អភិបាលស្រុកតាំងគោក ដឹកនាំសប្បុរសជន ចុះជួបសាកសួរសុខទុក្ខ និងនាំយកអំណោយចែកជូនលោកតា លោកយាយ ចាស់ជរា ៤៣គ្រួសារ នៅឃុំជ្រលង ខេត្តកំពង់ធំ
(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក និងសប្បុរសជន នាព្រឹកថ្ងៃទី០៣ ខែមេសា ឆ្នាំ២០២៦នេះ បានដឹកនាំក្រុមការងារចុះជួបសំណេះសំណាលសាកសួរសុខទុក្ខ និងនាំយកអំណោយចែកជូនលោកតា លោកយាយ ចាស់ជរាចំនួន៤៣គ្រួសារ ស្ថិតនៅទីតាំង២ផ្សេងគ្នា នៅក្នុងឃុំជ្រលង ស្រុកតាំងគោក ខេត្តកំពង់ធំ។
នៅក្នុងឱកាសនោះលោក ហាក់ ម៉ុងហួត បាននាំនូវការផ្តាំផ្ញើសួរទុក្ខពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទី១ របស់កម្ពុជា ក៏ដូចជាឯកឧត្តមបណ្ឌិត ថោង ខុន ទេសរដ្ឋមន្រ្តី និងឯកឧត្តម នួន ផារ័ត្ន អភិបាលខេត្តកំពង់ធំ និងបានបញ្ជាក់ថា ឯកឧត្តមទាំងទ្វេតែងតែបានផ្តាំផ្ញើឱ្យយកចិត្តទុកដាក់ឱ្យបានខ្ពស់ដល់ប្រជាពលរដ្ឋនៅក្នុងមូលដ្ឋាន។
លោកអភិបាលស្រុក ក៏បានលើកឡើង ពីសភាពការណ៍ថ្មីៗនៅក្នុងពិភពលោក ដែលបណ្តាលមកពីការប្រកួតប្រជែងរវាងមហាអំណាចធំៗ បញ្ហាសង្គ្រាមពាណិជ្ជកម្ម បច្ចេកវិទ្យា ហើយថ្មីៗនេះសង្គ្រាម រវាងអ៉ីស្រាអែល- អាមេរិក ជាមួយ អ៉ីរ៉ង់ និងសង្គ្រាមក្នុងតំបន់ផងនោះដែលធ្វើឱ្យទីផ្សារថាមពលពិភពលោកក៏កំពុងរងភាពចលាចលយ៉ាងខ្លាំង និងបានលើកឡើងពីបញ្ហាសង្គ្រាមតាមព្រំដែនកម្ពុជា-ថៃ ដែលកើតឡើងពីការឈ្លានពានរបស់ថៃ ហើយដែលសម្តេចបវរធិបតី នាយករដ្ឋមន្ត្រី បានដាក់ចេញយុទ្ធសាស្ត្រ «ស្ងាត់តែមិនស្ងៀម» និងធ្វើការដោះស្រាយជម្លោះដោយមានការថ្លឹងថ្លែងគ្រប់ជ្រុងជ្រោយ និងប្រកបដោយការទទួលខុសត្រូវ។ កម្ពុជានៅតែបន្តស្វែងរកច្បាប់អន្តរជាតិ និងយន្តការផ្សេងៗ ដើម្បីដោះស្រាយ ដោយប្រកាន់ជំហរការពារអធិបតេយ្យភាពជាតិ និងបូរណភាពដែនដីទាំងបច្ចុប្បន្ន និងអនាគត។
លោកអភិបាលស្រុកតាំងគោក បានបន្តទៀតថា សម្តេចបវរធិបតី ហ៊ុន ម៉ាណែត គូសបញ្ជាក់ថា ជាមួយនិងការបន្តអនុវត្តនូវគ្រប់មធ្យោបាយ ជាពិសេសមធ្យោបាយការទូត និងច្បាប់អន្តរជាតិ ដើម្បីការពារអធិបតេយ្យ និងបូរណភាពទឹកដីកម្ពុជា និងដោះស្រាយជម្លោះព្រំដែនកម្ពុជា-ថៃ ។
ជាមួយគ្នានោះដែរ លោកអភិបាលស្រុក ក៏បានណែនាំឱ្យបងប្អូនសន្សំសំចៃថាមពលអគ្គីសនីនៅក្នុងការរស់នៅប្រចាំថ្ងៃ និងបានលោកទឹកចិត្តឱ្យបងប្អូនចិញ្ចឹមសត្វ ដាំដុះបង្កបង្កើនផលដើម្បីបន្ថែមចំណូលក្នុងគ្រួសារ កាត់បន្ថយការនាំចូលពីបរទេស និងសុវត្ថិភាពលើចំណីអាហារផងដែរ ត្រូវចេះរៀនរស់នៅក្នុងសភាពការណ៍ថ្មី។ បានក្រើនរំលឹកដល់ប្រជាជនគ្រប់រូបយកចិត្តទុកដាក់ ក្នុងការតាមដានសុខភាព ដោយការពិនិត្យនៅតាមមណ្ឌលសុខភាព ពេទ្យបង្អែក ដែលនៅជិតបំផុត ខណៈដែលសព្វថ្ងៃនេះសេវាសុខាភិបាលកាន់តែទំនើប និងមានក្រុមគ្រូពេទ្យជំនាញៗផងដែរ។
ជាមួយគ្នានោះដែរ លោក ហាក់ ម៉ុងហួត ក៏បានក្រើនរំលឹកដល់ថ្នាក់ដឹកនាំភូមិ ឃុំ ធ្វើការតាមដាន និងចុះសួរសុខទុក្ខប្រជាពលរដ្ឋជាប្រចាំ ដើម្បីដឹងពីបញ្ហាផ្សេងៗ និងត្រូវសូមរាយការណ៍ដល់ថ្នាក់លើដើម្បីដោះស្រាយ និងអន្តរាគនម៍ឲ្យទាន់ពេលវេលា។
ក្នុងនាមអាជ្ញាធរក្នុងស្រុកតាំងគោក លោក ហាក់ ម៉ុងហួត ក៏សំណូមពរប្រជាពលរដ្ឋ បន្តជឿជាក់លើការដឹកនាំរបស់រាជរដ្ឋាភិបាល ក្នុងការដោះស្រាយបញ្ហាព្រំដែនកម្ពុជា-ថៃ, ពង្រឹងសាមគ្គីភាព រួបរួមកម្លាំងគ្នាជាធ្លុងមួយ, ដើម្បីការពារទឹកដីខ្មែរឱ្យនៅគង់វង្សជារៀងរហូត៕ អត្ថបទ រដ្ឋបាលស្រុកតាំងគោក ពិនិត្យដោយលោក ធូ កែវមុន្នី
