ឧត្ដមសេនីយ៍ទោ សោម ស៊ុន សំណេះសំណាលសាកសួរសុខទុក្ខ នាយទាហាន កំពុងសម្រាកវះកាត់ និងព្យាបាលជំងឺនៅមន្ទីរពេទ្យយោធា នាទីក្រុងភ្នំពេញ
(ខេត្តកំពង់ធំ)៖ នៅរសៀលថ្ងៃទី១៩ ខែមេសា ឆ្នាំ២០២៥ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឆ្លៀតពេល ដឹកនាំសហការី ទៅសំណេះសំណាលសាកសួរសុខទុក្ខលោកវរសេនីយ៍ត្រី រស់ គីម មេបញ្ជាការរង ផ្នែកសឹករងបារាយណ៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងវះកាត់ និងព្យាបាលជំងឺ នៅមន្ទីរព្រះកេតុមាលា ឫមន្ទីរពេទ្យយោធា ១.៧៩ នារាជធានីភ្នំពេញ។
លោកវរសេនីយ៍ត្រី រស់ គីម បានបញ្ជាក់ថា លោកបានមកសម្រាកព្យាបាល វះកាត់ព្យាបាលជំងឺនៅក្នុងមន្ទីរពេទ្យព្រះកេតុមាលា នេះមានរយៈពេល៣ថ្ងៃ កន្លងមកហេីយ ហើយត្រូវធ្វើការវះកាត់នៅរសៀលថ្ងៃនេះ។ ក្នុងការសម្រាកព្យាបាលជំងឺកន្លងមកនេះ ត្រូវបានលោកវេជ្ជបណ្ឌិត និងក្រុមគ្រូពេទ្យបានយកចិត្តទុកដាក់ ព្យាបាលជំងឺ បានល្អប្រសើរ ហើយបានសូមថ្លែងអំណរគុណដ៏ជ្រាលជ្រៅជាទីបំផុតចំពោះការយកចិត្តទុកដាក់របស់ក្រុមគ្រូពេទ្យក្នុងការព្យាបាលជំងឺរបួសរបស់គាត់ នៅពេលនេះ ។
ឧត្ដមសេនីយ៍ សោម ស៊ុន បានសូមថ្លែងអំណរគុណដ៏ជ្រាលជ្រៅជាទីបំផុតចំពោះលោកវេជ្ជបណ្ឌិត និងក្រុមគ្រូពេទ្យនៃមន្ទីរពេទ្យព្រះកេតុមាលា ឬមន្ទីរពេទ្យយោធា ១.៧៩ ដែលបានយកចិត្តទុកដាក់ក្នុងការព្យាបាលជំងឺ របួស ជូនដល់នាយទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងបានផ្តាំផ្ញើដល់លោកវរសេនីយ៍ត្រី រស់ គីម មេបញ្ជាការរងផ្នែកសឹករងបារាយណ៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងភរិយា ត្រូវអនុវត្តន៍ឲ្យបានល្អតាមវេជ្ជបញ្ជា និងការណែនាំរបស់ក្រុមគ្រូពេទ្យ និងត្រូវយកចិត្តទុកដាក់ថែទាំជំងឺ និងថែរក្សាសុខភាពឲ្យបានល្អ ឆាប់បានជាសះស្បើយ វិលត្រឡប់ទៅកាន់លំនៅឋាន និងបម្រើការងារនៅក្នុងអង្គភាពវិញ ។
នៅក្នុងឱកាសនេះ ឧត្តមសេនីយ៍ទោសោម ស៊ុន និងសហការី បាននាំយកនូវកន្ត្រកផ្លែឈើ ទឹកដោះគោឆៅ និងថវិកាមួយចំនួន ឧបត្ថម្ភជូនលោកវរសេនីយ៍ត្រី រស់ គីម និងភរិយា ដែលកំពុងមើលថែទាំជំងឺ សម្រាប់បំប៉នសុខភាព និងចាត់ចែងតាមសេចក្ដីត្រូវការ ក្នុងការព្យាបាលជំងឺនេះផងដែរ ។
លោកវរសេនីយ៍ត្រី រស់ គីម មេបញ្ជាការរង ផ្នែកសឹករងបារាយណ៍បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងសហការី ដែលបានឆ្លៀតឱកាសដ៏មមាញឹកក្នុងភារកិច្ចបម្រើការងារនៅក្នុងអង្គភាព មកសំណេះសំណាលសាកសួរសុខទុក្ខគាត់នៅពេលនេះ និងសូមគោរពជូនពរឯកឧត្ដមមេបញ្ជាការ និងសហការីទាំងអស់ សូមទទួលបាននូវពុទ្ធពរទាំងបួនប្រការ កុំបីឃ្លៀងឃ្លាតឡើយ។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។
