ឧត្ដមសេនីយ៍ទោ សោម ស៊ុន ដឹកនាំកិច្ចប្រជុំ ពង្រឹងតួនាទីភារកិច្ច និងការអនុវត្តន៍វិធានការកំណែទម្រង់របស់កងយោធពលខេមរភូមិន្ទ ស្របតាមសភាពការណ៍ថ្មី
ខេត្តកំពង់ធំ៖ នៅរសៀលថ្ងៃទី២៦ ខែវិច្ឆិកា ឆ្នាំ២០២៥ ឧត្ដមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ យោធភូមិភាគទី៤ បានដឹកនាំកិច្ចប្រជុំពង្រឹងតួនាទី ភារកិច្ច របស់កងយោធពលខេមរភូមិន្ទ និងផ្សព្វផ្សាយវិធានការសំខាន់ៗក្នុងការអនុវត្តន៍វិធានការកំណែទម្រង់កងយោធពលខេមរភូមិន្ទ ស្របតាមសភាពការណ៍ថ្មី ដោយមានការចូលរួមពីថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ មេបញ្ជាការអង្គភាព និងស្ថាប័នជំនាញដែលមានការពាក់ព័ន្ធ ។ ដែលកិច្ចប្រជុំនេះប្រព្រឹត្តិទៅនៅទីបញ្ជការតំបន់ប្រតិបត្តិការសឹករងកំពង់ធំ ។
លោកវរសេនីយ៍ទោ ស៊ុន សាម៉ុន នាយការិយាល័យទី១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងរាយការណ៍អំពីការគ្រប់គ្រងកម្លាំង, រចនាសម្ព័ន្ធចាត់តាំង និងការអនុវត្តន៍លក្ខន្តិកៈ បទវិន័យទូទៅរបស់កងយោធពលខេមរភូមិន្ទ ព្រមទាំងការអនុវត្តន៍សេចក្ដីណែនាំលេខ០០៣ របស់ក្រសួងការពារជាតិ នាពេលកន្លងទៅ ដេីម្បីដាក់ជូនអង្គប្រជុំវាយតម្លៃ និងពិភាក្សាផងដែរ ។
ឧត្ដមសេនីយ៍ទោ សោម ស៊ុន បានថ្លែងនូវការកោតសរសើរចំពោះកិច្ចខិតខំប្រឹងប្រែងរបស់នាយទាហាន នាយទាហានរង និងពលទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ នាពេលកន្លងមក ក្នុងការអនុវត្តន៍តាមលក្ខន្តិកៈ និងបទវិន័យទូទៅសម្រាប់កងយោធពលខេមរភូមិន្ទបានយ៉ាងល្អប្រសើរ ។ ព្រមជាមួយនោះយោធិនគ្រប់រូបបានត្រៀមខ្លួនរួចជាស្រេចអនុវត្តន៍បទបញ្ជា ក្នុងភារកិច្ចការពារបូរណភាពទឹកដី ។ ដោយឡែកកងកម្លំាងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានចូលរួមចំណែកយ៉ាងសកម្មក្នុងការអនុវត្តន៍នូវគោលនយោបាយភូមិ ឃុំ សង្កាត់មានសុវត្ថិភាព និងការអនុវត្តន៍ប្រកបដោយស្មារតីទទួលខុសត្រូវខ្ពស់ និងទទួលបានលទ្ធផលល្អប្រសើរ ក្នុងការអនុវត្តន៍បទបញ្ជាការពារ ទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងខេត្តកំពង់ធំ ។
ឧត្ដមសេនីយ៍ទោ សោម ស៊ុន បានណែនាំដល់ថ្នាក់ដឹកនាំ និង មេបញ្ជាការគ្រប់បណ្តាកងឯកភាព និងស្ថាប័នជំនាញដែលមានការពាក់ព័ន្ធ ត្រូវអនុវត្តន៍ឲ្យមានប្រសិទ្ធភាព នូវវិធានការកំណែទម្រង់កងយោធពលខេមរភូមិន្ទ ស្របតាមសភាពការណ៍ថ្មី ។ ដោយឡែកចំពោះមុខនេះ គ្រប់បណ្តាកងឯកភាព និងស្ថាប័នទាំងអស់ត្រូវគ្រប់គ្រងកម្លាំង គ្រឿងបំពាក់ មធ្យោបាយគ្រប់គ្រាន់ និងពង្រឹងតួនាទី ភារកិច្ច របស់កងយោធពលខេមរភូមិន្ទ ត្រូវមានឆន្ទៈមោះមុត សាមគ្គីវិន័យល្អ ហ៊ានធ្វើពលកម្មដេីម្បីបុព្វហេតុជាតិ សាសនា ព្រះមហាក្សត្រ និងការពារបូរណភាពទឹកដីមិនឲ្យខ្មាំងសត្រូវឈ្លានពានបានជាដាច់ខាត។ អត្ថបទតំបន់សឹករងកំពង់ធំ ពិនិត្យដោយលោក ធូ កែវមុន្នី
