សាលាអនុវិទ្យាល័យកំពង់ក្របៅ បាននិមន្តព្រះសង្ឃសម្តែងការអប់រំដល់សិស្សានុសិស្សស្តីអំពីសីលធម៌ ចរិយាធម៌ គុណមាតាបិតា លោកគ្រូអ្នកគ្រូ និងចាស់ព្រឹទ្ធាចារ្យ

(កំពង់ធំ)÷ ការនិមន្តព្រះសង្ឃអប់រំដល់សិស្សានុសិស្ស នាថ្ងៃទី២៩ ខែមីនា ឆ្នាំ២០២៥ នៅសាលាអនុវិទ្យាល័យកំពង់ក្របៅ ដែលស្ថិតនៅភូមិស្នែងក្របី សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ ដឹកនាំដោយលោក ហ៊ា សារី នាយកសាលាកំពង់ក្របៅ គណៈកម្មការទ្រទ្រង់ទ្រទ្រង់សាលា ចាស់ព្រឹទ្ធាចារ្យ និងលោកគ្រូអ្នកគ្រូ ព្រមទាំងសិស្សានុសិស្ស បានប្រារព្ធកម្មវិធីមួយដោយនិមន្តព្រះសង្ឃចំនួន២អង្គមកពីវត្តស្លែង ព្រះនាម ឈឹម ឈ័រ និងព្រះគណ ចិន្តា ដើម្បីនិមន្តសម្តែងការអប់រំដល់សិស្សានុសិស្ស ស្តីអំពីសីលធម៌ ចរិយាធម៌ គុណមាតាបិតា លោកគ្រូអ្នកគ្រូ ចាស់ព្រឹទ្ធាចារ្យ និងនិមន្តព្រះសង្ឃរាប់បាត។

លោក ហ៊ា សារី នាយកសាលាកំពុងក្របៅ បានលើកឡើងពីគោលបំណងគឺ ដើម្បីលើកស្ទួយសីលធម៌ ចរិយាធម៌ គុណធម៌ដល់សិស្សានុសិស្សក្នុងការរស់នៅ យល់ដឹងពីគុណតម្លៃដ៏ធំធេងរបស់មាតាបិតា លោកគ្រូ អ្នកគ្រូ ដែលបានចិញ្ចឹមបីបាច់ថែរក្សា និងបង្ហាត់បង្រៀនឱ្យមានចំណេះ ជំនាញច្បាស់លាស់។ សូមសិស្សានុសិស្សទាំងអស់ចៀសវាងការប្រព្រឹត្តអំពើពាលាអាវាសែ អំពើមិនល្អក្នុងសង្គមប្រាសចាកអំពើអបាយមុខផ្សេងៗ ដែលធ្វើឱ្យប៉ះពាល់ដល់កិត្តិយសសាលារៀន គ្រួសារ និងសង្គមជាតិទាំងមូល។ ចូលរួមគោរពច្បាប់ចរាចរណ៍ផ្លូវគោកឱ្យបានគ្រប់ៗគ្នា ជាពិសេសចៀសឱ្យឆ្ងាយពីគ្រឿងញៀន ព្រោះគ្រឿងញៀនបំផ្លាញខ្លួនឯង គ្រួសារ និងសង្គមជាតិទាំងមូល។

ព្រះអង្គព្រះនាម ឈឹម ឈ័រ មានសង្ឃដីការថាសារៈប្រយោជន៍នៃការសិក្សារៀនសូត្ររបស់សិស្សានុសិស្សប្រកបដោយសមត្ថភាព ភាពស្អាតស្អំ ការកសាងធនធានមនុស្សប្រកបដោយចំណេះដឹង ចំណេះធ្វើ គុណធម៌ និងកាយសម្បទា ពង្រីកវិសាលភាព និងប្រសិទ្ធភាព នៃប្រព័ន្ធគាំពារសង្គម បង្កើតការងារ ការពង្រឹងសន្តិសុខ សុវត្ថិភាព និងយុត្តិធម៌សង្គម។ ការសម្ដែងការអប់រំនៅពេលនេះ ចង់អប់រំដល់ក្មួយៗទាំងអស់ឱ្យយល់ពីគុណឪពុកម្ដាយ លោកគ្រូអ្នកគ្រូដែលបានជួយបង្ហាត់បង្រៀនណែនាំក្មួយៗឱ្យមានចំណេះដឹងនិងជំនាញពិតប្រាកដនាពេលសព្វថ្ងៃនេះ ដើម្បីឱ្យក្មួយៗមានសុជីវធម៌ល្អ ស្ដាប់ការទូន្មានរបស់ឪពុកម្ដាយ ឱ្យក្លាយខ្លួនជាកូនល្អ សិស្សល្អ មិត្តល្អ និងពលរដ្ឋល្អនៅក្នុងសង្គម។

សូមបញ្ជាក់ផងដែរថា ពិធីអប់រំដល់សិស្សានុសិស្សនៅសាលាអនុវិទ្យាល័យកំពុងក្របៅ ដោយមានការចូលរួមពីលោកគ្រូ អ្នកគ្រូចំនួន០៨នាក់ ស្រី០៣នាក់ គណៈកម្មការទ្រទ្រង់សាលា និងចាស់ព្រឹទ្ធា លោកយាយលោកតា មាតាបិតាសិស្សសរុប២០នាក់ ស្រី១២នាក់  និងសិស្សានុសិស្សសរុបចំនួន៩០នាក់ ស្រី៤៤នាក់ផងដែរ។ អត្ថបទលោក ធូ កែវមុន្នី.ពិនិត្យដោយអ៊ុមញឹប។