ឧត្តមសេនីយ៍ទោ សោម ស៊ុន តំណាងឯកឧត្តម នួន ផារ័ត្ន ប្រធានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ ទៅពិនិត្យទីតាំងដីសម្រាប់សាងសង់ផ្ទះថ្មី នៅក្នុងមណ្ឌលអភិវឌ្ឍន៍ មរតកតេជោធិបតីថ្លុកព្រីង ជូនអតីតយុទ្ធជន ដែលគ្មានដី គ្មានផ្ទះ ចំនួន ៣៥គ្រួសារ ថ្មីបន្ថែមទៀត
ខេត្តកំពង់ធំ៖ ដោយអនុវត្តតាមបទបញ្ជារបស់ឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធានប្រចាំការ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា ។ នៅព្រឹកថ្ងៃទី ១៩ ខែឧសភា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន សមាគមអតីតយុទ្ធជន និងនិវត្តជនកម្ពុជា ខេត្ត តំណាងឯកឧត្តម នួន ផារ័ត្ន អភិបាលខេត្ត ប្រធានសមាគមអតីតយុទ្ធជន និងនិវត្តជន ខេត្តកំពង់ធំ អមដំណើរដោយលោកជុំ វិរៈ អភិបាលរងស្រុកសន្ទុកបានដឹកនាំសហការីទៅពិនិត្យស្ថានភាពទីតាំងដីជាក់ស្ដែងសម្រាប់ដំណើរការសាងសង់ផ្ទះថ្មី អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធាន សមាគមអតីតយុទ្ធជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់អតីតយុទ្ធជន ចំនួន ៣៥ គ្រួសារថ្មីទៀត នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោ អធិបតីថ្លុកព្រីង ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ ។
ឧត្តមសេនីយ៍ទោ សោម ស៊ុន បានបញ្ជាក់ថា៖ កន្លងទៅនៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីងនេះ សម្ដេចតេជោ ហ៊ុន សែន និងសម្តេចមហាបវរធិបតីហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម រួមជាមួយអាជ្ញាធរដែនដី និងគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានដំណើរការសាងសង់ផ្ទះនិងផ្ដល់ដីសម្បទានសង្គមកិច្ចជូនបងប្អូនអតីតយុទ្ធជន ដែលគ្មានដី គ្មានផ្ទះ បានចំនួន ២០៦គ្រួសាររួចមកហើយ ដោយក្នុងនោះមាន ១៤១ គ្រួសារ ទទួលបានដីក្នុងមួយគ្រួសារមួយហិកតាកន្លះ ក្នុងមួយគ្រួសារ ហើយបងប្អូនបានរស់នៅអស់រយៈពេល ៥ ឆ្នាំមកហើយ ។ ដោយឡែក ៦៥ គ្រួសារទៀត ទទួលបានដីក្នុងមួយគ្រួសារ មួយហិកតា ហើយបានមករស់នៅលើទីតាំងនេះជិតមួយឆ្នាំមកហើយ ។
ឧត្តមសេនីយ៍ទោ សោម ស៊ុន បានគូសបញ្ជាក់បន្ថែមទៀតថា៖ ថ្ងៃនេះ ដើម្បីដោះស្រាយជូនអតីតយុទ្ធជន ដែលគ្មានដី គ្មានផ្ទះ ចំនួន ៣៥ គ្រួសារទៀត នៅខេត្តកំពង់ធំ សម្ដេចតេជោ ប្រធានសមាគមអតីតយុទ្ធជន និងនិវត្តជនកម្ពុជា បានអនុញ្ញាតឱ្យឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិ គន់ គីម ដើម្បីសហការជាមួយអាជ្ញាធរដែនដី ត្រៀមរៀបចំចាត់ចែងដំណើរការសាងសង់ផ្ទះថ្មី និងរៀបចំដីសម្បទានសង្គមកិច្ចនៅក្នុងមណ្ឌលអភិវឌ្ឍន៍អតីតយុទ្ធជននេះ ជូនពួកគាត់បន្ថែមទៀត ដើម្បីបានរស់នៅសមរម្យក្នុងការកសាងជីវភាពថ្មី។
ឧត្តមសេនីយ៍ទោ សោម ស៊ុន ក្នុងនាមឯកឧត្តម នួន ផារ័ត្ន ប្រធានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែត និងលោកជំទាវ ដែលតែងតែបានយកចិត្តទុកដាក់ខ្ពស់បំផុតដល់សុខទុក្ខ និងជីវភាពរស់នៅជូនបងប្អូនអតីតយុទ្ធជន នៅទូទាំងប្រទេស និយាយរួម និងនិយាយដោយឡែកនៅខេត្តកំពង់ធំផងដែរ និងសូមគោរពជូនពរសម្ដេច និងលោកជំទាវ សូមទទួលបាននូវពុទ្ធពរទាំង ៤ ប្រការកុំបីឃ្លៀងទៀតឡើយ ។អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
