ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ចុះសួរសុខទុក្ខលោកគ្រូ អ្នកគ្រូ និង ក្មួយៗសិស្សានុសិស្សនៅសាលាបឋមសិក្សាកំពង់ស្វាយ ស្រុកកំពង់ស្វាយ

(កំពង់ធំ)៖ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា  អមដំណើរដោយលោកជំទាវ ឃួន ឃុនឌី សមាជិកព្រឹទ្ធសភា និងលោកជំទាវ លំ គន្ធារី អភិបាលរងខេត្តកំពង់ធំ ចុះសំណេះសំណាលនិងសួរសុខទុក្ខលោកគ្រូ អ្នកគ្រូ និង ក្មួយៗសិស្សានុសិស្សនៅសាលាបឋមសិក្សាកំពង់ស្វាយ ស្ថិតនៅ ភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ថ្ងៃទី០៨ ខែមីនាឆ្នាំ ២០២៥ ។

ឯកឧត្តមបណ្ឌិតបានរំលឹកឡើងវិញពីអនុស្សាវរីយ៍ដែលលោកក៏ជាអ្នកស្រុកកំពង់ស្វាយហើយបានតស៊ូរៀនសូត្រ រហូតទទួលបានការងារក្នុងរាជរដ្ឋាភិបាល ដោយបានឆ្លងកាត់នូវការលំបាកគ្រប់កាលៈទេសៈហើយការចុះមកសំណេះសំណាលនៅថ្ងៃនេះក្នុងគោលបំណងផ្សារភ្ជាប់នៅទំនាក់ទំនងល្អ និងជំរុញលើកស្ទួយវិស័យអប់រំព្រមទាំងបំពេញនូវតម្រូវការខ្វះខាតរបស់ក្មួយៗ ក៏ដូចជាលោកគ្រូ អ្នកគ្រូ ដែលធ្វើយ៉ាងណាអប់រំនិងបណ្ដុះបណ្ដាលដល់ពួកគាត់ឱ្យសម្រេចដល់គោលដៅនិងអនាគតភ្លឺស្វាងនាពេលខាងមុខ ឱ្យស្របទៅនឹងបរិបទបច្ចេកទេសទំនើប ។

ឯកឧត្តមបណ្ឌិត បានដឹកនាំក្រុមគ្រូពេទ្យជំនាញមាត់ធ្មេញក្នុងការផ្សព្វផ្សាយនៅចំណេះដឹងការថែទាំសុខភាពមាត់ធ្មេញដល់ក្មួយៗឲ្យមានភាពល្អប្រសើរ ព្រោះថាមនុស្សភាគច្រើនមិនបានគិតអំពីសុខភាពមាត់ធ្មេញនោះទេ។

ក្នុងនោះឯកឧត្តមបណ្ឌិតក៏បានឧបត្ថម្ភទូរទស្សន៍ភ្ជាប់ជាមួយបណ្ដាញអ៊ីនធឺណិតដើម្បីឲ្យប្អូនៗសិស្សានុសិស្សទាំងអស់បានសិក្សាស្វែងយល់ពីចំណេះដឹងគ្រប់បែបយ៉ាង ពិសេសភាសាអង់គ្លេសឱ្យកាន់តែមានភាពរីកចម្រើន។

បន្ទាប់មកឯកឧត្តមបណ្ឌិតបានបន្តដំណើរចុះមើលសមិទ្ធផលកសាងព្រះវិហារដើម្បីធ្វើយ៉ាងណាស្វែងរកសប្បុរសជនចូលរួមថវិកាដើម្បីដើម្បីបំពេញតម្រូវការចាំបាច់ផ្នែកពុទ្ធចក្រ ក៏ដូចជាការចូលរួមចំណែក ដើម្បីធ្វើយ៉ាងណាឲ្យការកសាងនេះសម្រេចបាន ១០០ %។

សូមបញ្ជាក់ថាឯកឧត្តមក៏បាននាំយកអំណោយមួយចំនួនចែកជូនដល់ក្មួយៗ លោកគ្រូអ្នកគ្រូក្នុងនោះមានសៀវភៅ   ថ្នាំដុសធ្មេញ ច្រាសដុសធ្មេញ និងទឹកដោះគោស្រស់ផងដែរ។