ប្រធានមន្ទីរព័ត៌មានខេត្តកំពង់ធំ ដឹកនាំកិច្ចប្រជុំប្រចាំខែកុម្ភៈ និងលើកទិសដៅខែបន្ទាប់ ឆ្នាំ២០២៦

(កំពង់ធំ)÷ លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានជួបសំណេះសំណាលជាមួយមន្ត្រីរាជការនិងដឹកនាំកិច្ចប្រជុំប្រចាំខែកុម្ភៈ និងលើកទិសដៅខែបន្ទាប់ ឆ្នាំ២០២៦ នារសៀលថ្ងៃទី១៣ ខែកម្ភៈ ឆ្នាំ២០២៦ នៅសាលប្រជុំមន្ទីរព័ត៌មានខេត្តកំពង់ធំ។

កម្មវិធីនេះក៏មានការអញ្ជើញចូលរួមពី លោកអនុប្រធាន មន្ទីរ ប្រធាន-អនុប្រធានការិយាល័យទាំង៥ មន្រ្តីរាជការ និងមន្រ្តីកិច្ចសន្យាជាច្រើនរូបផងដែរ។

ថ្លែងទៅកាន់មន្ត្រីរាជការលោកស្រី ង៉ែត ណារីន បានលើកឡើងថា វិស័យព័ត៌មាន គឺជាវិស័យដែលពាក់ព័ន្ធនឹងការប្រមូល ផលិត កែសម្រួល និងផ្សព្វផ្សាយព័ត៌មានទៅកាន់សាធារណជន តាមរយៈមធ្យោបាយផ្សេងៗ។ វាជាវិស័យសំខាន់មួយក្នុងសង្គម ព្រោះវាជួយឱ្យប្រជាជនទទួលបានព័ត៌មាន ត្រឹមត្រូវ និងទាន់ពេលវេលា។  ប្រធានការិយាល័យនីមួយៗ ធ្វើផែនការប្រចាំឆ្នាំនិងផែនការសកម្មភាពជារៀងរាល់ខែ ដើម្បីឱ្យក្រុមការងារចុះផលិតវីដេអូខ្លីៗ ផលិតព័ត៌មានផ្សេងៗ និងបទយកការណ៍ដែលទាក់ទងទៅនឹងការរីកចម្រើននៅក្នុងខេត្ត និងនៅតាមមូលដ្ឋាន។

លោកស្រីប្រធានមន្ទីរព័ត៌មានខេត្ត បានលើកឡើងពីទិសដៅសម្រាប់អនុវត្តខែបន្ទាប់មាន÷ បង្កើនការចុះផលិតព័ត៌មានឱ្យបានច្រើនដើម្បីផ្សព្វផ្សាយតាមវិទ្យុខេត្ត ទូរទស្សន៍ខេត្ត ទូរទស្សន៍ជាតិកម្ពុជា និងគេហទំព័រនានា។ បង្កើនការផ្សព្វផ្សាយដល់អ្នកសារព័ត៌មានឱ្យមកធ្វើការចុះបញ្ជីឱ្យបានគ្រប់ៗគ្នា។ បង្កើនគុណភាពការផ្ដល់សេវាសាធារណៈ លើវិស័យព័ត៌មាន និងសោទស្សន៍ដល់មូលដ្ឋាន។ បង្កើនការទំនាក់ទំនងជាមួយមន្ទីរអង្គភាពក្រុង/ស្រុកទាំងអស់ដើម្បីយកព័ត៌មានមកចេញផ្សាយជូនឱ្យបានទាន់ពេលវេលា និងត្រឹមត្រូវ។

ជាចុងក្រោយលោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ បានបានផ្ដាំផ្ញើដល់មន្ត្រីទាំងអស់ ត្រូវបន្តពង្រឹងពីតួនាទី/ភារកិច្ចរបស់ខ្លួន និងគោរពម៉ោងការងារឱ្យបានត្រឹមត្រូវ។  បន្តពង្រឹងគុណភាពនៃការផ្សព្វផ្សាយព័ត៌មាន បង្កើនការប្រើប្រាស់បច្ចេកវិទ្យាឌីជីថល លើកកម្ពស់សមត្ថភាពមន្ត្រីតាមរយៈការបណ្តុះបណ្តាល និងបន្តសហការជាមួយអាជ្ញាធរមូលដ្ឋាន ដើម្បីធានាថាព័ត៌មានដែលចែកចាយទៅសាធារណៈមានភាពត្រឹមត្រូវ សុចរិត និងទាន់សម័យ។

លោកស្រីប្រធានមន្ទីរ ក៏បានជំរុញឲ្យមន្ត្រីទាំងអស់បន្តអនុវត្តការងារដោយមានវិន័យ ទទួលខុសត្រូវខ្ពស់ និងសហការគ្នាឲ្យបានល្អប្រសើរ ដើម្បីរួមចំណែកអភិវឌ្ឍវិស័យព័ត៌មាននៅក្នុង ខេត្តកំពង់ធំ ឲ្យកាន់តែរីកចម្រើន។អត្ថបទធូរកែវមុន្នី.ពិនិត្យអ៊ុមញឹប។