សម្ដេចមហាបវរធិបតី ហ៊ុន ម៉ាណែត និងលោកជំទាវ បន្តឧបត្ថម្ភស្បៀងអាហារ គ្រឿងឧបភោគបរិភោគ និងសម្ភារសំណង់ ជូនដល់បញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងវិស័យមនុស្សធម៌

(កំពង់ធំ)÷ នៅព្រឹកថ្ងៃទី០២ ខែមេសា ឆ្នាំ២០២៥ ឯកឧត្តមនាយឧត្តមសេនីយ៍ គីម ប៊ុនថាន រដ្ឋមន្ត្រីប្រតិភូអមសម្ដេចនាយករដ្ឋមន្ត្រី តំណាងសម្ដេចមហាបបរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំសហការី នាំយកស្បៀងអាហារគ្រឿងឧបភោគបរិភោគ និងសម្ភារសំណង់ ផ្ដល់ជូនគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ ដើម្បីបន្តធ្វើសកម្មភាពមនុស្សធម៌ជួយដល់ក្រុមគ្រួសារអតីតយុទ្ធជន និងប្រជាជនដែលមានជីវភាពលំបាកខ្វះខាតនៅក្នុងខេត្តកំពង់ធំ។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជា ខេត្តកំពង់ធំ បានឡើងធ្វើរបាយការណ៍ស្វាគមន៍ និងបានរាយការណ៍អំពីសកម្មភាពដ៏មមាញឹករបស់សមាគមអតីតយុទ្ធជន និងបញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងការបម្រើបងប្អូនអតីតយុទ្ធជននិងប្រជាជននៅក្នុងខេត្តកំពង់ធំ ដែលមានជីវភាពលំបាកខ្វះខាតនាពេលកន្លងទៅ បានធ្វើនៅគ្រប់ទីកន្លែង ហើយបានដោះស្រាយការលំបាកដោយផ្ទាល់ ជូនដល់ក្រុមគ្រួសារអតីតយុទ្ធជន និងប្រជាជននៅតាមមូលដ្ឋាននានា។

ឧត្តមសេនីយ៍ទោ សោម ស៊ុន បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរអធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលសម្ដេចនិងលោកជំទាវ តែងតែបានផ្ដល់នូវស្បៀងអាហារគ្រឿងឧបភោគបរិភោគ សម្ភារសំណង់នានា ជូនដល់បញ្ជាការដ្ឋានតំបន់ប្រតិបត្តិការសឹករងកំពង់ធំ និងគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ ជាបន្តបន្ទាប់នាពេលកន្លងមក ដើម្បីបានធ្វើសកម្មភាពជួយដោះស្រាយនូវរាល់ការលំបាកខ្វះខាតជូនអតីតយុទ្ធជននិងប្រជាជនយើង។

ឯកឧត្តម គីម ប៊ុនថាន បានពាំនាំនូវការផ្ដាំផ្ញើសាកសួរសុខទុក្ខ និងជូនពរពីសំណាក់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ព្រមទាំងក្រុមគ្រួសារនិងបងប្អូន អ៊ំ ពូ មីង អតីតយុទ្ធជនទាំងអស់ នៅក្នុងខេត្តកំពង់ធំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងឈានមកដល់នៅពេលខាងមុខនេះ សូមទទួលបាននូវពុទ្ធពរនិងពរទាំង ៥ប្រការកុំបីឃ្លៀងឃ្លាតឡើយ។

ឯកឧត្តមនាយឧត្តមសេនីយ៍ គីម ប៊ុនថាន បានថ្លែងនូវការកោតសរសើរឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានសមាគមអតីតយុទ្ធជនកម្ពុជា ខេត្តកំពង់ធំ ដែលបានខិតខំប្រឹងប្រែងបម្រើក្រុមគ្រួសារអតីតយុទ្ធជន និងប្រជាជននៅក្នុងខេត្តកំពង់ធំនាពេលកន្លងទៅបានយ៉ាងល្អប្រសើរ និងណែនាំត្រូវបន្តសកម្មភាពបម្រើអតីតយុទ្ធជន និងប្រជាជនយើងទាំងអស់ចំគោលដៅ និងទាន់ពេលវេលាដើម្បីសម្រាលការលំបាករបស់បងប្អូនក្នុងជីវភាពរស់នៅប្រចាំថ្ងៃ។

ស្បៀងអាហារគ្រឿងឧបភោគបរិភោគ និងសម្ភារសំណង់ អំណោយរបស់សម្ដេចមហាបវរអធិបតី ហ៊ុន ម៉ាណែត និងលោកជំទាវបណ្ឌិត ដែលត្រូវបានប្រគល់ជូនដល់បញ្ជាការដ្ឋានតំបន់ប្រតិបត្តិការសឹករង និងគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ នៅពេលនេះរួមមាន៖ ស៊ីម៉ង់ត៍ចំនួន ២០តោន ស័ង្កសី ចំនួន ២,០០០សន្លឹក អង្ករចំនួន ៥តោន មីជាតិចំនួន ៥០០កេស ទឹកត្រីទឹកស៊ីអ៉ីវចំនួន ១,០០០ យូរ និងត្រីខកំប៉ុងចំនួន ១០០កេស។ អត្ថបទតំបន់សឹករងកំពង់ធំ.ពិនិត្យដោយអ៊ុមញឹប។