ឯកឧត្តមកិត្តិសង្គហបណ្ឌិត ហ៊ីង ប៊ុនហៀង ” សន្តិភាពមានតម្លៃធំធេងមិនអាចកាត់ថ្លៃបាន និងជាមរតកដ៏មហាសាលរបស់សម្ដេចតេជោហ៊ុនសែន”
កំពង់ធំ ÷ “សន្តិភាព មានតម្លៃធំធេងមិនអាចកាត់ថ្លៃបាន និងជាមរតកដ៏មហាសាលរបស់សម្ដេចតេជោហ៊ុនសែន អតីតប្រមុខនៃរាជរដ្ឋាភិបាលកម្ពុជា បច្ចុប្បន្នជាប្រធានព្រឹទ្ធសភា” ឯកឧត្តម កិត្តិសង្គហបណ្ឌិត ហ៊ីង ប៊ុនហៀង បានថ្លែងបែបនេះ នៅក្នុងឱកាសដែល ឯកឧត្តម បានអញ្ជើញ ជាអធិបតី នៅក្នុងកម្មវិធី សំណេះសំណាល ជាមួយលោកគ្រូ អ្នកគ្រូ និងមន្ត្រីគណបក្ស ក្នុងស្រុកប្រាសាទបាល័ង្គ នាព្រឹកថ្ងៃទី 8 ខែមីនា ឆ្នាំ 2025 ។
ឯកឧត្តម កិត្តិសង្គហបណ្ឌិត ហ៊ីង ប៊ុនហៀង សមាជិកគណៈអចិន្ត្រៃយ៍ គណៈកម្មាធិការកណ្ដាល និងជាប្រធានគណៈកម្មាធិការ គណបក្សខុទ្ទកាល័យ សម្ដេចមហាបបវរធិបតីហ៊ុនម៉ាណែត បានលើកឡើងបន្ថែមថា សន្តិភាពនៅកម្ពុជា រកបានមកដោយលំបាក សម្ដេចតេជោហ៊ុនសែន រួមនិងឥស្សរជនជាន់ខ្ពស់ ជាថ្នាក់ដឹកនាំនៅក្នុង ជួរកងយោធពលខេមរភូមិន្ទជាច្រើនទៀត បានធ្វើពលិកម្ម ប្ដូរជីវិតចូលទៅតំបន់ខ្មែរក្រហម ។ ដើម្បីស្វែងរកការចរចាផ្សះផ្សារបង្រួបបង្រួមជាតិ ស្វែងរកសន្តិភាពតាមនយោបាយឈ្នះឈ្នះ ហើយឥឡូវនេះ សន្តិភាពបានកើតមានពេញលេញទូទាំងផ្ទៃប្រទេស ប្រជាពលរដ្ឋធ្វើដំណើរទៅគ្រប់ទីកន្លែងដោយគ្មានការភ័យខ្លាច រួមនិងសង្គមជាតិមានការអភិវឌ្ឍលើគ្រប់វិស័យ ។ ដូច្នេះ អ្នកណាក៏ដោយ ដែលមានចេតនាចង់បំផ្លាញសន្តិភាពស្ថេរភាពសង្គម គឺមិនអនុញ្ញាតជាដាច់ខាត ។
ឯកឧត្តម ក៏បានក្រើនរំលឹកនិងពន្យល់បន្ថែម ដល់លោកគ្រូអ្នកគ្រូ នឹងមន្ត្រីគណបក្សទាំងអស់ ឱ្យចេះពិចារណា បែងចែកឲ្យបានច្បាស់លាស់នូវព័ត៌មានបំភ្លើស ព័ត៌មានញុះញង់អុចអាលនៅក្នុងសង្គមនាពេលបច្ចុប្បន្ន ។ ហើយត្រូវមានការប្រុងប្រយ័ត្នឱ្យបានខ្ពស់ កុំឱ្យចាញ់ល្បិចកលក្រុមជ្រុលនិយមមួយក្តាប់តូច ដែលតែងតែមានបំណងតែម្យ៉ាង គឺចង់ផ្ដួលរំលំរាជរដ្ឋាភិបាលកម្ពុជាស្របច្បាប់តែប៉ុណ្ណោះ ។ ដូច្នេះ សូមបងប្អូន និងប្រជាពលរដ្ឋគ្រប់រូប ត្រូវរួបរួមគ្នា ខិតខំបន្តពង្រឹង ការពារ ថែរក្សាសន្តិភាព និងលើកកម្ពស់ស្មារតីទទួលខុសត្រូវចំពោះជោគវាសនាប្រទេសជាតិ ពង្រឹងការឯកភាពជាតិ ជៀសវាងរាល់អំពើទាំងឡាយណា ដែលនាំឲ្យខ្មែរ បែកបាក់ ដោយគោរពនៅវប្បធម៌អហិង្សា និងរក្សាការពារឲ្យបាននូវសន្តិសុខសណ្ដាប់ធ្នាប់សង្គម ។
គួរបញ្ជាក់ផងដែរថា នៅក្នុងឱកាស ជួបសំណេះសំណាលនេះផងដែរ ឯកឧត្តម កិត្តសង្គហបណ្ឌិត ហ៊ីង ប៊ុនហៀង បាននាំយកនូវអំណោយដ៏ថ្លៃថ្លា របស់សម្ដេចមហាបវរធិបតីហ៊ុនម៉ាណែត និងលោកជំទាវបណ្ឌិត ពេជ ចន្ទមុន្នី យកមកចែកជូន នឹងឧបត្ថម្ភ រួមមាន ÷ គណបក្សស្រុកប្រាសាទបល្ល័ង្ក ឧបត្ថម្ភ ថវិកា ចំនួន 4 លានរៀល និងវិទ្យុទាក់ទង 10 គ្រឿង. នគរបាលស្រុក ឧបត្ថម្ភថវិកា ចំនួន 2 លានរៀល និងវិទ្យុទាក់ទង 10 គ្រឿង. កងរាជអាវុធហត្ថស្រុក ឧបត្ថម្ភថវិកា ចំនួន 2 លានរៀល និងវិទ្យុទាក់ទង 10 គ្រឿង. ផ្នែកសឹករងស្រុក ឧបត្ថម្ភថវិកា មួយលានរៀល និងវិទ្យុទាក់ទង 10 គ្រឿង. ឃុំទាំងប្រាំពីរទូទាំងស្រុក ឧបត្ថម្ភថវិកា 50 ម៉ឺនរៀល និងវិទ្យុទាក់ទង 10 គ្រឿង ក្នុងមួយឃុំៗ. សាលារៀនទាំង 55 ទូទាំងស្រុក ឧបត្ថម្ភក្នុងមួយសាលារៀនទទួលបាន កុំព្យូទ័រមួយគ្រឿង ម៉ាស៊ីនព្រីនធ័រកូល័រ មួយគ្រឿង. និងឧបត្ថម្ភដល់លោកគ្រូអ្នកគ្រូ ដែលបានអញ្ជើញមកចូលរួមក្នុងម្នាក់ៗ នូវថវិកាចំនួន 5 ម៉ឺនរៀលនិងសារុងមួយផងដែរ ។
អត្ថបទលោកលន សុភា.ពិនិត្យដោយសេក សាវេត
