ពិធីបិទសន្និបាតបូកសរុបសមិទ្ធិផលការងារសុខាភិបាលឆ្នាំ២០២៤ និងទិសដៅការងារបន្តសម្រាប់ឆ្នាំ២០២៥ របស់មន្ទីរសុខាភិបាលខេត្តកំពង់ធំ
(កំពង់ធំ)÷ បន្ទាប់ពីដំណើរការរយៈពេលពេញមួយថ្ងៃ សន្និបាតបូកសរុបសមិទ្ធផលការងាឆ្នាំ ២០២៤ និងទិសដៅការងារបន្តសម្រាប់ឆ្នាំ ២០២៥របស់មន្ទីរសុខាភិបាលខេត្តកំពង់ធំត្រូវបានប្រារព្ធពិធីបិទនៅរសៀលថ្ងៃទី ១៣ខែមីនាឆ្នាំ ២០២៥ក្រោមអធិបតីភាព ឯកឧត្តមឯកឧត្តម នួន ផារ័ត្ន អភិបាលខេត្តកំពង់ធំ ឯកឧត្តមបណ្ឌិត ។
អញ្ជើញចូលរួមក្នុងឱកាសនេះមានស្រី ស៊ីន ប្រធានមន្ទីរសុខាភិបាលខេត្តកំពង់ធំ មន្ទីរជុំវិញខេត្ត លោកអភិបាលក្រុង/ស្រុក ប្រធានមណ្ឌលសុខភាព លោកមេឃុំ ប្រមាណជាង៣០០នាក់ ។
ឯកឧត្តមបណ្ឌិត ស្រី ស៊ីន ប្រធានមន្ទីរសុខាភិបាលខេត្តកំពង់ធំ បានអញ្ជើញឡើងរាយកាណ៍ ទន្ទឹមនឹងសមិទ្ធផលដែលសម្រេចបាន ក៏នៅមានបញ្ហាប្រឈមមួយចំនួនដែលត្រូវដោះស្រាយ ដូចនេះគោលបំណងនៃការរៀបចំធ្វើសន្និបាតសុខាភិបាលនៅថ្ងៃនេះ គឺដើម្បីពិនិត្យមើលលទ្ធផលការងារសុខាភិបាល ដែលបានសម្រេចបានក្នុងរយះពេល១ឆ្នាំកន្លងទៅគឺឆ្នាំ២០២៤ និងទិសដៅការងារបន្តសម្រាប់ឆ្នាំ ២០២៥ របស់មន្ទីរសុខាភិបាលនៃរដ្ឋបាលខេត្តកំពង់ធំ។ អង្គសន្និបាតនឹងពិនិត្យមើល ស្វែងយល់ពីបញ្ហាប្រឈម នានាដែលជួបប្រទះ ដែលជាឧបសគ្គរាំងស្ទះដល់ដំណើរការនៃការអនុវត្តកិច្ចការរបស់ខ្លួន និងពិភាក្សារកដំណោះ ស្រាយចាំបាច់សម្រាប់កែលម្អ និងបង្កើននូវប្រសិទ្ធភាពការងារ និងការអភិវឌ្ឍរបស់ខ្លួនដើម្បីធានាបាន នូវការផ្តល់ សេវា សុខាភិបាលប្រកបដោយប្រសិទ្ធភាព គុណភាព សុវត្ថិភាព និងសមធម៌។
ឯកឧត្តម នួន ផារ័ត្ន អភិបាលខេត្តកំពង់ធំ បានថ្លែងថាលទ្ធផលការងារសុខាភិបាលដែលសម្រេចបានក្នុងឆ្នាំ ២០២៤កន្លងទៅនេះ ដែលមានការរីកចម្រើនគួរឱ្យកត់សំគាល់។ សមិទ្ធិផលដែលទទួលបាននេះគឺពិតជា បានមកដោយការខិតខំប្រឹងប្រែងយ៉ាងខ្លាំងក្លាបំផុតពីថ្នាក់ដឹកនាំ និងមន្ត្រីរាជការ បុគ្គលិកសុខាភិបាលទាំងអស់ គ្រប់លំដាប់ថ្នាក់ និងដោយមានការចូលរួមគាំទ្រ និងសហការល្អពីគ្រប់ស្ថាបន៍ពាក់ពន្ធ័អាជ្ញាធរមូលដ្ឋានគ្រប់លំដាប់ថ្នាក់ និងដៃគូអភិវឌ្ឍនានា។
ឯកឧត្តមអភិបាលខេត្តកំពង់ធំ បានបន្តទៀតថាការកើនឡើងនូវការប្រើប្រាស់សេវាសុខាភិបាលនៅតាមមន្ទីរពេទ្យនិងមណ្ឌលសុខភាពទាំងផ្នែកពិគ្រោះជំងឺក្រៅ និងផ្នែកសម្រាកពេទ្យ។ ការកើនឡើងនូវអត្រាប្រើប្រាស់គ្រែនៅមន្ទីរពេទ្យលើសពី១០០%។ ការថយចុះនូវអត្រាស្លាប់ក្រោម១% (០,៦៧%)។ ការលើកកំពស់សុខភាពមាតា ទារក កុមារ និងអាហារូបត្ថម្ភ។ ការធ្វើឱ្យមានវឌ្ឍនភាពការងារប្រយុទ្ធប្រឆាំងនឹងជំងឺឆ្លងដូចជាអេដស៍-របេង-គ្រុនចាញ់-គ្រុនឈាមនិងជំងឺមិនឆ្លងនានាដូចជាជំងឺទឹកនោមផ្អែម លើសសំពាធឈាម។ ការអភិវឌ្ឍកែលម្អហិដ្ឋារចនាសម្ព័ន្ធនិងការពង្រីកបន្ថែមនូវមូលដ្ឋានសុខាភិបាលដូចជាមណ្ឌលសុខភាព នៅតាមតំបន់មួយចំនួនដើម្បីឱ្យមានតុល្យភាពនៃការគ្រប់ដណ្តប់សេវាសុខាភិបាលទៅតាមកំណើននៃប្រជាជននៅមូលដ្ឋាន។ ការផ្តល់នូវសេវាគាំពារសង្គមផ្នែកថែទាំ-ព្យាបាលដល់ពលរដ្ឋ ដោយសមធម៌ពិសេសអ្នកប្រើប្រាស់ប័ណ្ណមូលនិធិសមធ៌ម ប័ណ្ណប.ស.ស និងគ្រួសារពលរដ្ឋដែលងាយរងហានិភ័យ។
ឯកឧត្តម នួន ផារ័ត្ន អភិបាលខេត្តកំពង់ធំ បានផ្តល់នូវអនុសាសន៍មួយចំនួនដូចតទៅ៖ ត្រូវយកចិត្តទុកដាក់ និងទទួលខុសត្រូវខ្ពស់ក្នុងការផ្តល់សេវាថែទាំ-ព្យាបាលប្រកបដោយគុណភាពប្រសិទ្ធិភាព សមធម៌ ធានានូវសេវា២៤ម៉ោងលើ២៤ម៉ោង។ ត្រូវគោរពក្រមសីលធម៌វិជ្ជាជីវៈប្រកាន់យកនូវឥរិយាបថរួសរាយរាក់ទាក់ និងការប្រាស្រ័យទាក់ទងល្អជាមួយនឹងអ្នកជំងឺ។ បំពាក់បំប៉នបន្ថែម និងជាប្រចាំនូវជំនាញបច្ចេកទេសដើម្បីអភិវឌ្ឍសមត្ថភាព។ ខិតខំបំពាក់សម្ភារៈ-បរិក្ខាពេទ្យទំនើបៗដើម្បីជាជំនួយដល់ការពិនិត្យ និងព្យាបាល។ ខិតខំកែលម្អហេដ្ឋារចនាសម្ព័ន្ធ, អគារ, បន្ទប់សម្រាក, សម្ភារៈដំណេកឱ្យមានផាសុខភាព។ធានានូវអនាម័យល្អ, បរិស្ថានល្អ, និងកាត់បន្ថយការចម្លងរោគក្នុងមន្ទីរពេទ្យ។ ផ្តល់ការអប់រំសុខភាព និងផ្សព្វផ្សាយនូវព័ត៌មានសុខាភិបាលនានាឱ្យបានទូលំទូលាយដល់ប្រជាពលរដ្ឋទូទៅ ជាពិសេសប្រជាពលរដ្ឋងាយរងគ្រោះ។ ខិតខំត្រួតពិនិត្យយកចិត្តទុកដាក់ការផ្តល់សេវាសុខាភិបាលឯកជន, ការគ្រប់គ្រងឱសថក្លែងក្លាយ និង ខូចគុណភាព។ សហការឱ្យបានកាន់តែល្អប្រសើរជាមួយនឹងអាជ្ញាធរមូលដ្ឋាន អង្គភាពពាក់ព័ន្ធ និងដៃគូអភិវឌ្ឍនានា ដើម្បីអភិវឌ្ឍន៍វិស័យសុខាភិបាលឱ្យកាន់តែរីកចម្រើន។ ពង្រឹងសាមគ្គីភាពផ្ទៃក្នុងឱ្យបានរឹងមាំដែលជាកត្តានាំមកនូវជោគជ័យការងារ។ អត្ថបទលោក ធូ កែវមុន្នី-ពិនិត្យដោយ-អ៊ុមញឹប។
