លោកជំទាវ ជា សិរី អញ្ជើញចូលរួមក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុចំនួន ១.២៧១បណ្ណ ស្មើនឹង ៦៩៤គ្រួសារ ជូនប្រជាពលរដ្ឋ ០៤ភូមិ នៃឃុំឈូក ក្នុងស្រុកប្រាសាទសំបូរ
(កំពង់ធំ)÷ ឯកឧត្តម នួន ផារ័ត្ន អភិបាលខេត្តកំពង់ធំ អមដំណើរលោកជំទាវ ជា សិរី អគ្គទេសាភិបាលធនាគារជាតិនៃកម្ពុជា ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុចំនួន ១.២៧១បណ្ណ ស្មើនឹង ៦៩៤គ្រួសារ ជូនប្រជាពលរដ្ឋ ០៤ភូមិ នៃឃុំឈូក ក្នុងស្រុកប្រាសាទសំបូរ នាព្រឹកថ្ងៃទី២២ ខែមីនា ឆ្នាំ២០២៥។
ជាមួយគ្នានោះដែរ ឯកឧត្តម នួន ផារ័ត្ន បានឡើងអានរបាយការណ៍សង្ខេបរបស់ស្ថានភាពរដ្ឋបាលខេត្ត ព្រមទាំងថ្លែងការកោតសរសើរចំពោះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងក្រុមការងារចុះបញ្ជីដីធ្លី ដែលបានសម្រេចលទ្ធផលជាបន្តបន្ទាប់ ក្នុងការអនុវត្តនីតិវិធីនៃការចុះបញ្ជីដី មានលក្ខណៈជាប្រព័ន្ធ ជូនដល់ប្រជាពលរដ្ឋដែលជាម្ចាស់ដី អ្នកកាន់កាប់ដី និងស្ថាប័នរដ្ឋ និងបានរៀបចំពិធីប្រគល់វិញ្ញាបនបត្រសម្គាល់ម្ចាស់អចលវត្ថុ ជូនប្រជាពលរដ្ឋស្ថាប័នរដ្ឋ ដែលបានអនុវត្តតាមនីតិវិធី ស្របតាមគោលនយោបាយរបស់រាជរដ្ឋាភិបាលកម្ពុជា ។
លោកជំទាវ ជា សិរី មានប្រសាសន៍លើកឡើងថា ពិធីចែកវិញ្ញាបនបត្រសម្គាល់ម្ចាស់អចលនវត្ថុថ្ងៃនេះ ជាការរួមចំណែក ការពង្រឹងសុវត្ថិភាព នៃការកាន់កាប់ដីធ្លី ដែលធ្វើឱ្យទំនាស់ដីធ្លីមានការថយចុះ ពង្រឹងនូវទីផ្សារដីធ្លី ព្រោះបើដីមានប្លង់កម្មសិទ្ធិគឺមានការពារដោយច្បាប់ ធានាដោយរដ្ឋ ហើយប្រជាពលរដ្ឋអាចយកប្លង់ទៅប្រើប្រាស់ ទាញយកប្រយោជន៍ដើម្បីលើកស្ទួយជីវភាពគ្រួសារ ជាពិសេសការចូលរួមចំណែកបង្កើនចំណូល ថវិការដ្ឋតាមរយៈពន្ធប្រថាប់ត្រា និងការប្រមូលពន្ធប្រចាំឆ្នាំលើអចលនទ្រព្យផងដែរ ។
លោកជំទាវ ជា សិរី សំណូមពរ ដល់បងប្អូនប្រជាពលរដ្ឋត្រូវចូលរួមជាមួយក្រុមការងារបច្ចេកទេសរបស់មន្ទីរ ក្នុងការវាស់វែង បំពេញទិន្នន័យឲ្យបានគ្រប់ៗគ្នា ជៀសវាងក្រុមការងារវាស់វែងរួចសល់ដីរបស់បងប្អូនដាក់ជាដីគ្មានទិន្នន័យ ពិសេសករណីមានទំនាស់រវាងអ្នកជាប់ព្រំគួររួមគ្នាដោះស្រាយតាមវិធីសាស្ត្រឈ្នះៗ ទាំងអស់គ្នាដើម្បីយើងរស់នៅក្នុងភូមិឋានប្រកបដោយភាពសុខដុមរម្យនានឹងងគា្ន និងសំណូមពរ ដល់មន្ទីរៀបចំដែនដី នគរូបនីយកម្ម សំណង់ និងសុរិយោដីខេត្ត បន្តខិតខំធ្វើយ៉ាងណាវាស់វែង ឲ្យបានចប់សព្វគ្រប់ទូទាំងខេត្តតាមផែនការរបស់ក្រសួង ក្នុងបំណាច់ឆ្នាំ២០២៥ ខាងមុខនេះ ។ អត្ថបទរដ្ឋបាលខេត្តកំពង់ធំ ពិនិត្យដោយលោក ធូ កែវមុន្នី
