លោកឧត្តមសេនីយ៍ទោ ហេង សុផល បានដឹកនាំកិច្ចប្រជុំ បូកសរុបលទ្ធផលការងារប្រចាំខែកុម្ភៈ ត្រីមាសទី១ ឆ្នាំ ២០២៥ និងដាក់គោលការណ៍០៧ចំណុច ដល់កងកម្លាំងដើម្បីបង្ការ ទប់ស្កាត់ បទល្មើសគ្រប់ប្រភេទ

(កំពង់ធំ)÷ លោកឧត្តមសេនីយ៍ទោ ហេង សុផល ស្នងការនគរបាលខេត្ត បានថ្លែងដូច្នេះនៅក្នុងឱកាសដែលលោកបានជួបសំណេះសំណាលជាមួយកងកម្លាំងគឺទោះបីជា បទល្មើសព្រហ្មទណ្ឌ និងបទល្មើសផ្សេងៗ មានការថយចុះ ត្រូវតែប្រើប្រាស់វិធានការសរុប កម្លាំងសរុប និងមធ្យោបាយសរុប ដើម្បីសំដៅបង្ការ ទប់ស្កាត់ បទល្មើសគ្រប់ប្រភេទ និងធានារក្សាសន្តិសុខ សុវត្ថិភាព សណ្ដាប់ធ្នាប់ ជូនប្រជាពលរដ្ឋឱ្យបានទាន់ពេលវេលា។

នៅរសៀលថ្ងៃទី១៩ ខែកុម្ភៈ ឆ្នាំ ២០២៥ លោកឧត្តមសេនីយ៍ទោ ហេង សុផល ស្នងការនគរបាលខេត្ត មានជួបសំណេះសំណាលជាមួយកងកម្លាំង ក្នុងកិច្ចប្រជុំប្រចាំខែ និងត្រីមាសទី១ គឺត្រួតពិនិត្យលើបញ្ហាប្រឈម ក្នុងការអនុវត្តតួនាទី/ភារកិច្ច នាពេលកន្លងមក ដើម្បីផ្លាស់ប្ដូរយោបល់ លើកទិសដៅអនុវត្តបន្ត ឈានទៅសម្រេចបានជោគជ័យថ្មីៗ បន្ថែមទៀត។ កងកម្លាំងដែលបានអញ្ជើញចូលរួមប្រមាណជាង២០០នាក់ នៅសាលប្រជុំស្នងការនគរបាលខេត្តកំពង់ធំ។

លោកឧត្តមសេនីយ៍ទោ ហេង សុផល បានដាក់គោលការណ៍០៧ចំណុចដល់កងកម្លាំង ដើម្បីឱ្យអនុវត្តប្រកបដោយប្រសិទ្ធភាព រួមមាន÷ ១.ការងារព្រហ្មទណ្ឌ ត្រូវ បង្កើនការអនុវត្តច្បាប់ សំដៅបង្ការ ទប់ស្កាត់ បទល្មើស លួច ឆក់ ប្លន់ ក្មេងទំនើង ល្បែងស៊ីសង និងបង្ក្រាបទាន់ពេលវេលា និងមានប្រសិទ្ធភាពខ្ពស់។ ២.ការងារប្រឆាំងបទល្មើសគ្រឿងញៀន ត្រូវបង្ក្រាបដូចភ្លៀងរលឹម។ ៣.ការងារចរាចរណ៍ផ្លូវគោក ត្រូវរឹងបន្តឹងការអនុវត្តច្បាប់ចរាចរណ៍ផ្លូវគោកតាមគោលការណ៍។ ៤.ការងារអន្តោប្រវេសន៍ ពង្រឹងការគ្រប់គ្រងវត្តមានជនបរទេស ដែលស្នាក់នៅក្នុងមូលដ្ឋាន ឬូទាំងខេត្តកំពង់ធំ។ ៥.ការងារអត្តសញ្ញាណកម្ម បន្តបង្កើនការផ្តល់សេវារដ្ឋបាល ជូនប្រជាពលរដ្ឋ ប្រកបដោយទំនុកចិត្ត និងទាន់ចិត្ត។ ៦.បន្តថែរក្សាកត្តាសាមគ្គី ឯកភាពផ្ទៃក្នុង ចេះជួយគ្នាក្នុងគ្រាជួបទុក្ខលំបាក។ ៧• លោកស្នងការ បានផ្ដាំផ្ញើ ដល់ថ្នាក់ដឹកនាំ ផែនការងារជំនាញ និងអធិការនគរបាលក្រុង-ស្រុក ត្រូវពង្រឹងការដឹកនាំបញ្ជា លើការងារអនុវត្ត តួនាទី/ភារកិច្ច ប្រចាំថ្ងៃ ។

លោកឧត្តមសេនីយ៍ទោ ហេង សុផល ស្នងការនគរបាលខេត្ត បានផ្ដាំផ្ញើដល់ប៉ុស្តិ៍នគរបាលរដ្ឋបាលឃុំ ដែលជួបបញ្ហាប្រឈម ត្រូវបញ្ជុះកម្លាំងពីអធិការដ្ឋាននគរបាលស្រុក-ក្រុង ឬពីស្នងការដ្ឋាននគរបាលខេត្ត តាមការកំណត់ណាមួយដើម្បីជួយទ្រោលភាពការណ៍ ដល់់ប៉ុស្តិ៍នគរបាលរដ្ឋបាល (ជូនសេនាធិការ និងធនធានពិនិត្យ)។ ត្រូវមានការផ្លាស់ប្ដូរវេនប្រចាំការ២៤ម៉ោងលើ ២៤ម៉ោង ក្នុងអង្គភាពសម្រាប់កិច្ចប្រតិបត្តិការ រក្សា ការពារ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ បង្កើនការផ្សព្វផ្សាយគោលនយោបាយ “ភូមិ-ឃុំ-សង្កាត់មានសុវត្ថិភាព” តាមវេទិកាសាធារណៈ ដល់មហាជន គ្រប់ស្រទាប់វណ្ណៈ ដើម្បីលើកកម្ពស់ ការយល់ដឹង និងចូលរួមអនុវត្តឱ្យមានលទ្ធផលល្អប្រសើរ។ បង្កើនការល្បាត ផ្លាស់ប្តូរវេនប្រចាំការ តាមគោលដៅងាយរងគ្រោះ តាមមូលដ្ឋាន ភូមិ-ឃុំ-សង្កាត់ដែលខ្លួនទទួលត្រូវ។ អត្ថបទស្នងការនគរបាលខេត្តកំពង់ធំ-ពិនិត្យដោយអ៊ុមញឹប។