សង្គមមួយរីកចម្រើន ឬអន់ថយក៏អាស្រ័យលើអក្សរសិល្ប៍ដែរ។ អក្សរសិល្ប៍ដែលជាវណ្ណកម្ម ប្រវត្តិសាស្ត្របានបន្សល់ទុកមកដល់សព្វថ្ងៃ សុទ្ធតែបានផ្ទុកនូវចំណេះដឹងដ៏ជ្រាលជ្រៅស្តីពីបាតុភូតជាក់ស្តែងនៃជីវិត ហើយថែមទាំងឆ្លុះ បញ្ចាំងនូវបាតុភូតទាំងឡាយដែលមាននៅក្នុង សង្គម ពិសេសទៅតាមក្រឹត្យក្រមនៃការ រីកចម្រើនជាក់ស្ដែងរបស់សង្គមជាតិនីមួយៗ។ នេះជាការថ្លែងរបស់ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន ក្នុងឱកាសអញ្ជើញជាអធិបតីពិធីប្រគល់វិញ្ញាបនបត្របញ្ជាក់ការសិក្សាជូនសិក្ខាកាមវគ្គបណ្តុះបណ្តាលសមាគមអ្នកនិពន្ធខ្មែរ វគ្គ ៣៤ ៣៥ និង៣៦ នៅព្រឹកថ្ងៃទី២៧ ខែមករា ឆ្នាំ២០២៥ នាសាលចុម្មុខមង្គលទីស្តីការក្រសួងព័ត៌មាន ។

ពិធីប្រគល់វិញ្ញាបនបត្រនេះក៏មានការអញ្ជើញចូលរួមពី ឯកឧត្តម ជ័យ ចាប ប្រធានក្រុមប្រឹក្សាភិបាលសមាគមអ្នកនិពន្ធខ្មែរ និងជាទីប្រឹក្សាក្រសួងព្រះបរមរាជវាំង ។

ឯកឧត្តម រដ្ឋមន្ត្រី នេត្រ ភក្ត្រា ទីប្រឹក្សាកិត្តិយសសមាគមអ្នកនិពន្ធខ្មែរ បានគូសបញ្ជាក់ថា អក្សរសិល្ប៍ក៏មានតួនាទីយ៉ាងសំខាន់ដែលបានផ្តល់ឱ្យអ្នកអាន អ្នកសិក្សានូវចំណេះដឹងស្តីពីជីវិត និង បញ្ហាសង្គម មនុស្សដែលទាក់ទងនឹងទំនៀមទម្លាប់ ប្រពៃណី ភូមិសាស្ត្រ និងប្រវត្តិសាស្រ្តជាដើម។ អក្សរសិល្ប៍គឺជាសិល្បៈដើម្បីផ្លាស់ប្តូរបរិយាកាស ធ្វើឱ្យអ្នកអានបានជ្រួតជ្រាប ទទួលអារម្មណ៍ រីករាយ សោកសង្រេងទៅ តាមដំណើររឿងដែលអ្នកនិពន្ធបង្ហាញនូវភស្តុតាងជាក់ស្តែងក្នុងបរិយាកាសសង្គមនីមួយៗ។

ឯកឧត្តម បានគូសបញ្ជាក់ដែរថា អក្សរសាស្ត្រ អក្សរសិល្ប៍មានតួនាទីដ៏សំខាន់ក្នុងការអប់រំបញ្ជ្រៀប និងបំផុសស្មារតីយុវជន មហាជន តាមរយៈស្នាដៃតែងនិពន្ធ ប្រលោមលោក និងកំណាព្យ ដែលបានបង្កប់នូវគំនិត និងទស្សនៈល្អៗ មានគុណប្រយោជន៍ក្នុង ការលើកកម្ពស់ការអប់រំសីលធម៌ គុណធម៌ និងបណ្តុះគំនិត ក៏ដូចជាការកែប្រែឥរិយាបថមនុស្សជាតិ ចូលរួមចំណែកដល់ការអភិវឌ្ឍសង្គមទៀតផង។ ដូច្នេះយើងត្រូវការអ្នកនិពន្ធដែលមាន ចំណេះដឹង ជាមួយនឹងគំនិតច្នៃប្រឌិត ការបង្កើតថ្មីដើម្បីលើកស្ទួយគុណភាព និងប្រសិទ្ធភាព នៃស្នាដៃរបស់ខ្លួនក្នុងការបម្រើអារម្មណ៍អ្នកអានប្រកប ដោយភាពថ្លៃថ្នូរ។ សំខាន់ជាងនេះទៅទៀតអ្នកនិពន្ធ កវីនិពន្ធ ត្រូវឈ្វេងយល់ឱ្យបានស៊ីជម្រៅចំពោះអត្តសញ្ញាណជាតិ ដួងព្រលឹង ពណ៌សម្បុរដ៏ល្អផូរផង់របស់ជាតិ ដែលជាចំណេះដឹងគ្រប់ វិស័យ មិនអាចខ្វះបានចំពោះអ្នកនិពន្ធ «សៀវភៅល្អដែលអ្នកបានអាន គឺដោយសារ អ្នកនិពន្ធពូកែ»។

នៅក្នុងឱកាសនេះដែរ ឯកឧត្តម រដ្ឋមន្ត្រី នេត្រ ភក្ត្រា បានថ្លែងនូវការកោតសរសើរ និងថ្លែង អំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់សមាគមអ្នកនិពន្ធខ្មែរ អ្នកនិពន្ធ កវីនិពន្ធ រៀមច្បងទាំងអស់ដែលបានលះបង់កម្លាំងកាយ ចិត្ត ប្រាជ្ញាស្មារតី ចូលរួមបង្ហាត់បង្ហាញ ចែករំលែក នូវចំណេះដឹង និង បទពិសោធផ្ទាល់ខ្លួន ជូនសិក្ខាកាមគ្រប់វគ្គសិក្សាកន្លងមក ដោយមិនខ្លាចការនឿយហត់។ តាមរយៈនេះ ឯកឧត្តម រដ្ឋមន្ត្រី បានសំណូមពរដល់ អ្នកនិពន្ធ កវីនិពន្ធរៀមច្បងទាំងអស់ សូមបន្តនូវវប្បធម៌ចែករំលែកចំណេះដឹង បទពិសោធល្អៗ ជូនដល់អ្នកនិពន្ធ ជំនាន់ក្រោយទៀត ក្នុងនាមជាអ្នកថែរក្សា កេរដំណែល មរតក វប្បធម៌ សម្រាប់មនុស្សជំនាន់ក្រោយ។

ឯកឧត្តម ព្រឿង ប្រណីត ប្រធានសមាគមអ្នកនិពន្ធខ្មែរ បានជម្រាបជូនពីបេសកកម្មការងាររបស់សមាគមគឺ និពន្ធ ស្រាវជ្រាវ ចងក្រង ចែករំលែកស្នាដៃនិពន្ធ ចែករំលែកស្នាដៃនិពន្ធ បណ្តុះបណ្តាល ក៏ដូចជាការជម្រុញវប្បធម៍តែងនិពន្ធជាន់ខ្ពស់ សម្រាប់អ្នកនិពន្ធជំនាន់ក្រោយប្រកបដោយគុណវុឌ្ឍិ ។ ជាមួយនេះ លើកទឹកចិត្តចំពោះស្នាដៃនិពន្ធដែលមាន នវានុវត្តន៍ គុណតម្លៃ គុណភាព ដើម្បីរួមចំណែកដល់ការអប់រំ ការលើកកម្ពស់សុខដុមភាព វប្បធម៌ សាសនា និងការយល់ដឹងពីអក្សរសាស្រ្ត និងអក្សរសីល សិល្បៈ ប្រវត្តិសាស្ត្រ និងវិទ្យាសាស្ត្រ នៃវឌ្ឍនភាពរបស់សង្គម ប្រកបទៅដោយឆន្ទៈ មនសិការ និងកិត្យានុភាព នៃសុខដុមនីយកម្ម សន្តិភាពរបស់ប្រជាជាតិកម្ពុជា ។ ទាក់ទងការងារបណ្តុះបណ្តាល សមាគមអ្នកនិពន្ធខ្មែរ រហូតមកដល់ពេលនេះ មានសិក្ខាកាមចូលរួមបានចំនួនប្រមាណជាង ២ ៥០០ អង្គ នាក់ ហើយសម្រាប់សិក្ខាកាមទាំង ៣ វគ្គ ៣៤ ៣៥ និង៣៦ មានចំនួនប្រមាណ ១៦០ អង្គនាក់ ត្រូវទទួលបានវិញ្ញាបនបត្របញ្ជាក់ការសិក្សានាឱកាសនេះ ៕ អត្ថបទ៖ ទទក