លោកជំទាវ លំ គន្ធារី ដឹកនាំកិច្ចប្រជុំក្រុមការងារឆ្លើយតប
ជាពហុវិស័យ ចំពោះអំពើហិង្សាទាក់ទងទៅនឹងយេនឌ័រ ក្នុងខេត្តកំពង់ធំ
(កំពង់ធំ)÷ ក្រសួងកិច្ចការនារី សហការជាមួយរដ្ឋបាលខេត្តកំពង់ធំ និងមន្ទីរកិច្ចការនារីខេត្ត ព្រមទាំងមានការគាំទ្រតាមរយៈអង្គការយូអិនវូមែន(UN woman)បានរៀបចំកិច្ចប្រជុំក្រុមការងារឆ្លើយតបជាពហុវិស័យ ចំពោះអំពើហិង្សា ទាក់ទងនឹងយេនឌ័រ ក្រោមអធិបតីភាពលោកជំទាវ លំ គន្ធារី អភិបាលរងនៃគណៈអភិបាលខេត្ត និងជាប្រធានក្រុមការងារឆ្លើយតបជាពហុវស័យចំពោះអំពើហិង្សាទាក់ទង នឹងយេនឌ័រ នៅសាលប្រជុំមន្ទីរកិច្ចការនារីខេត្តកំពង់ធំ នៅព្រឹកថ្ងៃទី២៧ ខែមិថុនា ឆ្នាំ២០២៥។
កម្មវិធីក៏មានការអញ្ជើញចូលរួមពីលោកស្រី ស៊ិន ស៊ីផាន ប្រធានមន្ទីរកិច្ចការនារីខេត្ត និងជាអនុប្រធានអចិន្ត្រៃយ៍
លោកស្រី ស៊ុន ម៉ូនិច អនុប្រធាននាយកដ្ឋានការពារផ្លូវច្បាប់នៃក្រសួងកិច្ចការនារី ប្រធានមន្ទីរជុំវិញខេត្ត អង្គការដៃគូរពាក់ព័ន្ធ អភិបាលរងស្រុក ប្រធានការិយាល័យសុខមាលភាពសង្គមកិច្ចស្រុក អញ្ជើញមកពីស្រុកទាំង៧ស្រុក សរុបចំនួន៤០នាក់ ស្រី២៩នាក់។
លោកស្រី ស៊ិន ស៊ីផាន ប្រធានមន្ទីរកិច្ចការនារីខេត្ត បង្ហាញពីគោលបំណង ដើម្បីពង្រឹងការយល់ដឹងឱ្យកាន់ប្រសើរឡើង ដល់ក្រុមការងារឆ្លើយតបជាពហុវិស័យ ចំពោះអំពើហិង្សាទាក់ទង នឹងយេនឌ័រ (GBV )ពីតួនាទី/ភារកិច្ច និងការផ្តល់សេវាឆ្លើយតបជាពហុវិស័យ ចំពោះអំពើហិង្សាលើស្ត្រី និងក្មេងស្រីប្រកបដោយគុណភាព ប្រសិទ្ធិភាពឱ្យទាន់ពេលវេលា តាមរយៈកិច្ចសហការរវាងអ្នកផ្តល់សេវា និងអ្នកពាក់ព័ន្ធ។ ការបង្កើតក្រុមការងារឆ្លើយតបជាពហុវិស័យចំពោះអំពើហិង្សា ទាក់ទងនឹងយេនឌ័រ ក្នុងខេត្តកំពង់ធំ ដែលមានចំនួន០៧ស្រុក គឺមានភារកិច្ច និងទំនួលខុសត្រូវដូចមានចែងនៅក្នុងសេចក្តីសម្រេច ចំពោះកិច្ចខិតខំប្រឹងប្រែងរបស់ក្រុមការងារក្នុងការសម្របសម្រួល ដែលចូលរួមក្នុងការដោះស្រាយ បញ្ហាដល់ជនរងគ្រោះជាស្ត្រី និងកុមារីកន្លងមកដោយបានទទួលបាននូវលទ្ធផលល្អប្រសើរ ជាទិសដៅ និងផែនការបន្ត សូមក្រុមការងារតាមបណ្តាលស្រុកទាំងអស់ បន្តខិតខំឱ្យអស់ពីសមត្ថភាពក្នុងការចូលរួម លើកកម្ពស់យេនឌ័រដើម្បីស្ត្រី និងកុមារីរួចផុតពីការរំលោភបំពាន និងការទទួលរងនូវអំពើហឹង្សា។
ជាមួយគ្នាអ្នកផងដែរលោកជំទាវ លំ គន្ធារី បានមានប្រសាសន៍ថា ដើម្បីពង្រឹងនូវកិច្ចសហការរវាងថ្នាក់ដឹកនាំ ដោយលើកឡើងបញ្ហាប្រឈម និងស្វែងរកដំណោះស្រាយព្រមទាំងផ្តល់នូវអនុសាសន៍ល្អៗមួយចំនួន។ ការរួមគ្នាលើកកម្ពស់យេនឌ័រ គឺសំដៅទៅដល់ការយកចិត្តទុកដាក់ការផ្តល់សិទ្ធិពេញលេញ និងការគាំពារចំពោះស្ត្រី និងកុមារី ហេតុដូច្នេះសូមក្រុមការងារទាំងអស់ដែល មកពីតាមបណ្តាស្រុកចំនួន៧នៅក្នុងខេត្តកំពង់ធំ មេត្តាយកចិត្តទុកដាក់ឱ្យបានខ្ពស់ទៅលើកិច្ចអន្តរាគមន៍ ជួយដោះស្រាយបញ្ហារបស់ស្ត្រី និងកុមារីដែលរងគ្រោះដោយការរំលោភបំពាន និងរងនូវអំពើហិង្សានៅក្នុងមូលដ្ឋានឱ្យបានទាន់ពេលវេលា និងមានប្រសិទ្ធភាពបំផុត។ ជាពិសេសនោះត្រូវជួយផ្តល់កន្លែង មានសុវត្ថិភាព ស្វែងរកសេវាផ្នែកច្បាប់ សេវាថែទាំសុខភាព ស្វែងរកការបណ្តុះបណ្តាល ជំនាញវិជ្ជាជីវៈ និងស្វែងរកការងារសម្រាប់ជនរងគ្រោះផងដែរ។ ក្នុងករណីមានអំពើហិង្សា និងការរំលោភបំពានកើតឡើង ត្រូវសហការធ្វើយ៉ាងណាចាប់ជនប្រព្រឹត្តបទល្មើសយកមកផ្តន្ទាទោសទៅតាមផ្លូវច្បាប់។
លោកជំទាវ លំ គន្ធារី អភិបាលរងខេត្តកំពង់ធំ បានផ្តល់អនុសាសន៍ដល់អង្គប្រជុំ និងធ្វើការបូកសរុបលទ្ធផលកិច្ចប្រជុំ ក្រៅពីបានធ្វើការងារជាពហុវិស័យនេះឃើញថាយល់ឃើញកាន់តែច្បាស់ថែមទៀតអំពីតួនាទី/ភារកិច្ចមាន៖ ១- យល់ច្បាស់ពីការត្រៀមរៀបចំផែនការសកម្មភាពដែលបានធ្វើរយៈពេលមួយខែ នាពេលខាងមុខនេះជាបន្ទាន់ ក្រោយពីរៀបចំរួចគឺត្រូវតែប្រញ៉ាប់យកដាក់ឆ្លងក្រសួងសេដ្ឋកិច្ចហិរញ្ញវត្ថុ ដើម្បីបានថវិកាអនុវត្តន៍ការងារ បន្ត ដោយកញ្ចប់ថវិការបស់UN woman ត្រូវបានបញ្ចប់ក្នុងខែ៦នេះសម្រាប់ឆ្នាំ២០២៥ ។ មន្ទីរអង្គភាពនិងស្រុកទាំង៧ត្រូវគ្រោងនៅសកម្មភាពអ្វីដែលត្រូវធ្វើ ក្នុងរយៈពេល ១ខែ ក្នុងពេលខាងមុខធ្វើផែនការសកម្មភាពសម្រាប់ឆ្នាំ២០២៦ ខាងមុខ បើសិនជា UN woman នៅតែបន្តកាគាំទ្រ ការធ្វើផែនការសកម្មភាពបញ្ជូនទៅដើម្បីគ្រោងថវិកាឱ្យគេជួយ តែបើផ្ទុយទៅវិញ គម្រោងត្រូវបានបញ្ចប់នៅតែប្រើប្រាស់សេចក្តីសម្រេច ផែនការសកម្មភាព រៀបចំស្នើសុំថវិកាចូលទៅតាមស្រុក និងមន្ទីរដើម្បីឱ្យស្រុក និងមន្ទីរយល់ព្រមដាក់ថវិកាធ្វើសកម្មភាពឱ្យមានភាពរឹងមាំដោយខ្លួនឯងពេលដែលមានថវិកាត្រូវចុះធ្វើសកម្មភាពបាន។ អត្ថបទមន្ទីរកិច្ចការនារីខេត្តកំពង់ធំ-ពិនិត្យដោយអ៊ុមញឹប។
