ឯកឧត្តម ឡោ រស្មី អញ្ជើញបើកវគ្គបណ្ដុះបណ្ដាល អប់រំសមត្ថភាពវិជ្ជាជីវៈដល់អាជីវករលក់ដុំ លក់រាយ ថ្នាំកសិកម្ម និងជីកសិកម្ម ក្នុងភូមិសាស្ត្រខេត្តកំពង់ធំ

(កំពង់ធំ)÷ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមទ ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកស្រី គិត វិសិដ្ឋកញ្ញា អគ្គនាយករងក្រសួងកសិកម្ម ឯកឧត្តម ព្រឹម រដ្ឋា អភិបាលរងខេត្តកំពង់ធំ លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងសមាជិកសមាជិកា បានអញ្ជើញចូលរួមក្នុងវគ្គបណ្ដុះបណ្ដាល អប់រំសមត្ថភាពវិជ្ជាជីវៈ ដល់អាជីវករលក់ដុំ លក់រាយ ថ្នាំកសិកម្ម និងជីកសិកម្ម ក្នុងភូមិសាស្ត្រខេត្តកំពង់ធំ ខេត្តកំពង់ធំ មានរយៈពេល៣ថ្ងៃ ចាប់ពីថ្ងៃទី០៧-០៩ ខែឧសភា ឆ្នាំ២០២៥ នៅសាលប្រជុំសាលាខេត្តកំពង់ធំ។

លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឡើងធ្វើរបាយការណ៍ជូនអង្គពិធី ថ្ងៃជាថ្ងៃមួយដែលបានជួបជួបជុំគ្នា រវាងបងប្អូនអាជីវករ សមត្ថកិច្ចកសិកម្ម និងថ្នាក់ដឹកនាំក្រសួង ដើម្បីសំណេះសំណាល់រកបញ្ហាដែលកើតមានឡើងចំពោះការធ្វើអាជីវកម្មរបស់បងប្អូនទាក់ទងធាតុចូលជី ថ្នាំកសិកម្ម និងការប្រកបអាជីវកម្មរបស់បងប្អូនក្នុងខេត្ត ដើម្បីបានទាំងអាជីវករ និងអ្នកប្រើប្រាស់ ធានាបាននូវផលិតកម្មកសិកម្មប្រកបដោយ ទិន្នផលខ្ពស់ ហើយប្រសិនបើការប្រើប្រាស់ថ្នាំកសិកម្ម និងជីកសិកម្មពុំបានសមស្របតាមពេលវេលា បច្ចេកទេស ត្រឹមត្រូវទេនោះ វាជាមូលហេតុមួយដែលធ្វើឱ្យកសិផលទាំងនោះ មានកាកសំណល់ជាតិពុល មិនបានផលចំណេញដែលបង្កឥទ្ធិពលដោយផ្ទាល់ចំពោះសុខភាពទាំងអស់គ្នា ដែលជាអ្នក ប្រើប្រាស់ផលិតផលទាំងនោះជាម្ហូបអាហារ និងខាតបង់ថវិកាទៀតផង។

ឆ្លៀតក្នុងឱកាសនេះឯកឧត្តម ព្រឹម រដ្ឋា អភិបាលរងខេត្តកំពង់ធំបានថ្លែងថា វិស័យកសិកម្មនៅតែមានតួនាទីសំខាន់ក្នុងការទ្រទ្រង់កំណើនសេដ្ឋកិច្ច ធានាសមធម៌ ធានាសន្តិ សុខស្បៀង និងជំរុញការអភិវឌ្ឍសេដ្ឋកិច្ចជនបទ។ ដើម្បីបន្តធ្វើទំនើបកម្មវិស័យកសិកម្ម តាមរយៈ ការបង្កើនផលិតភាពការធ្វើ ពិពិធភាវូបនីយកម្ម និងពាណិជួបនីយកម្មកសិកម្ម ដោយបានជំរុញការអនុវត្តវិធានការចាំបាច់ ការកសាង និងកែលម្អហេដ្ឋារចនាសម្ព័ន្ធ និងសេវាដែលបម្រើដល់ផលិតកម្មកសិកម្មបង្កើន ការផ្តល់សេវាផ្សព្វផ្សាយបច្ចេកទេសកសិកម្មដល់កសិករ ការស្រាវជ្រាវបច្ចេកទេសកសិកម្ម សំដៅ បង្កើនទិន្នផលដំណាំ និងបន្សំការប្រែប្រួលអាកាសធាតុ ការគ្រប់គ្រង និងបង្កើនជីជាតិដីកសិកម្ម ការពង្រឹងសហគមន៍កសិកម្ម ព្រមទាំងការកសាង និងពង្រឹងសមត្ថភាពធនធានមនុស្ស និងស្ថាប័ន ដើម្បីជំរុញការអភិវឌ្ឍវិស័យកសិកម្ម។

ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ការបើកវគ្គអប់រំសមត្ថភាពវិជ្ជាជីវៈលក់ដុំ លក់រាយថ្នាំកសិកម្ម និង ជីកសិកម្មដល់បុគ្គលិកក្រុមហ៊ុន សិស្ស និស្សិត អាជីវករ និងប្រជាពលរដ្ឋ ដែលបានឆ្លងវគ្គថ្មីៗពិតជាមានសារៈ សំខាន់ណាស់ ក្នុងការចូលរួមចំណែកលើកកម្ពស់ និងពង្រឹងសមត្ថភាពវិជ្ជាជីវៈ ដល់វិស័យកសិកម្ម ដើម្បីឱ្យទទួលបានចំណេះដឹង និងមានវិជ្ជាជីវៈពិតប្រាកដ ស្របតាមច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម។ ជាមួយគ្នាដែរ អាជីវករនេះហើយ ដែលត្រូវដើរតួនាទីសំខាន់ណាស់ជា អ្នកផ្គត់ផ្គង់ធាតុចូលកសិកម្ម និងជាអ្នកផ្តល់ព័តមានបច្ចេកទេសពាក់ព័ន្ធ និងការប្រើប្រាស់ថ្នាំកសិកម្ម និងជីកសិកម្មដល់ប្រជាកសិករ ហើយក៏ត្រូវមានការសហការយ៉ាងល្អជាមួយសមត្ថកិច្ចកសិកម្ម ជាពិសេសគឺ ការិយាល័យនីតិកម្ម នៃមន្ទីរកសិកម្ម តាមរបាយរណ៍របស់លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត វគ្គនេះជាវគ្គទី១៣ហើយ ដែលមានអ្នកចូលរួមសរុប១៥៩នាក់ ដែល សិក្ខាកាមមកពីខេត្តចំនួន១៩ខេត្តផងដែរ។ អត្ថបទលោក ធូ កែវមុន្នី-ពិនិត្យដោយអ៊ុមញឹប។