ពិធីចែកសម្ភារសិក្សា និងមធ្យោបាយធ្វើដំណើរជូនដល់កុមារ ស្ថិតនៅសាលាបឋមសិក្សា និងអនុវិទ្យាល័យបញ្ញាជី ក្នុងគម្រោងកិច្ចអន្តរាគមន៍ស្នូល ២០២៥ របស់ខេត្តកំពង់ធំ

(កំពង់ធំ)៖ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំពិធីចែកសម្ភារសិក្សា និងមធ្យោបាយធ្វើដំណើរ ជូនកុមារចំនួន ៦០នាក់ មកពីស្រុកសន្ទុក និងស្រុកស្ទោង ក្នុងខេត្តកំពង់ធំ គម្រោងកិច្ចអន្តរាគមន៍ស្នូល ឆ្នាំ២០២៥ ដើម្បីគាំពារ និងទប់ស្កាត់ពលកម្មកុមារ ពិសេសក្នុងវិស័យសិប្បកម្មផលិតឥដ្ឋ-ក្បឿង។

ពិធីនេះប្រព្រឹត្តក្រោមអធិបតីភាព លោកជំទាវ សួស រដ្ឋារី តំណាងឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពី ឯកឧត្តម លី វេត អភិបាលរងខេត្តកំពង់ធំ មន្ទីរពាក់ព័ន្ធ ម្ចាស់សិប្បកម្ម អាណាព្យាបាល និងសិស្សានុសិស្ស ប្រារព្ធនៅសាលាបឋមសិក្សា និងអនុវិទ្យាល័យបញ្ញាជី ស្ថិតនៅភូមិបញ្ញាជី ឃុំត្បូងក្រពើ ស្រុកសន្ទុក ខេត្តកំពង់ធំ។

លោក អៀង សុភាព ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ធំ បានបញ្ជាក់ថា គម្រោងកិច្ចអន្តរាគមន៍ស្នូល ដើម្បីទប់ស្កាត់ពលកម្មកុមារ ក្នុងវិស័យសិប្បកម្ម និងកសិឧស្សាហកម្ម ត្រូវបានអនុវត្តតាំងពីឆ្នាំ២០១៧ ដោយជ្រើសរើសកុមារគោលដៅដែលឪពុកម្តាយធ្វើការនៅសិប្បកម្មឥដ្ឋ-ក្បឿង ដើម្បីបង្ការ​ការ​បោះបង់ការសិក្សា កុមារទាំងនេះ ត្រូវបានគាំទ្រជាសម្ភារសិក្សា សម្លៀកបំពាក់ កង់ និងការសិក្សាបំប៉ន ៣ ខែ រួមទាំងបណ្តុះបណ្តាលបំណិនជីវិត និងជំនាញវិជ្ជាជីវៈ ព្រមទាំងផ្តល់ពូជមាន់ និងបន្លែ ដើម្បីជួយលើកស្ទួយជីវភាពគ្រួសារ។

ឯកឧត្តម លី វេត បានមានប្រសាសន៍ថា រាជរដ្ឋាភិបាលបានយកចិត្តទុកដាក់ខ្ពស់លើការអភិវឌ្ឍទីផ្សារការងារ ឲ្យមានភាពធន់ ការងារល្អ និងប្រាក់ចំណូលខ្ពស់ សម្រាប់ប្រជាពលរដ្ឋ ការយកចិត្តទុកដាក់នេះ មានគោលបំណងលើកកម្ពស់លក្ខខណ្ឌការងារ និងសុខុមាលភាពនិយោជិកទាំងក្នុង និងក្រៅប្រព័ន្ធ ព្រមទាំងលើកកម្ពស់ជីវភាពប្រជាពលរដ្ឋ ជាមួយនឹងការជំរុញឱ្យធុរកិច្ចមានភាពរស់រវើក និងវិនិយោគប្រកបដោយចីរភាព ដើម្បីឆ្លើយតបទៅសេដ្ឋកិច្ច សង្គម និងទីផ្សារការងារ។

លោកជំទាវ សួស រដ្ឋារី បានលើកឡើងថា ការគាំទ្រដល់ក្រសួង និងមន្ទីរការងារ ក្នុងការអនុវត្តគម្រោងនេះ បង្ហាញពីការយកចិត្តទុកដាក់ខ្ពស់ក្នុងការអនុវត្តច្បាប់ និងគោលនយោបាយពាក់ព័ន្ធនឹងការទប់ស្កាត់ពលកម្មកុមារ និងការការពារកុមារ។ លោកជំទាវបានបញ្ជាក់ថា ពលកម្មកុមារ​ជា​បញ្ហាសកល ដែលបណ្តាលមកពីកត្តាអប់រំសង្គម ការអនុវត្តច្បាប់ និងអំពើល្មើស ហើយបង្កផលប៉ះពាល់ធ្ងន់ធ្ងរ​ដល់អនាគតកុមារ។ ដូច្នេះ ការទប់ស្កាត់បញ្ហានេះ ត្រូវការការសহការពីគ្រប់ភាគី ព្រមទាំងអាជ្ញាធរ ម្ចាស់សិប្បកម្ម អាណាព្យាបាល និងកុមារផងដែរ ដោយមានទំនួលខុសត្រូវរួម។

នៅក្នុងឱកាសនោះផងដែរ លោកជំទាវ បានអំពាវនាវឲ្យមានការចូលរួមទប់ស្កាត់ពលកម្មកុមារ នៅមូលដ្ឋាន ដូចតទៅ៖
ទី១. នៅសាលារៀន គ្រូបង្រៀនត្រូវមានតួនាទីតាមដាន និងឃ្លាំមើល សិស្សកុំឲ្យបោះបង់ការសិក្សា ដើម្បីទៅធ្វើការ។
ទី២. អាជ្ញាធរភូមិ ឃុំ ត្រូវធ្វើការគ្រប់គ្រង និងតាមដានតាមខ្នងផ្ទះ ដើម្បីទប់ស្កាត់កុមារ មិនឲ្យចូលទៅកន្លែងធ្វើការ ពិសេសក្នុងវិស័យសិប្បកម្មផលិតឥដ្ឋ។
ទី៣. អាណាព្យាបាល ដែលធ្វើការ ឬស្នាក់នៅក្នុងបរិវេណសិប្បកម្ម មិនត្រូវនាំកូនចូលទៅក្នុងបរិវេណផលិតកម្ម ឬប្រើប្រាស់ពលកម្មកុមារឡើយ ហើយត្រូវបញ្ជូនកូនឱ្យទៅរៀនឱ្យបានគ្រប់ៗគ្នា។
ទី៤. និយោជក ឬម្ចាស់សិប្បកម្ម ត្រូវមានការប្រុងប្រយ័ត្ន មិនជ្រើសរើសកុមារក្រោមអាយុ ១៥ឆ្នាំ ឲ្យចូលធ្វើការ។ ដោយឡែក ក្រុមអធិការកិច្ចការងារ ត្រូវចុះត្រួតពិនិត្យលក្ខខណ្ឌការងារ និងទប់ស្កាត់មិនឲ្យកុមារ ចូលធ្វើការនៅកន្លែងផលិតកម្ម។ អត្ថបទ-រូបភាពដោយ ចន្ថា បុណ្យឫទ្ធិ.ពិនិត្យដោយអ៊ុមញឹប។