បញ្ជាការដ្ឋានតំបន់ប្រតិបត្តិការសឹករងកំពង់ធំ ផ្សព្វផ្សាយសភាពការណ៍ថ្មីៗ និងពង្រឹងភារកិច្ចរបស់កងយោធពលខេមរភូមិន្ទ
ខេត្តកំពង់ធំ៖ នៅព្រឹកថ្ងៃទី ២២ ខែមិថុនា ឆ្នាំ២០២៦ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទិ៤ បានបើកកិច្ចប្រជុំផ្សព្វផ្សាយសភាពការណ៍ថ្មីៗ និងពង្រឹងតួនាទីភារកិច្ចរបស់កងយោធពលខេមរភូមិន្ទ ដែលពិធីនេះប្រព្រឹត្តទៅស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងដោយមានការចូលរួមពី នាយទាហាន នាយទាហានរង និងពលទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំយ៉ាងច្រើនកុះករផងដែរ ។
ឧត្តមសេនីយ៍ទោ សោម ស៊ុន បានផ្សព្វផ្សាយប្រសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្តី្រនៃព្រះរាជាណាចក្រកម្ពុជា ដែលបានថ្លែងក្នុងជំនួបក្រៅផ្លូវការជាមួយឯកឧត្ដម អនុទីន ឆានវីរគុល នាយករដ្ឋមន្ត្រីនៃព្រះរាជាណាចក្រថៃ នៅទីក្រុងកាហ្សាន នៃសហព័ន្ធរុស្សី ដែលមានទី១ កម្ពុជាប្រកាន់ជំហរដោះស្រាយបញ្ហាព្រំដែនជាមួយថៃ ដោយសន្តិវិធី និងស្របតាមច្បាប់អន្តរជាតិ។ ទី២. ពាក់ព័ន្ធនឹងព្រំដែនសមុទ្ទ គឺសូមភាគីទាំងពីរបន្តដោះស្រាយតាមរយៈយន្តការ ការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិ ស្ដីពីច្បាប់សមុទ្រ (UNCLOS) ដែលបាននិងកំពុងដំណើរការ ។ ទី៣. ពាក់ព័ន្ធនឹងព្រំដែនគោក កម្ពុជាមកដល់ពេលនេះ នៅតែជ្រើសរើសយកការដោះស្រាយតាមយន្តការទ្វេភាគីដែលមានស្រាប់គឺ JBC និងផ្អែកលើកិច្ចព្រមព្រៀងដែលមានស្រាប់។ ប៉ុនែ្តកម្ពុជាជំរុញអោយភាគីថៃរៀបចំតែងតាំងប្រធានJBC ថៃ និងជំរុញអោយចាប់ផ្តើមដំណើរការចុះវាស់វែង និងខ័ណ្ឌសីមាព្រំដែនអោយបានឆាប់ ស្របតាមស្មារតីនៃសេចក្តីប្រកាសរួមថ្ងៃ ២៧ ធ្នូ ២០២៥ ចំណុចទី៣ ដែលភាគីទាំងពីរបានចុះហត្ថលេខា។ និងទី៤. ពាក់ព័ន្ធនឹងការបើកច្រកព្រំដែនគោក មិនមានការចាំបាច់ក្នុងការជជែកគ្នាក្នុងពេលនេះទេ។
ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួនមានជាអាទិ៍ ទី១ យោធិនគ្រប់រូបត្រូវត្រៀមខ្លួនរួចជាស្រេចអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ក្នុងភារកិច្ចការពារបូរណភាពទឹកដី និងអន្តរាគមន៍ជួយដោះស្រាយជូនប្រជាពលរដ្ឋដែលរងគ្រោះដោយក្រុមហន្តរាយផ្សេងៗឲ្យបានទាន់ពេលវេលា។ ទី២ ត្រូវបន្តសកម្មភាពអនុវត្តភារកិច្ច ក្នុងការការពារ ទប់ស្កាត់ និងបង្ក្រាបទល្មើសធនធានធម្មជាតិឱ្យមានប្រសិទ្ធភាព ។ ទី៣ ត្រូវយកចិត្តទុកដាក់ក្នុងការបន្តសកម្មភាព ដោះស្រាយនូវរាល់ការលំបាកផ្សេងៗជូនដល់បងប្អូនអតីតយុទ្ធជន និងនិវត្តជនកម្ពុជានៅខេត្តកំពង់ធំ។ ទី៤ ត្រូវបន្តចូលរួមសហការជាមួយអាជ្ញាធរដែនដីនិងកងកម្លាំងប្រដាប់អាវុធទាំងបី ក្នុងការអនុវត្តនូវគោលនយោបាយ ភូមិឃុំ សង្កាត់មានសុវត្ថិភាពរបស់រាជរដ្ឋាភិបាល។ និងទី ៥ ត្រូវអនុវត្តយ៉ាងមុឺងម៉ាត់ នូវច្បាប់ស្ដីពីលក្ខន្តិកៈ និងបទវិន័យទូទៅ របស់កងយោពលខេមរៈភូមិន្ទ ដោយត្រូវយកចិត្តទុកដាក់អនុវត្តតាមសេចក្តីណែនាំលេខ ០០៣/២០២០ របស់ក្រសួងការពារជាតិឲ្យមានប្រសិទ្ធភាព ។អត្ថបទតំបន់ប្រតិបត្តិការសុខរងកំពង់ធំ-ពិនិត្យដោយអ៊ុមញឹប។
