ឧត្តមសេនីយ៍ទោ សោម ស៊ុន ដឹកនាំកិច្ចប្រជុំប្រុងប្រៀបកម្មវិធីនានា ចូលរួមអបអរសាទរពិធីសង្ក្រាន្តឆ្នាំថ្មី នៅទីបញ្ជាការតំបន់ប្រតិបត្តិការសឹករងកំពង់ធំ
(ខេត្តកំពង់ធំ)៖ នៅរសៀលថ្ងៃទី០៤ ខែមេសា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានអញ្ជើញជាអធិបតីភាព ក្នុងកិច្ចប្រជុំប្រុងប្រៀបរៀបចំកម្មវិធីនានា សម្រាប់ចូលរួមអបអរសាទរ ក្នុងពិធីសង្ក្រាន្តឆ្នាំថ្មី ឆ្នាំម្សាញ់ សប្តស័ក ពុទ្ធសករាជ ២៥៦៩ ដែលនិងឈានចូលមកដល់ នៅថ្ងៃទី ១៤- ១៥ និងថ្ងៃទី១៦ ខែមេសា ឆ្នាំ២០២៥ ខាងមុខនេះ ដែលកិច្ចប្រជុំនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ ។
ឧត្តមសេនីយ៍ទោ សោម ស៊ុន បានមានប្រសាសន៍ថា ជារៀងរាល់ឆ្នាំបញ្ជាការដ្ឋានតំបន់ប្រតិបត្តិការសឹករងកំពង់ធំ តែងតែបានរៀបចំកម្មវិធីនានា ក្នុងការចូលរួមអបអរសាទរក្នុងពិធីចូលឆ្នាំថ្មីប្រពៃណីជាតិ ជារៀងរហូតមក ។
ដោយឡែកនៅឆ្នាំនេះ បញ្ជាការដ្ឋានតំបន់ប្រតិបត្តិការសឹករងកំពង់ធំ បានប្រុងប្រៀបរៀបចំកម្មវិធីមួយចំនួន មានជាអាទិ៍ ទីមួយ ការគោរពវិញ្ញាណក្ខន្ធកម្មាភិបាលយុទ្ធជនយុទ្ធនារី ដែលបានបូជាពលីជីវិត ដើម្បីបុព្វហេតុជាតិ និងប្រជាជនកម្ពុជា នៅវិមានរំលឹកគុណយុទ្ធជនពលីនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងសូត្រមន្តបង្សុកូលរាប់បាត្រឧទ្ទិសកុសលផលបុណ្យជូនដល់ញាតិការទាំង៧ សន្ដាន និងកម្មាភិបាល យុទ្ធជន យុទ្ធនារី ព្រមទាំងវិញ្ញាណក្ខន្ធវិរជន នៃប្រតិបត្តិករនយោបាយឈ្នះឈ្នះ ដែលនាំមកនូវសុខសន្តិភាព និងការឯកភាពជាតិពេញលេញ ជូនប្រជាជនកម្ពុជា។ ទីពីរ រៀបចំឲ្យមានលេងល្បែង របាំប្រជាប្រិយ មានដូចជាចោលឈូង បោះអង្គុញ លាក់កន្សែង វាយក្អម ទាញព្រាត់ ដណ្ដើមស្លឹកឈើ លោតបាវ ជាក្រុម និងការសម្ដែងរបាំម៉ាឌីហ្សុនកងទ័ព និងទីបី រៀបចំកម្មវិធីជប់លៀងអបអរសាទរឆ្នាំថ្មី ជូនដល់កងកម្លាំងនៅមុនពេលពិធីបុណ្យចូលឆ្នាំថ្មីមកដល់ ផងដែរ។
នៅក្នុងឱកាសនេះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ក៏បានប្រគល់ភារកិច្ចជូនថ្នាក់ដឹកនាំ ដែលមានការពាក់ព័ន្ធ និងមេបញ្ជាការគ្រប់បណ្ដាកងឯកភាព ត្រូវចាប់តាំងកម្លាំងសហប្រតិបត្តិការជាមួយកងកម្លាំងប្រដាប់អាវុធទាំងបី មន្ត្រីរាជការអាជ្ញាធរដែនដី គ្រប់លំដាប់ថ្នាក់ ដើម្បីចាត់តាំងប្រេីប្រាសកម្លាំងចូលរួមក្នុងកិច្ចការពារសន្តិសុខសុវត្ថិភាព និងរៀបចំសណ្ដាប់ធ្នាប់ជូនភ្ញៀវទេសចរណ៍ជាតិ អន្តរជាតិ និងប្រជាជនយើងចូលរួមសប្បាយរីករាយ ក្នុងឱកាសបុណ្យចូលឆ្នាំថ្មីនេះ ឲ្យទទួលបានជោគជ័យ ។ ជាមួយនឹងដែរ មេបញ្ជាការតំបន់ប្រតិបត្តិការសឹករងកំពង់ធំ ក៏បានក្រើនរំលឹកដល់ថ្នាក់ដឹកនាំ និងមេបញ្ជាការតាមបណ្ដាកងឯកភាពនីមួយៗ ត្រូវចាត់តាំងនាយទាហាន និងកងកម្លាំងប្រចាំការ ប្រចាំបញ្ជា ព្រមទាំងរៀបចំកងកម្លាំងអន្តរាគមន៍ មានមធ្យោបាយ គ្រឿងបំពាក់គ្រប់គ្រាន់ ត្រៀមនៅនឹងកន្លែង ដើម្បីចល័តអន្តរាគមន៍ដោះស្រាយយថាហេតុផ្សេងៗ ដែលអាចកើតមានឡើង តាមបទបញ្ជាឲ្យទាន់ពេលវេលានិងមានប្រសិទ្ធភាព។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
