ទិវាអភិវឌ្ឍន៍វិជ្ជាជីវៈគ្រូពេទ្យខេត្តកំពង់ធំ នឹងជំរុញឱ្យគ្រូពេទ្យ បង្កើន ក្រមសីលធម៌វិជ្ជាជីវៈ តាមរយៈសិក្ខាសាលា
(កំពង់ធំ) ៖ លោកវេជ្ជបណ្ឌិត ប៉ឹក គីមសាន អនុប្រធានមន្ទីរសុខាភិបាលខេត្តកំពង់ធំ និងលោកវេជ្ជបណ្ឌិត ញ៉ែម ពីង ប្រធានក្រុមប្រឹក្សាគណៈគ្រូពេទ្យខេត្ត អញ្ជើញចូលរួមក្នុងអង្គសិក្ខាសាលាទិវាអភិវឌ្ឍន៍វិជ្ជាជីវៈគ្រូពេទ្យខេត្តកំពង់ធំ ក្រុមប្រឹក្សា គណៈគ្រូពេទ្យជាតិ សមាជិកសមាជិកា ក្រុមប្រឹក្សា មកពីខេត្តកំពង់ធំ, តំណាងក្រុមហ៊ុនឱសថនានា និង អ្នកពាក់ព័ន្ធ សរុបជាង២០០នាក់ និងលោក លោកស្រីវេជ្ជបណ្ឌិត គ្រូពេទ្យ ដែលបានចូលរួមតាមរយៈប្រព័ន្ធអនឡាញ Zoom គ្រប់បណ្តា២៥ រាជធានី-ខេត្ត ដោយប្រារព្ធឡើងនៅសណ្ឋាគារគ្លរៀស ខេត្តកំពង់ធំ នាព្រឹកថ្ងៃទី២១ ខែកុម្ភៈ ឆ្នាំ២០២៥។
លោកវេជ្ជបណ្ឌិត ញ៉ែម ពីង ប្រធានក្រុមប្រឹក្សាគណៈគ្រូពេទ្យខេត្តបានឡើងរាយការណ៍សង្ខេប ស្តីពីសកម្មភាពរបស់ក្រុមប្រឹក្សាគណៈគ្រូពេទ្យ ខេត្តកំពង់ធំ ដែលបានអនុវត្តក្នុងពេលកន្លងមកនេះ តាមការណែនាំ និងចង្អុលបង្ហាញពី គណៈគ្រូពេទ្យជាតិកម្ពុជា។ លោកបានបន្តថាអាជ្ញាបណ្ណទទួលបានពីថ្នាក់ជាតិ, ឆ្នាំ២០២៣ បានទទួលសរុប ១០៥ ស្រី១៦ អាជ្ញាបណ្ណ, ឆ្នាំ២០២៤ បានទទួលសរុប ១០០ ស្រី១២ អាជ្ញាបណ្ណ, ឆ្នាំ២០២៥ បានទទួលសរុប ១៣ ស្រី៣ អាជ្ញាបណ្ណ ។
លោកវេជ្ជបណ្ឌិត ប៉ឹក គីមសាន អនុប្រធានមន្ទីរសុខាភិបាលខេត្តកំពង់ធំ បានស្រង់យកអនុសាសន៍ជាគន្លឹះធំៗ ចំនួន៥ របស់ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល អំឡុងពេលឯកឧត្តមរដ្ឋមន្ត្រី បានដឹកនាំប្រជុំគណៈវិជ្ជាជីវៈទាំង៥ នាពេលកន្លងមកដូចតទៅ ៖
១- ពង្រឹងកិច្ចសហប្រតិបត្តិការរវាងគណៈវិជ្ជាជីវៈសុខាភិបាលទាំងអស់ ក៏ដូចជា ជាមួយភាគីពាក់ព័ន្ធនានា និង គ្រប់កម្រិតទាំងថ្នាក់ ជាតិ រាជធានីខេត្ត និងថ្នាក់មូលដ្ឋាន(មន្ទីរពេទ្យ និងមណ្ឌលសុខភាព) ទាំងរដ្ឋ និងឯកជន។
២- ពង្រឹងតួនាទី និងភារកិច្ចដើម្បីធានាបាននូវក្រមសីលធម៌, វិន័យ និង វិធីសាស្ត្រ ក្នុង ការបំពេញការងារ។
៣- ចូលរួមពង្រឹងការអនុវត្តច្បាប់ និងបទបញ្ញតិនានា ទាំងផ្នែកសាធារណៈ និងឯកជន ដើម្បីធានាគុណភាព និង សុវត្ថិភាព សេវាសុខាភិបាល។
៤- ពង្រឹងសមត្ថភាពទាំងស្ថាប័ន វិជ្ជាជីវៈទាំងមុនពេលបម្រើការងារ និងពេលកំពុងបម្រើការងារ។
៥- ក្នុងការបំពេញភារកិច្ចត្រូវប្រកាន់ខ្ជាប់នូវស្មារតីយុត្តិធម៌,ក្រមសីលធម៌,ព័ត៌មានបច្ចេកវិទ្យានិងសមាហរណកម្ម។ អត្ថបទ ចន្ថា បុណ្យឫទ្ធិ-រូបភាព យីម ប៊ុនហ័រ-ពិនិត្យដោយអ៊ុមញឹប។
