ឧត្តមសេនីយ៍ទោ សោម ស៊ុន ពង្រឹងតួនាទីភារកិច្ចរបស់កងយោធពលខេមរភូមិន្ទ ក្នុងភារកិច្ចការពារបូរណភាពទឹកដី
ខេត្តកំពង់ធំ៖ នៅព្រឹកថ្ងៃទី ៣ ខែ មីនា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានដឹកនាំកិច្ចប្រជុំផ្សព្វផ្សាយសភាពការណ៍ថ្មីៗ និងពង្រឹងតួនាទីភារកិច្ចរបស់កងយោធពលខេមរភូមិន្ទ ក្នុងភារកិច្ចការពារបូរណភាពទឹកដី ការពារជាតិ សាសនា និងព្រះមហាក្សត្រ ក្នុងបរិបទថ្មី នៃសភាពការណ៍វិវត្តន៍ក្នុងតំបន់ និងនៅលើសកលលោក ។
ឧត្តមសេនីយ៍ទោ សោម ស៊ុន បានបញ្ជាក់ជូនអំពីសភាពការណ៍សង្គ្រាមនៅមជ្ឈិមបូព៌ា និងសភាពការណ៍ថ្មីៗ នៅតាមខ្សែបន្ទាត់ព្រំដែនកម្ពុជា-ថៃ។ ដែលមកដល់បច្ចុប្បន្ននេះ ភាគីថៃនៅតែធ្វើសកម្មភាពក្នុងការរំលោភបំពានលើកិច្ចព្រមព្រៀង ក្នុងសេចក្តីប្រកាសរួមនៃបទឈប់បាញ់ជាបន្តបន្ទាប់ដូចជា ការដាក់ទូកុងតឺន័រ រាយបន្លាស់លួស និងជីកប្រព័ន្ធប្រឡាយនៅតំបន់ព្រំដែនជាឯកតោភាគី ។ ដែលខុសពីសេចក្តីសម្រេចរួមរបស់គណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ ដែលបានឯកភាពគ្នាចុះហត្ថលេខាក្នុងកិច្ចប្រជុំពិសេសលើកទី៣ កាលពីថ្ងៃទី ២៧ ខែ ធ្នូ ឆ្នាំ២០២៥ កន្លងទៅ ។
ឧត្តមសេនីយ៍ទោ សោម ស៊ុន បានប្រគល់ភារកិច្ច ជូនដល់នាយទាហាន នាយទាហានរង និងពលទាហានទាំងអស់ នៃបញ្ជាការដ្ឋានតំបន់ប្រតិបត្តិការទឹករកកំពង់ធំ ត្រូវគោរពអនុវត្តយ៉ាងម៉ឺងម៉ាត់ តាមច្បាប់ស្ដីពីលក្ខន្តិកៈរបស់កងយោធពលខេមរភូមិន្ទ និងបទបញ្ជារបស់ថ្នាក់ដឹកនាំគ្រប់លំដាប់ថ្នាក់ ហើយត្រូវត្រៀមខ្លួនរួចជាស្រេច ក្នុងភារកិច្ចការពារបូរណភាពទឹកដី ការពារជាតិ សាសនា និងព្រះមហាក្សត្រ និងត្រូវជឿជាក់លើការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាល ដែលដឹកនាំដោយសម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងបុព្វហេតុសន្តិភាព និងការពារបូរណភាពទឹកដីដោយសន្តិវិធី តាមច្បាប់អន្តរជាតិ និងសិទ្ធិសញ្ញា អនុសញ្ញានានាដែលនៅជាធរមាន ។អត្ថបទតំបន់ប្រតិបត្តិការសឹករងកំពង់ធំ-ពិនិត្យដោយអ៊ុមញឹប។
