មន្ទីរព័ត៌មានខេត្តកំពង់ធំ ចុះអនុវត្តយុទ្ធនាការប្រឆាំងព័ត៌មានមិនពិត ដើម្បីពង្រឹងការយល់ដឹងសាធារណៈ នៅស្រុកតាំងគោក
(កំពង់ធំ)៖ ព្រឹកថ្ងៃទី ២៨ ខែវិច្ឆិកា ឆ្នាំ ២០២៥ មន្ទីរព័ត៌មានខេត្តកំពង់ធំ ដឹកនាំដោយលោកស្រី ង៉ែត ណារីន ប្រធានមន្ទីរ បានចុះអនុវត្ត យុទ្ធនាការផ្សព្វផ្សាយប្រយុទ្ធប្រឆាំងព័ត៌មានក្លែងក្លាយ នៅស្រុកតាំងគោក ដោយសហការជិតស្និទ្ធជាមួយ លោក យ៉ង់ វិសាល អភិបាលរងស្រុកតាំងគោក តំណាងលោក ហាក់ ម៉ុងហួត អភិបាលស្រុកតាំងគោក។
កម្មវិធីនេះមានការចូលរួមយ៉ាងសកម្មពីមន្រ្តីរាជការ មន្ត្រីសាលាស្រុក កងកម្លាំងសន្តិសុខទាំងបី នាយកសាលា គ្រូ–អ្នកគ្រូ នាយប៉ុស្តិ៍ ប្រជាការពារ ប្រជាពលរដ្ឋ និងសិស្សានុសិស្ស សរុបចំនួន ២៥៦ នាក់។
ក្នុងឱកាសនោះ លោក យ៉ង់ វិសាល បានលើកឡើងថា ព័ត៌មានក្លែងក្លាយក្លាយជាបញ្ហាប្រឈមសំខាន់មួយលើពិភពលោក បណ្ដាលឱ្យកើតមានអំពើហិង្សា សកម្មភាពស្អប់ខ្ពើម ការរើសអើង និងប៉ះពាល់ដល់ស្ថេរភាពនយោបាយ–សង្គម។ ដូច្នេះ អាជ្ញាធរស្រុកសម្រេចគាំទ្រយុទ្ធនាការនេះ និងអំពាវនាវឱ្យមានការចូលរួមផ្ដល់អត្ថប្រយោជន៍ជាក់ស្តែងក្នុងការទប់ស្កាត់ព័ត៌មានមិនពិតឱ្យទូលំទូលាយ។
ទន្ទឹមនៅនេះដែរ លោកស្រី ង៉ែត ណារីន បានអំពាវនាវឱ្យអ្នកចូលរួមទាំងអស់ បន្តចូលរួមផ្សព្វផ្សាយការយល់ដឹងត្រឹមត្រូវ និង “និយាយថាទេ ចំពោះព័ត៌មានក្លែងក្លាយ”។ លោកស្រីបញ្ជាក់ថា យុទ្ធនាការនេះ គឺជាការផ្តួចផ្តើមរបស់ក្រសួងព័ត៌មាន និងត្រូវបានអនុវត្ត ទូទាំងប្រទេសនៅរាជធានី–ខេត្តទាំងអស់។ហើយក្នុងរយៈពេលមួយខែកន្លងមក មន្ទីរព័ត៌មានខេត្តកំពង់ធំ បានសហការជាមួយអាជ្ញាធរ និងស្ថាប័នពាក់ព័ន្ធក្នុងការចុះផ្សព្វផ្សាយតាមក្រុង ស្រុក សហគមន៍ និងសាលារៀនជាច្រើន។ ការចូលរួមយ៉ាងសកម្មរបស់ភាគីទាំងអស់ បានធ្វើឱ្យយុទ្ធនាការនេះទទួលបានលទ្ធផលល្អ ប្រកបដោយជោគជ័យជាបន្តបន្ទាប់។ អត្ថបទ លោក ធូ កែវមុន្នី.ពិនិត្យដោយអ៊ុមញឹប។
