អភិបាលស្រុកស្ទោង លើកទឹកចិត្តកសិករឱ្យចូលរួមថវិកាសមាជិកភាព ដើម្បីបានអត្ថប្រយោជន៍ និងនិរន្តរភាពទំនប់ក្រាយ

(កំពង់ធំ)÷ លោកអភិបាលស្រុកស្ទោងលើកទឹកចិត្តកសិករឱ្យចូលរួមថវិកាសមាជិកភាពដើម្បីបានអត្ថប្រយោជន៍និរន្តរភាពទំនប់ក្រាយ លោក សាយ គឹមឡម បានលើកទឹកចិត្តដូច្នេះនៅក្នុង កិច្ចប្រជុំស្ដីពីការណែនាំអំពីគម្រោងកម្មវិធីការគ្រប់គ្រងធនធានទឹក និងការផ្លាស់ប្ដូរកសិកម្មនៅកម្ពុជា (ទំនប់ក្រាយ)នៅឃុំកំពង់ចិនជើង និងឃុំម្សាក្រង កាលពីថ្ងៃទី២៦ ខែវិច្ឆិកា ឆ្នាំ២០២៥។

លោកបានសង្កត់ធ្ងន់ថា ដើម្បីឱ្យគម្រោង ទំនប់ក្រាយឆាប់បានអនុវត្តកសាងតាមផែនការកំណត់ ដូច្នេះប្រជាកសិករដែលជាសមាជិកនៃគម្រោងត្រូវរួសរាន់បង់ថវិកា សមាជិកភាពតាមការឯកភាព និងកិច្ចសន្យាដើម្បីបានថវិការគ្រប់គ្រាន់ បានទាន់ពេលវេលា បម្រើផលប្រយោជន៍កសិករផ្ទាល់ ជាពិសេសទទួលបាននូវទឹក សម្រាប់ស្រោចស្រពស្រែស្រូវប្រាំងរបស់ខ្លួនដែលចំណាយថវិកាតិច និងទទួលបាននូវលទ្ធផលច្រើន ដោយកសិករគ្រាន់តែបើកទ្វារបញ្ចូលទឹកស្រែស្រោចស្រពស្រែរបស់ខ្លួនដោយពុំចាំបាច់ប្រើម៉ាស៊ីនបូមឡើយដោយសារប្រព័ន្ធគម្រោងទំនប់ក្រាយនេះមាននីវូខ្ពស់ជាងដីស្រែ។

ទន្ទឹមនឹងនេះលោកក៏បានអំពាវនាវឱ្យបោះឆ្នោតបង្កើតនូវគណៈកម្មការការគ្រប់គ្រងទឹក ដោយជ្រើសរើសចេញពីបុគ្គលដែលមានសក្តានុពល មានប្រជាប្រិយភាព មានទំនួលខុសត្រូវនិងជាបុគ្គលដែលលះបង់ខ្ពស់ ដែលអាចគ្រប់គ្រងបែងចែកនិងប្រើប្រាស់ទឹកប្រកបដោយគុណភាពមានការសន្សំសំចៃបានត្រឹមត្រូវ។

សូមបញ្ជាក់ពីគម្រោងសាងសង់ទំនប់ក្រាយ ប្រើប្រាស់ប្រភពទឹកស្ទឹងស្ទោង ហើយអាចស្រោចស្រពផ្ទៃដីប្រមាណ៩៤២ហិកតា និងមានគ្រួសារទទួលផសរុបចំនួន១,000 គ្រួសារ នៃភូមិចំនួន៧ ក្នុងឃុំកំពង់ចិនជើង និងឃុំម្សាក្រង ដែលគ្រោងប្រើប្រាស់ថវិកាសរុបប្រមាណ២,៥លានដុល្លារ។ អត្ថបទរដ្ឋបាលស្រុកស្ទោង ពិនិត្យដោយលោក ធូកែវមុន្នី