ឯកឧត្តម ងួន រាសី បានថ្លែងថា ក្រុមការងារទាំងអស់មានតួនាទីចុះត្រួតពិនិត្យ អាជ្ញាប័ណ្ណ លិខិតអនុញ្ញាតប្រកបអាជីវកម្មទទួលបញ្ចាំ និងទទួលប្រាតិភោគដោយអនុប្បទាន និងអនុវត្តទៅតាមភារកិច្ចផ្សេងៗដែលបានកំណត់ក្នុងសេចក្តីសម្រេច

(កំពង់ធំ)÷ ឯកឧត្តម ងួន រាសី អភិបាលរងខេត្តកំពង់ធំបានថ្លែងថា ក្រុមការងារទាំងអស់មានតួនាទីចុះត្រួតពិនិត្យ អាជ្ញាប័ណ្ណ លិខិតអនុញ្ញាតប្រកបអាជីវកម្មទទួលបញ្ចាំ និងទទួលប្រាតិភោគដោយអនុប្បទាន និងអនុវត្តទៅតាមភារកិច្ចផ្សេងៗដែលបានកំណត់ក្នុងសេចក្តីសម្រេច ។ ឯកឧត្តមបានថ្លែងដូច្នេះនៅក្នុងឱកាសដែលឯកឧត្តមបានដឹកនាំក្នុងកិច្ចប្រជុំត្រួតពិនិត្យការងារគ្រប់គ្រងអាជីវកម្ម ហាងបញ្ចាំ និងទទួលប្រាតិភោគដោយអនុប្បទាន ក្នុងភូមិសាស្ត្រខេត្តកំពង់ធំ នៅព្រឹកថ្ងៃទី០៧ ខែមីនា ឆ្នាំ២០២៥ នៅសាលប្រជុំសាលាខេត្តកំពង់ធំ។

 នៅក្នុងឱកាសនេះឯកឧត្តម ងួន រាសី បានបញ្ជាក់ថាដោយអនុវត្តតាមលិខិតលេខ០៣០ សហវ.ប្រក ចុះថ្ងៃទី១៣ ខែមករា ឆ្នាំ២០១៧ ស្តីពីការគ្រប់គ្រងអាជីវកម្មទទួលបញ្ចាំ និងទទួលប្រាតិភោគដោយអនុប្បទាន របស់ក្រសួងសេដ្ឋកិច្ច និងហិរញ្ញវត្ថុ និងលិខិតលេខ១០៨ អនក្រ.បក ចុះថ្ងៃទី៣០ ខែឧសភា ឆ្នាំ២០២៣ ស្តីពីការគ្រប់គ្រង អាជីវកម្មបញ្ចាំ និងប្រាតិភោគដោយអនុប្បទាន របស់រាជរដ្ឋាភិបាលកម្ពុជា ក្នុងគោលបំណង ធានាប្រសិទ្ធភាពនៃការគ្រប់គ្រង និងការត្រួតពិនិត្យអាជីវកម្ម ទទួលបញ្ចាំ និងទទួលប្រាតិភោគដោយ អនុប្បទាន រួមទាំងធានាសមធម៌ និងតុល្យភាព នៃផល ប្រយោជន៍រវាងអ្នកដាក់បញ្ចាំ និងអ្នកទទួល ទ្រព្យបញ្ចាំ និងរួមចំណែកទប់ស្កាត់ផលប៉ះពាល់ អវិជ្ជមានក្នុងវិស័យទទួលបញ្ចាំ និងកំណត់វិធាន និងនីតិវិធីនៃការគ្រប់គ្រង និងការត្រួតពិនិត្យអាជីវកម្មបញ្ចាំ និងប្រាតិភោគដោយអនុប្បទាន នៅក្នុង ព្រះរាជាណាចក្រកម្ពុជា។ 

ឯកឧត្តមអភិបាលរងខេត្តបានបន្តទៀតថា ដើម្បីធានាដល់ការអនុវត្តការងារគ្រប់គ្រងហាងបញ្ចាំ និងទទួលប្រាតិភោគ ដោយអនុប្បទាន ទទួលបានលទ្ធផលល្អប្រសើរនោះ នៅក្នុងឆ្នាំ២០២៣ រដ្ឋបាលខេត្តកំពង់ធំ បានចេញសេចក្តីសម្រេចលេខ១៦៩/២៣ សសរ ចុះថ្ងៃទី២០ ខែកញ្ញា ឆ្នាំ២០២៣ ស្តីពីការបង្កើតក្រុម ការងារចុះពិនិត្យទីតាំងអាជីវកម្មទទួលបញ្ចាំ និងទទួលប្រាតិភោគ ដោយអនុប្បទាន ក្នុងភូមិសាស្ត្រ ខេត្តកំពង់ធំ។ ដែលក្រុមការងារទាំងអស់មានតួនាទីចុះត្រួតពិនិត្យ អាជ្ញាប័ណ្ណ លិខិតអនុញ្ញាតប្រកប អាជីវកម្មទទួលបញ្ចាំ និងទទួលប្រាតិភោគដោយអនុប្បទាន និងអនុវត្តទៅតាមភារកិច្ចផ្សេងៗដែល បានកំណត់ក្នុងសេចក្តីសម្រេច។

ទន្ទឹមនឹងគ្នានេះផងដែរ រដ្ឋបាលខេត្តកំពង់ធំ បានចេញលិខិតលេខ ៥៣៥៥/២៤ សជណ ចុះថ្ងៃទី១៦ ខែឧសភា ឆ្នាំ២០២៥ ស្តីពីការផ្តល់ទិន្នន័យហាងបញ្ចាំក្នុងភូមិសាស្ត្រខេត្តកំពង់ធំ និងឯកសារ ពាក់ព័ន្ធ (លិខិតអនុញ្ញាតអាជីវកម្ម) ដល់មន្ទីរសេដ្ឋកិច្ច និងហិរញ្ញវត្ថុ, សាខាពន្ធដារខេត្ត និងតាម បណ្តាក្រុង/ស្រុកទាំង៩ ក្នុងខេត្តកំពង់ធំ។ បន្ទាប់ពីមន្ទីរ-អង្គភាពពាក់ព័ន្ធ និងក្រុង/ស្រុក ទទួលបានលិខិតរបស់រដ្ឋបាលខេត្តនោះ ក៏បានធ្វើបច្ចុប្បន្នភាពអាជីវកម្មហាងបញ្ចប់គ្រប់ប្រភេទ ក្នុងភូមិសសាស្ត្រខេត្តកំពង់ធំ ដែលបានហាងបញ្ចាំសរុបចំនួន៤៨កន្លែង ក្នុងនោះហាងបញ្ចាំដែលធ្វើ អាជីវកម្មដោយមានអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុមានចំនួន០៨កន្លែង ហាងបញ្ចាំ ដែលធ្វើអាជីវកម្មដោយមានលិខិតអនុញ្ញាតពីមន្ទីរសេដ្ឋកិច្ច និងហិរញ្ញវត្ថុមាន ចំនួន១៨កន្លែង និងហាងបញ្ចាំដែលធ្វើអាជីវកម្មដោយមិនមានវលិខិតអនុញ្ញាតមានចំនួន២២កន្លែង។

ឯកឧត្តម ងួន រាសី អភិបាលរងខេត្ត បានសម្រេចក្នុងកិច្ចប្រជុំនេះផងដែរ អង្គប្រជុំបានឯកភាព និងដាក់ទិសដៅបន្តដូចខាងក្រោម៖ ១.គួរផ្សព្វផ្សាយដល់អាជ្ញាធរពាក់ព័ន្ធ និងអាជីវករឱ្យបានយល់ដឹងអំពីនីតិវិធីផ្សេងៗ ពាក់ព័ន្ធ ហាងបញ្ចាំ និងប្រាតិភោគដោយអនុប្បទាន។ ២.ក្រុង/ស្រុក និងសមត្ថកិច្ចពាក់ព័ន្ធត្រូវធ្វើទិន្នន័យហាងបញ្ចាំឱ្យបានច្បាស់លាស់ ដើម្បីងាយស្រួល ក្នុងការគ្រប់គ្រង។ ៣.គួរមានកិច្ចប្រជុំក្រុមការងារគ្រប់គ្រងហាងបញ្ចាំរៀងរាល់ ៣ខែម្តង ដើម្បីតាមដាន និងត្រួតពិនិត្យ ការងារហាងបញ្ចាំ និងប្រាតិភោគដោយអនុប្បទាន។ ៤.ករណីចាំបាច់គួរចុះពិនិត្យហាងបញ្ចាំគ្រប់ក្រុង/ស្រុក ក្នុងភូមិសាស្ត្រខេត្តកំពង់ធំ។ ៥. សូមឱ្យក្រុង/ស្រុក ធ្វើលិខិតអញ្ជើញដល់ហាងបញ្ចាំទាំងអស់ចូលរួមប្រជុំជាមួយរដ្ឋបាលខេត្ត ដើម្បីយល់កាន់ច្បាស់ពីអាជីវកម្មរបស់គាត់។

កាលពីថ្ងៃទី២៦ ខែកញ្ញា ឆ្នាំ២០២៤ ឯកឧត្តម ងួន រាសី អភិបាលរងខេត្ត បានដឹកនាំក្រុមការងារខេត្ត ដែលមានមន្ទីរជំនាញ រដ្ឋបាលក្រុងស្ទឹងសែន និងសមត្ថកិច្ចពាក់ព័ន្ធ បានចុះត្រួតពិនិត្យហាង បញ្ចាំគ្រប់ប្រភេទដល់ទីតាំងជាក់ស្តែង ក្នុងភូមិសាស្ត្រខេត្តកំពង់ធំ បានចំនួន១៧ទីតាំង។ 
អត្ថបទលោក ធូ កែវមុន្នី-ពិនិត្យនិងកែសម្រួលដោយអ៊ុមញឹប។