អភិបាលខេត្ត អញ្ជើញដឹកនាំកិច្ចប្រជុំប្រចាំខែគណៈ បញ្ជាការឯកភាពរដ្ឋបាលខេត្តកំពង់ធំ ដើម្បីពង្រឹងការងារសន្តិសុខ សុវត្ថិភាព និងសណ្តាប់ធ្នាប់ សម្រាប់ពិធីសង្រ្កាន្តកំពង់ធំ

(កំពង់ធំ)÷ ឯកឧត្តម នួន ផារ័ត្ន អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តកំពង់ធំ បានដឹកនាំកិច្ចប្រជុំប្រចាំខែគណៈបញ្ជាការឯកភាពរដ្ឋបាលខេត្តកំពង់ធំ នៅរសៀលថ្ងៃទី៣១ ខែមីនា ឆ្នាំ២០២៥ នៅសាលប្រជុំខេត្តកំពង់ធំ ដើម្បីពង្រឹងការងារសន្តិសុខ សុវត្ថិភាព និងសណ្តាប់ធ្នាប់ជូនដល់បងប្អូនដែលអញ្ជើញមកលេងសង្ក្រាន្តកំពង់ធំ និងធ្វើដំណើរឆ្លងកាត់ខេត្តកំពង់ធំ នៅក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលដ៏ខ្លីខាងមុខនេះ។

ឯកឧត្តម នួន ផារ័ត្ន បានមានប្រសាសន៍ឱ្យគណៈបញ្ជាការឯកភាពរដ្ឋបាលខេត្តកំពង់ធំ យកចិត្តទុកដាក់លើការកាត់បន្ថយគ្រោះថ្នាក់ចរាចរណ៍ និងបន្តលើកកម្ពស់សុខសុវត្ថិភាពជូនបងប្អូនប្រជាពលរដ្ឋ តាមរយៈការបង្ក្រាប និងទប់ស្កាត់បទល្មើសផ្សេងៗ នៅក្នុងក្រុងស្ទឹងសែនឱ្យបានទាន់ពេលវេលា និងកាន់តែមានប្រសិទ្ធភាព។

ចំពោះការងាររៀបចំតុបតែងត្រៀមរៀបចំសង្រ្កាន្តកំពង់ធំ ឯកឧត្តមប្រធានគណៈបញ្ជាការឯកភាពខេត្តកំពង់ធំ បានថ្លែងអំណរគុណដល់បងប្អូនថ្នាក់ដឹកនាំ និងមន្ត្រីរដ្ឋបាលខេត្ត រដ្ឋបាលក្រុងស្រុក មន្ទីរ អង្គភាពនានា ដែលបានសាមគ្គីគ្នា និងសហការគ្នាខ្ពស់ ក្នុងការរៀបចំតុបតែងកម្មវិធីសង្ក្រាន្ត រហូតទទួលបានការសាទរ និងកោតសរសើរពីបងប្អូនទាំងក្នុងខេត្ត និងគ្រប់ទិសទី។ 

ឯកឧត្តមក៏បានលើកឡើងពីការរៀចំសង្ក្រាន្តកំពង់ធំនាពេលខាងមុខនេះ ត្រូវរៀបចំឱ្យមានដាក់លក់ភូមិមួយផលិតផលមួយ ដែលជាស្នាដៃរបស់ខ្មែរសុទ្ធសាធ ដើម្បីទាក់ទាញភ្ញៀវជាតិ និងអន្តរជាតិ បានភ្លក់រសជាតិហើយ នឹងជួយទិញផលិតផលរបស់ខ្មែរយកទៅប្រើប្រាស់ដែលមានគុណភាព និងអនាម័យល្អ។ ពាក់ព័ន្ធនឹងល្បែងប្រជាប្រិយខ្មែរ ត្រូវរៀបចំឱ្យមានទីកន្លែងពិតប្រាកដនៅក្នុងទីតាំងណាមួយសមស្រប និងជូនដំណឹងដល់បងប្អូនប្រជាពលរដ្ឋ ចូលមកលេងកម្សាន្តឱ្យបានច្រើនកុះករ។ សំខាន់បំផុតការរៀបចំភ្លើងបំភ្លឺត្រូវតែមានអ្នកខុសត្រូវឱ្យបានច្បាស់លាស់ ចៀសសវាងកើតឡើងដោយប្រការណាមួយជាយថាហេតុ។ អត្ថបទលោក ធូ កែវមុន្នី-ពិនិត្យដោយអ៊ុមញឹប។