រដ្ឋមន្ត្រីក្រសួងការងារផ្តល់កុំព្យូទ័រ ១៣៩ គ្រឿង ជូនអង្គភាពនានាក្នុងខេត្តកំពង់ធំ

(កំពង់ធំ )៖ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈផ្តល់កុំព្យូទ័រ ១៣៩ គ្រឿង ជូនអង្គភាពនានាក្នុងខេត្តកំពង់ធំ ថ្ងៃទី ១ ខែមីនាឆ្នាំ ២០២៥ នៅវិទ្យាស្ថានពហុបច្ចេកទេសខេត្តកំពង់ធំ។

ឯកឧត្តមសូមសំដែងនូវការកោតសរសើរ និងវាយតម្លៃខ្ពស់ចំពោះមន្ត្រីរាជការដែលបានខិតខំប្រឹងប្រែងរួមគ្នាក្នុងការបំពេញតួនាទី ភារកិច្ច រហូតសម្រេចបាននូវសមិទ្ធផលជាច្រើនគួរជាទីមោទនរួមចំណែកធ្វើឱ្យខេត្តកំពង់ធំ មានការប្រែប្រួលមុខមាត់ជាចក្ខុវិស័យកម្ពុជារបស់រាជរដ្ឋាភិបាលអណត្តិទី៧ ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត។

ឯកឧត្តមបញ្ជាក់ថាការផ្ដល់កុំព្យូទ័រទាំងអស់នេះគឺចង់បង្ហាញពីការយកចិត្តទុកដាក់ដើម្បីជួយទៅដល់សិស្សានុសិស្ស មន្ត្រីរាជការឲ្យស្វែងយល់អំពីប្រព័ន្ធបច្ចេកវិទ្យាទំនើបប្រព័ន្ធឌីជីថល និង AI ដែលជាយុគសម័យទំនើបរបស់ពិភពលោក។

ឯកឧត្តមបានជំរុញឲ្យលោកគ្រូ អ្នកគ្រូ និងអង្គភាពផ្សេងទៀតយកសម្ភារៈទាំងអស់នេះទៅប្រើប្រាស់ឲ្យចំគោលដៅ ពិសេសត្រូវចង់ចាំថា ចំណេះវិជ្ជាជាស្ពានឈានទៅរកជោគជ័យនិងកិត្តិយស សម្រាប់ខ្លួនឯង ក្រុមគ្រួសារ និងសង្គមជាតិយើងទាំងមូល ដែលកំពុងត្រូវការធនធានមនុស្សជាចាំបាច់ នាសព្វថ្ងៃនេះក្នុងការបន្តអភិឌ្ឍប្រទេស។

គួរបញ្ជាក់ថាមន្ទីរអង្គភាពដែលត្រូវទទួលបានកុំព្យូទ័រមាន៖
១.មន្ទីរការងារនិងបណ្ដុះបណ្ដាលវិជ្ជាជីវៈខេត្តកំពង់ធំ ២០គ្រឿង
២.វិទ្យាស្ថានពហុបច្ចេកទេសខេត្តកំពង់ធំ ៤០ គ្រឿង
៣.វិទ្យាល័យកំពង់ធំ ៤០ គ្រឿង
៤.ស្នងការនគរបាលខេត្តកំពង់ធំ១០គ្រឿង
៥.កងរាជអាវុធហត្ថខេត្តកំពង់ធំ ៥ គ្រឿង
៦.តំបន់ប្រតិបត្តិការសឹករងកំពង់ធំ ៥ គ្រឿង
៧.សាលាដំបូងខេត្តកំពង់ធំ ៥ គ្រឿង
៨.មន្ទីរព័ត៌មានខេត្តកំពង់ធំ ៦ គ្រឿង
៩.មន្ទីរអប់រំយុវជននិងកីឡាខេត្តកំពង់ធំ ៦ គ្រឿង
១០.សាលាសង្កាត់អាចារ្យលាក់ ២គ្រឿង