សមាជិកព្រឹទ្ធសភា៖ មាតាបិតាជំរុញកូនៗសិក្សាឲ្យបានខ្ពង់ខ្ពស់ដើម្បីអនាគតខ្លួនឯង គ្រួសារ ប្រទេសជាតិ

(កំពង់ធំ)៖លោកជំទាវ ឃួន ឃុនឌី សមាជិកព្រឹទ្ធសភានិងជាប្រធានក្រុមការងារចុះមូលដ្ឋានស្រុកកំពង់ស្វាយអំពាវនាវមាតាបិតាជំរុញកូនៗសិក្សាឲ្យបានខ្ពង់ខ្ពស់ដើម្បីអនាគតខ្លួនឯង គ្រួសារ ប្រទេសជាតិ ។

លោកជំទាវ ឃួន ឃុនឌី បានថ្លែងក្នុងពិធីប្រារព្ធទិវាអន្តរជាតិនារីលើកទី១១៤ ក្រោមប្រធានបទ « សិទ្ធ សមភាព និងភាពអង់អាចចំពោះស្រី្ត និងក្មេងស្រីគ្រប់រូប» នៅស្រុកកំពង់ស្វាយ រសៀលថ្ងៃទី៧ ខែមីនា ឆ្នាំ២០២៥ ត្រូវនឹងថ្ងៃសុក្រ៩កើត ខែ ផល្គុន ឆ្នាំរោង ឆស័ក ព.ស. ២៥៦៨ ។ ពិធីនេះមានការចូលរួមពីលោកជំទាវ យស ថានារី សមាជិករដ្ឋសភា លោកស្រី លំ គន្ធារី អភិបាលរងខេត្តកំពង់ធំ និងលោក អ៊ុត វណ្ណារ៉ា អភិបាលស្រុកកំពង់ស្វាយ និងលោកស្រី ព្រមទាំងតំណាងស្ត្រីនៅសាលាស្រុក និងមកពីបណ្ដាឃុំប្រមាណជិត២០០នាក់ ។

លោកជំទាវបានវាយតម្លៃខ្ពស់ចំពោះការជ្រើសរើសយកប្រធានបទស្តីពី« សិទ្ធ សមភាព និងភាពអង់អាចចំពោះស្រី្ត និងក្មេងស្រីគ្រប់រូប» ជាការដាក់ប្រធានបទដ៏សំខាន់ និងត្រឹមត្រូវដែលស្របទៅនឹងការវិវឌ្ឍនៃសង្គមជាតិ និងស្របតាមផែនការ យុទ្ធសាស្ត្ររបស់រាជរដ្ឋាភិបាលអាណត្តិទី៧ ដែលបានសម្រេចផ្តោតបច្ចេកវិទ្យាឌីជីថល។ ការជំរុញឱ្យស្ត្រីនិងយុវតីកម្ពុជាផ្សាភ្ជាប់ ជាមួយបច្ចេកវិទ្យាឌីជីលនេះ គឺនឹងផ្តល់អត្ថប្រយោជន៍ និងផលភាគចេញពីការអភិវឌ្ឍដែលបច្ចេកវិទ្យាឌីជីថលជាស្នូលសម្រាប់កម្ពុជា សិទ្ធិនារីត្រូវបានរដ្ឋាភិបាលកម្ពុជាតាំងពីក្រោយការរំដោះ៧មករា១៩៧៩មក បានបន្តយកចិត្តទុកដាក់ខ្ពស់ជាបន្តបន្ទាប់រហូតដល់អាណត្តិទី៧នេះ ខណៈដែលស្ត្រីបានដើរតួនាទីយ៉ាងសំខាន់ក្នុងការជួយជ្រោមជ្រែងសេដ្ឋកិច្ច និងការអភិវឌ្ឍសង្គមដែលធ្វើឱ្យកម្ពុជារីកចម្រើនដូចសព្វថ្ងៃ។

លោកជំទាវបន្តថាប្រសិនគ្មានស្ត្រីប្រៀបដូចដីប្រេះក្រហែងដូច្នេះបុរសត្រូវឲ្យតម្លៃភរិយាជាមេផ្ទះដែលខិតខំប្រឹងប្រែងធ្វើការងារមិនខ្លាចនឿយហត់ ហើយស្ត្រីត្រូវធ្វើខ្លួនឲ្យរឹងមាំមិនត្រូវទន់ជ្រាយ ធ្វើជាគំរូ ជួយយកចិត្តទុកដាក់ដល់ស្ត្រីពិសេសស្ត្រីនៅតាមជនបទ ។ ក្នុងនាមប្រធានក្រុមការងារលោកជំទាវបានសង្កត់ធ្ងន់ថាការប្រារព្ឋទិវាសិទ្ធិនារីនេះមិនមែនជាការប្រារព្ឋសម្រាប់និមិត្តរូបនោះទេតែជាការបង្ហាញការគោរពនិងការយកចិត្តទុកដាក់ទៅដល់ស្ត្រី ដែលកំពុងមានវត្តមានភាគច្រើនជាងបុរសនៅកម្ពុជា។

លោកជំទាវបានកោតសរសើរដល់ស្ត្រីក្នុងគោលដៅរំលឹកដល់ការតស៊ូ ព្យាយាម អត់ធ្មត់ និងចូលរួមធ្វើការកែប្រែឥរិយាបថ របស់មនុស្សឲ្យទទួលស្គាល់ និងផ្តល់ឱកាសដល់ស្រ្តី ទទួលបានអត្ថប្រយោជន៍ ពីធនធានសេដ្ឋកិច្ចសង្គម និងសិទ្ធិ ជាពលរដ្ឋស្មើគ្នាជាមួយបុរស ដើម្បីធ្វើឲ្យជីវិតរស់នៅ ឈានឆ្ពោះទៅរកភាពសុខដុមរម្យនា និងភាពសម្បូររុងរឿង រួចផុតពីភាពងាយរងគ្រោះ។

លោកជំទាវបញ្ជាក់ថាការចូលរួមរបស់បុរសនិងស្ត្រីដែលទទួលយកបាននូវសិទ្ធិស្មើគ្នាឱកាសដូចៗគ្នាហើយជាដៃគូរដ៏សក្តិសមនិងការទទួលបានការគាំទ្រយ៉ាងពេញទំហឹងពីរដ្ឋាភិបាលពីមជ្ឈដ្ឋានជាតិ អន្តរជាតិ និងសង្គមកម្ពុជាទាំងមូលជាពិសេសគឺស្រ្តីខ្លួនឯងផ្ទាល់សម្រាប់ផ្តល់ជាធនធានមនុស្សប្រកបដោយសមត្ថភាពនិងលក្ខណៈសម្បត្តិគ្រប់គ្រាន់ដើម្បីជំរុញពន្លឿនកិច្ចការអភិវឌ្ឍសង្គម និងសេដ្ឋកិច្ច ឱ្យឈានទៅរកភាព រីកចម្រើនរុងរឿង។
ជាមួយគ្នានេះលោកជំទាវ ឃួន ឃុនឌី អំពាវនាវឲ្យបងប្អូនទាំងអស់ផ្សព្វផ្សាយ អប់រំកូនចៅចូលរួមគោរពច្បាប់ចរាចរណ៍ ចៀសឆ្ងាយពីគ្រឿងញៀន ចៀសឆ្ងាយពីក្មេងទំនើង និងថែរក្សាសន្តិភាពគ្រប់ៗគ្នា ។