បញ្ជាការដ្ឋានតំបន់ប្រតិបត្តិការសឹករងកំពង់ធំ ផ្សព្វផ្សាយបទបញ្ជា របស់ឯកឧត្ដមមេបញ្ជាការយោធភូមិភាគទី៤ និងគណៈបញ្ជាឯកភាពរដ្ឋបាលខេត្តកំពង់ធំ ស្តីពីការអនុវត្តវិធានការណ៍ចាំបាច់មួយចំនួន នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ
ខេត្តកំពង់ធំ៖ នៅព្រឹកថ្ងៃទី២៤ ខែមីនា ឆ្នាំ២០២៦ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានបេីកកិច្ចប្រជុំ ថ្នាក់ដឹកនាំ នៃបញ្ជាការដ្ឋានតំបន់ប្រតិបត្តិការសឹករង និងការិយាល័យ ស្ថាប័នពាក់ព័ន្ធមួយចំនួន ដេីម្បីចាត់តាំងអនុវត្តន៍តាមបទបញ្ជារបស់ឯកឧត្តម ឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ និងសេចក្ដីណែនាំមួយចំនួនរបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ស្តីពីវិធានការណ៍នានាក្នុងកិច្ចសហការ ការពារសន្តិសុខ សុវត្ថិភាព រក្សាសណ្ដាប់ធ្នាប់សង្គម ជូនប្រជាពលរដ្ឋ ភ្ញៀវជាតិ អន្តរជាតិ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ ដែលនឹងឈានចូលមកដល់នៅពេលខាងមុខនេះ ។ ដែលកិច្ចប្រជុំនេះប្រព្រឹត្តិទៅស្ថិតក្រោមអធិបតីភាពឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។
លោកវរសេនីយ៍ឯក អ៊ូ ឆេងកន មេបញ្ជាការរង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានបទបញ្ជាលេខ ០០១/២០២៦ បជ របស់បញ្ជាការដ្ឋានយោធភូមិភាគទី៤ ស្តីពី ការគ្រប់គ្រងកម្លាំង ធានាការពារសន្តិសុខ សុវត្ថិភាព និងសណ្ដាប់ធ្នាប់ ក្នុងឱកាសបុណ្យចូលឆ្នាំថ្មី ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ និងផ្សព្វផ្សាយខ្លឹមសារស្តីពីកិច្ចប្រជុំស្តីពីវិធានការណ៍ការពារសន្តិសុខ សុវត្ថិភាព ក្នុងឱកាសបុណ្យចូលឆ្នាំថ្មី របស់រដ្ឋបាលខេត្តកំពង់ធំ ដេីម្បីថ្នាក់ដឹកនាំបានជ្រួតជ្រាប និងចាត់ចែងអនុវត្តន៍ ។
ឧត្តមសេនីយ៍ទោ សោម ស៊ុន បានថ្លែងអំណរគុណចំពោះថ្នាក់ដឹកនាំគ្រប់លំដាប់ថ្នាក់ និងយោធិនគ្រប់រូប ដែលបានរួមចំណែក ចូលរួមសហការល្អ ក្នុងកិច្ចការ ការពារសន្តិសុខ សុវត្ថិភាព រក្សាសណ្ដាប់ធ្នាប់ ជូនប្រជាពលរដ្ឋ ភ្ញៀវជាតិ និងអន្តរជាតិ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលកន្លងទៅបានយ៉ាងល្អប្រសើរ ជាមួយនោះ ក៏បានចាត់ចែងកិច្ចការមួយចំនួននៅក្នុងអង្គភាពតាមលក្ខណៈប្រពៃណីជាតិខ្មែរ និងតាមបែបព្រះពុទ្ធសាសនាបានយ៉ាងល្អប្រសើរផងដែរ ។
ឧត្ដមសេនីយ៍ទោ សោម ស៊ុន បានណែនាំដល់ថ្នាក់ដឹកនាំទាំងអស់ រួមជាមួយស្ថាប័នពាក់ព័ន្ធ ត្រូវចាត់វិធានការផ្សព្វផ្សាយបទបញ្ជារបស់ឯកឧត្ដមមេបញ្ជាការរងកងទ័ពជើងគោក មេបញ្ជាការយោធភូមិភាគទី៤ និងសេចក្ដីណែនាំនានា របស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យបានជ្រួតជ្រាបដល់យោធិនគ្រប់រូប និងត្រូវចាត់តាំងអនុវត្តន៍ឲ្យមានប្រសិទ្ធភាព ។ ជាមួយនេះដែរ ត្រូវចាត់ចែងរៀបចំកម្មវិធីគោរពវិញ្ញាណក្ខន្ធ កម្មាភិបាល យុទ្ធជន ដែលពលីជីវិតក្នុងសម័យសង្គ្រាមស៊ីវិលកន្លងទៅ នៅវិមានរំលឹកគុណយុទ្ធជនពលី នៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងនិងគោរពវិញ្ញាណក្ខន្ធវីរ:កងទ័ពដែលបានពលីជីវិតក្នុងបុព្វហេតុការពារបូរណភាពទឹកដីពីការឈ្លានពានពីពួកទាហានសៀមនាពេលថ្មីៗកន្លងមកនេះ ដើម្បីជាការដឹងគុណដែលមិនអាចបំភ្លេចបាន និងប្រុងប្រៀបរៀបចំស្បៀងអាហារ គ្រឿងឧបភោគបរិភោគ និងថវិកាមួយចំនួន តាមលទ្ធភាពដែលអាចធ្វើទៅបាន ដើម្បីសាកសួរសុខទុក្ខកងទ័ពដែលរងរបួសក្នុងសមរភូមិកន្លងទៅ ដែលមិនទាន់បានជាសះស្បើយ និងគ្រួសារកងទ័ព ដែលកំពុងបំពេញភារកិច្ចការពារបូរណភាពទឹកដី នៃព្រះរាជាណាចក្រកម្ពុជាយើងផងដែរ ។អត្ថបទតំបន់សឹករងកំពង់ធំពិនិត្យអ៊ុមញឹប។
