អភិបាលស្រុកស្ទោង លើកទឹកចិត្តអាជ្ញាធរមូលដ្ឋាននិងពលរដ្ឋត្រូវបន្តពហិកាទំនិញប្រទេសសៀម
(កំពង់ធំ) ÷ លោកអភិបាលស្រុកស្ទោងលើកទឹកចិត្តអាជ្ញាធរមូលដ្ឋាននិងពលរដ្ឋត្រូវបន្តពហិកាទំនិញប្រទេសសៀម លោក សាយ គឹមឡម បានលើកទឹកចិត្តដូច្នេះក្នុងឱកាសដែលលោកអញ្ជើញចុះជួបសំណេះសំណាលសួរសុខទុក្ខនិងឧបត្ថម្ភស្បៀងដល់គ្រួសារកងទ័ព និងជនភៀសសឹកដែលកំពុងបន្តស្នាក់នៅក្នុងភូមិប្រាសាទ ឃុំចំណាលើស្រុកស្ទោងខេត្តកំពង់ធំ កាលពីព្រឹកថ្ងៃទី២៤ ខែមេសាឆ្នាំ ២០២៦។
លោកបានសង្កត់ធ្ងន់ថា នៅពេលនេះស្ថានភាពនៅព្រំដែនខ្មែរសៀមមិនទាន់មានភាពប្រក្រតីនៅឡើយទេ ហេតុនេះហើយអាជ្ញាធរមូលដ្ឋាន និងប្រជាពលរដ្ឋគ្រប់រូបត្រូវតែបន្តស្ដាប់និងជឿជាក់យុទ្ធសាស្ត្រនិងគោលនយោបាយរបស់រាជរដ្ឋាភិបាល ដែលមានសម្ដេចមហាបវរធិបតីហ៊ុន ម៉ាណែត ជាប្រមុខរាជរដ្ឋាភិបាលអាណត្តិទី៧នេះ ក្នុងការដោះស្រាយបញ្ហាព្រំដែន ដើម្បីសុខសុវត្ថិភាពប្រជាពលរដ្ឋ និងបូរណភាពទឹកដីនៃយើង។
ទន្ទឹមនឹងនេះលោក សាយ គឹមឡម បានណែនាំបន្ថែមទៀតដល់បងប្អូនវីរៈកងទ័ពនិងគ្រួសារព្រមទាំង ជនភៀសសឹក ដែលកំពុងបន្តថ្នាក់នៅទីនេះ ត្រូវរស់នៅប្រកបដោយអនាម័យបីល្អនិងមានការប្រុងប្រយ័ត្នខ្ពស់ពីបញ្ហាភ្លៀងផ្គររន្ទះឬជំងឺឆ្លងផ្សេងៗជាពិសេសត្រូវរាយការណ៍ជាបន្ទាន់ ទៅអាជ្ញាធរពាក់ព័ន្ធឬទៅមណ្ឌលសុខភាព ដើម្បីធានា បាននូវសុខភាពល្អ និងជួយសង្គ្រោះបានទាន់ពេលវេលា។
លើសពីនេះលោកបានថ្លែងអំណរគុណនិងកោតសរសើរខ្ពស់ដល់អាជ្ញាធរឃុំចំណាលើ ដែលបានឧបត្ថម្ភគាំទ្រនិងជួយធ្វើផ្ទះនិងបន្ទប់ទឹកជូនគ្រួសារជនភៀសសឹកទាំង៦ គ្រួសារ ដើម្បីបន្តស្នាក់នៅជាបណ្ដោះអាសន្ន ហើយក្នុងឱកាសនោះដែរ លោកបានឧបត្ថម្ភដល់វីរៈកងទ័ព២នាក់ ក្នុងម្នាក់ចំនួន១០ ម៉ឺនរៀល ដើម្បីធ្វើជាសោហ៊ុយសម្រាប់ទៅក៏ជួរមកវិញ ហើយគ្រួសាទាំង៦គ្រួសារខាងលើ ទទួលបាននូវអង្ករ ៣០គីឡូក្រាម គ្រឿងឧបភោគបរិភោគមួយចំនួន សម្លៀកបំពាក់និងកៅស៊ូតង់ ម្នាក់មួយថែមទៀត។ អត្ថបទ រដ្ឋបាលស្រុកស្ទោង.ពិនិត្យដោយអ៊ុមញឹប។
