ឯកឧត្តម នួន ផារ័ត្ន អភិបាលខេត្តកំពង់ធំ អញ្ជើញចូលរួមក្នុងពិធីបើកបវេសនកាលពុទ្ធិកសិក្សា ឆ្នាំសិក្សា២០២៥-២០២៦ នៅវត្តឥន្ទ្រីយ៍សំវរៈ (វត្តកំពង់ធំ)

(កំពង់ធំ)៖ ឯកឧត្តម នួន ផារ័ត្ន អភិបាលខេត្តកំពង់ធំ អញ្ជើញចូលរួមក្នុងពិធីបើកបវេសនកាលពុទ្ធិកសិក្សា ឆ្នាំសិក្សា២០២៥-២០២៦ នៅវត្តឥន្ទ្រីយ៍សំវរៈ (វត្តកំពង់ធំ)នៅសង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ នារសៀលថ្ងៃទី៦ ខែឧសភា ឆ្នាំ២០២៥ ។ ពិធីនេះមានការនិមន្តចូលរួមពីសម្តេចព្រះមង្គលមុនីរង្សី ហ៊ូ ឈីវនាថ ព្រះប្រធានលេខាធិការដ្ឋាន គណៈ សង្ឃនាយក និងជាព្រះអគ្គាធិការរងព្រះទេពសត្ថា សៀង សុខ ព្រះរាជាគណៈថ្នាក់ចត្វា នៃព្រះរាជាណាចក្រកម្ពុជា និងជាព្រះសត្ថាបារមី ព្រះមេគណខេត្តកំពង់ធំ ព្រមទាំងសាមនសិស្សផងដែរ។

ឯកឧត្តម នួន ផារ័ត្ន បានមានប្រសាសន៍ថា រាជរដ្ឋាភិបាលកម្ពុជាអាណត្តិទី៧ ដែលមានសម្តេចមហាបរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកកម្ពុជា ជាប្រមុខដឹកនាំប្រទេសប្រកបដោយគតិបណ្ឌិតដ៏ខ្ពង់ខ្ពស់ ជានិច្ច ជាកាល តែងយកចិត្តទុកដាក់ខ្ពស់ក្នុងការលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ ព្រមទាំង ជម្រុញឲ្យមានការផ្សព្វផ្សាយ បញ្ញាបនូវទ្រឹស្ដីព្រះពុទ្ធសាសនា យកទៅអនុវត្តជាក់ស្តែងដើម្បី មានការ ឯកភាពគ្នា រវាងព្រះសង្ឃ និងពុទ្ធបរិស័ទក្នុងការប្រតិបត្តិព្រះធម៌ និងព្រះវិន័យរបស់ព្រះ សម្មាសម្ពុទ្ធ បរមគ្រូនៃយើង ដែលបានបន្សល់ទុកអស់រយៈពេល២៥៦៧ព្រះវស្សាកន្លងមកហើយ។ ដោយថ្ងៃនេះ មានផ្សារភ្ជាប់ជាមួយពិធីបើកបវេសនកាលពុទ្ធិកសិក្សា ឆ្នាំសិក្សា២០២៥-២០២៦ ទូលព្រះបង្គំ ខ្ញុំព្រះករុណា-ខ្ញុំ សូមធ្វើការសូមធ្វើការកោតសរសើរចំពោះការយកចិត្តទុកដាក់ របស់មន្ទីរ ធម្មការ និងសាសនាខេត្តកំពង់ធំ និងសាលាគណខេត្ត ដែលបាននិងកំពុងខិតខំ អនុវត្តនូវតួនាទី និង ភារកិច្ចរបស់ខ្លួន ក្នុងការចូលរួមចំណែកក្នុងការកសាងធនធានមនុស្សក្នុងជួរព្រះសង្ឃ ជាមួយរាជរដ្ឋា ភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ប្រកបដោយគតិបណ្ឌិត ដ៏ខ្ពង់ខ្ពស់ ដែលជារៀងរាល់ឆ្នាំ រាជរដ្ឋាភិបាល តែងផ្តល់នូវការវិភាជថវិកាជាតិ សម្រាប់អភិវឌ្ឍវិស័យ ពុទ្ធិកសិក្សា ។

ឯកឧត្តម បន្តថាវិស័យពុទ្ធិកសិក្សានេះ តាំងពីអតីតរហូតដល់បច្ចុប្បន្ននេះ បានដើរតួរយ៉ាងសំខាន់ ក្នុងការចូល រួមចំណែកបណ្តុះបណ្តាលធនធានមនុស្ស ជាពិសេសកុលបុត្រ ដែលបានចូលមកបួសក្នុងព្រះពុទ្ធ សាសនា។ តាមរយៈវិស័យពុទ្ធិកសិក្សានេះ ប្រទេសជាតិយើងទទួលបាន នូវអ្នកមានចំណេះដឹងជា ច្រើនរូប ដែលជាសរសរទ្រូងដ៏រឹងមាំ ចូលរួមចំណែកថែរក្សា ការពារវប្បធម៌ អរិយធម៌ ប្រពៃណីជាតិ តាម គន្លងព្រះពុទ្ធសានា ដែលជាអត្តសញ្ញាណជាតិខ្មែរយើង។ ដូច្នេះការយកចិត្តទុកដាក់ចំពោះវិស័យ ពុទ្ធិកសិក្សា ជា ការចាំបាច់ដែលត្រូវពង្រីក និងពង្រឹងពីទីក្រុងរហូតដល់ជនបទ ។
អត្ថបទដោយ​ យីម​ ប៊ុន​ ហ័រ​
រូបភាពដោយ​ ឈួនឆេងមួន-ពិនិត្យដោយអ៊ុមញឹប។