុងឱកាសដែលលោកនិងសហការី ព្រមទាំងលោក ហូប វន្នី និងភរិយាព្រមទាំងបុត្រធីតានិងបងប្អូន បានអញ្ជើញជាអធិបតីភាពក្នុងពិធីចែកអំណោយមនុស្សធម៌ជូនដល់ចាស់ជរា ជនពិការ និងគ្រួសារងាយរងហានិភ័យចំនួន៩៩គ្រួសារ នៅគេហដ្ឋានម្ចាស់ទាន ក្នុងភូមិត្នោត ឃុំកំពង់ចិនជើង ស្រុកស្ទោង ខេត្តកំពង់ធំ កាលពីរសៀលថ្ងៃទី៣០ ខែវិច្ឆិកា ឆ្នាំ២០២៥។

ជាមួយគ្នានេះលោកបានកោតសរសើរខ្ពស់នូវស្មារតី និងបេះដូងមនុស្សធម៌របស់ម្ចាស់ទាន ដែលបានយកចិត្តទុកដាក់ ចូលរួមសហការជាមួយអាជ្ញាធរជាពិសេសជាមួយរដ្ឋបាលស្រុកស្ទោង ក្នុងធ្វើកិច្ចការមនុស្សធម៌ជាមួយពលរដ្ឋនៅក្នុងមូលដ្ឋាន ដែលជាផ្នែកមួយក្នុងការចូលរួមកាត់បន្ថយភាពក្រីក្រនៅក្នុងស្រុកស្ទោង ជាពិសេសជាមួយរាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសប់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាអាណត្តិទី៧នេះ។

ឆ្លៀតក្នុងឱកាសនេះដែរ លោកអភិបាលស្រុកស្ទោង ក៏បានណែនាំនិងលើកទឹកចិត្តដល់អាជ្ញាធរមូលដ្ឋាន ត្រូវខិតខំផ្ដល់សេវាឱ្យកាន់តែល្អប្រសើរឡើង ជាពិសេសយកចិត្តទុកដាក់ខ្ពស់ថែមទៀតដល់សុខទុក្ខ សុខុមាលភាពជីវភាពរស់នៅរបស់ប្រជាពលរដ្ឋក្នុងមូលដ្ឋាន មានចាស់ជរា ពលរដ្ឋងាយរងហានិភ័យ និងជនពិការឱ្យកាន់តែប្រសើរឡើងថែមទៀត។

សូមបញ្ជាក់ថាគ្រួសារទាំង៩៩គ្រួសារ ក្នុង១គ្រួសារៗទទួលបាននូវ÷ ថវិកាចំនួន ៤ម៉ឺនរៀល អង្ករ១បេ ទឹកសុទ្ធ១យួរ មី១កេស ទឹកត្រី១យួរ និងទឹកស៊ីអ៊ីវ១យួរផងដែរ។ អត្ថបទរដ្ឋបាលស្រុកស្ទោង-ពិនិត្យដោយអ៊ុមញឹប។