ប្រធានសមាគមអតីតយុទ្ធជនកម្ពុជា ខេត្តកំពង់ធំ ត្រួតពិនិត្យការដ្ឋានសាងសង់ទីស្នាក់ការសមាគមអតីតយុទ្ធជន នៅខេត្តកំពង់ធំ
(ខេត្តកំពង់ធំ)៖ នៅរសៀលថ្ងៃទី១២ ខែឧសភា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី ទៅពិនិត្យការដ្ឋានសាងសង់ទីស្នាក់ការសមាគមអតីតយុទ្ធជនកម្ពុជា ខេត្តកំពង់ធំ ដែលកំពុងដំណើរការសាងសង់ នៅលើទីតាំងស្ថិតនៅភូមិត្រពាំងចំបក់ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
លោក យុន យឿត ប្រធានក្រុមជាងសាងសង់ទីស្នាក់ការសមាគមអតីតយុទ្ធជនកម្ពុជាខេត្តកំពង់ធំ បានបញ្ជាក់ថា គម្រោងនៃការសាងសង់ទីស្នាក់ការសមាគមអតីតយុទ្ធជន នៅខេត្តកំពង់ធំ មានទំហំ ជាង ៣១៨ ម៉ែត្រការ៉េ ហើយគិតមកដល់ថ្ងៃនេះការសាងសង់បានប្រមាណជាង ២០% ហើយ ហើយគ្រោងនឹងត្រូវបញ្ចប់ការសាងសង់រួចរាល់នៅមុនបំណាច់ឆ្នាំ២០២៥ ខាងមុខនេះ។
ឧត្តមសេនីយ៍ទោ សោម ស៊ុន បានគោរពថ្លែងអំណរគុណសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម ដែលបានខិតខំប្រឹងប្រែងរកថវិកា ពីសប្បុរសជននានា ដើម្បីដំណើរការសាងសង់ទីស្នាក់ការសមាគមអតីតយុទ្ធជននៅខេត្តកំពង់ធំ នឹងបានសូមគោរពថ្លែងអំណរគុណចំពោះឯកឧត្តម នួន ផារ័ត្ន អភិបាលខេត្តកំពង់ធំ និងក្រសួងស្ថាប័នមានការពាក់ព័ន្ធនានា ដែលបានផ្ដល់ដីសម្រាប់ដំណើរការសាងសង់ទីស្នាក់ការសមាគមអតីតយុទ្ធជនកម្ពុជាខេត្តកំពង់ធំ នៅពេលនេះ។
ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ ក៏បានស្នើសុំដល់ក្រុមវិស្វករ និងជាងសំណង់ របស់គណៈកម្មាធិការកណ្ដាលសមាគមអតីតយុទ្ធជនកម្ពុជា មេត្តាធ្វើការសាងសង់ឲ្យមានគុណភាព និងសោភ័ណភាពល្អ ស្របតាមលក្ខណៈបច្ចេកទេស និងពេលវេលាដែលបានកំណត់ ដើម្បីជាប្រយោជន៍សម្រាប់បម្រើឲ្យនិរន្តរភាពការងារសមាគមអតីតយុទ្ធជននៅខេត្តកំពង់ធំ បានយូរអង្វែងតទៅ។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
